Posted on

Salvation IET Centenary lawmna a ṭiak

Salvation IET Centenary lawmna a ṭiak

Salvation Army India Eastern Territory (IET)-in an kum 100 tlin, April 25, 2017 aṭanga R Dengṭhuama Indoor Stadium-a an lawm ṭan chu ni tin chhunzawmin, nimin pawh khan uar takin an lawm chhunzawm a, nizan khan a ṭiak. Centenary lawmna hi Governor, Chief Minister leh Mizoram sorkara hotu dangte’n an hmanpui a ni.

Salvation Army IET centenary lawmna hi April 26 khan Governor Lt.Gen. Nirbhay Sharma chuan hmanpuiin, thu a sawi a; April 29 zan leh nimin chawhma khan chief minister Lal Thanhawla’n a hmanpui.

Nimin chawhma inkhawmah thu sawiin Chief Minister chuan, Salvation Army rawngbawlna chu a naupan lai aṭanga a hriat tawh leh ṭha a tih em em ṭhin a nih thu a sawi a, “Hriselna tichhetu ruih theih thil do tlattu Chhandamna Sipai Pawlte hi sual an dona kawngah an fakawm a, ruihhlo chi hrang hrang laka inthiar fihlim tura an infuih ṭhinna hi a lawmawm hle,” a ti.

Lal Thanhawla chuan, Mizote chu Pathianin a hmangaih a, a thu puang chhuak tura a ruat an ni tih sawiin, “Ring lo mite hual beh tlatna hmuna awm ni siin, Pathianin Mizote hi Chanchinṭha hril turin a zawng chhuak a. Thingbul, lungbul be hnam, mi lu la hnam chu rei lo têah Kristianah an inlet a. Hei hian Pathian duhsakna kan chanzia a tichiang a ni,” a ti a; Mizote chu Pathianin India rama Chanchinṭha hril tura a dah a nih thu a sawi.

Salvation Army IER centenary lawmnaah hian inkhawm apiangin Salvation Army hmunpui, London aṭanga lo kal Gen. Andre Cox-a’n thuchah a sawi ṭhin. Nimin chawhmaa inkhawmah Gen. Andre Cox chuan, sipai huaisen nih a ṭulzia sawiin, thinlungah Isua Krista neih a ṭul thu a sawi a; tuna tih dan phungte chu duh tâwk mai lo a, Thlarau Thianghlima inthuam tlat turin mipuite a fuih.

https://www.vanglaini.org/tualchhung/70555

Facebook Comments
Leave a Reply