CSS Hindi zirtirtute’n chaw la nghei zel Thih thlenga chaw nghei huam kan ni – MCHTA

CSS Hindi zirtirtute’n chaw la nghei zel Thih thlenga chaw nghei huam kan ni – MCHTA

CSS hnuaia Hindi zirtirtute chuan chaw an la nghei chhunzawm zel. Mizoram CSS Hindi Teachers Association (MCHTA) chuan thuchhuah siamin, Mizoram sorkara dah ngheh phûta chaw an nghei mekah thih thlenga chaw nghei inhuam eng emaw zat an awm thu an tarlang a; an thil phût a hlawhtlin theih nana ṭawngṭaipui turin Mizoram mipui an ngen.

MCHTA chuan, “Kan dikna chanvo leh chhungkua fanau kan châwm vena hrui chhahsaka kan awm mai tur hi chhanchhuaha kan awm theih nan theihtawp chhuahin hma kan la mek a, kan hmalaknaah tharum thawh emaw, mite tana harsatna siam lo tur zawngin ‘Tiam chin nei lo chawnghei’ hmangin sorkarah kan duhnate kan thlen mek a ni,” an ti.

Tuna an hmalakna avangin mahni hriselna leh an tana pawi tur pawh pawisa zo tawh lo, thih thleng pawha beih huam an nih thu sawiin, MCHTA chuan, “Chaw nghei vanga damlohna a thlen pawha treatment engmah lak tum tawh lo, a ṭul chuan thih pawh huam eng emaw zat kan awm ta,” an ti a; thil chhe ber a thlen hmaa an thil ngiat a hlawhtlin ngei theih nana theihtawpa ṭawngṭaipui turin Mizoram mipui an ngen a ni.

MCHTA chuan, Mizoram sorkar nena an inremna angin, Mizoram sorkar, Central YMA, MZP, MSU leh MCHTA aiawhte’n New Delhi-a hotute an dàwrnaah, contract extension chu a theih loh thuin an lo chhang tih an tarlang a, “Kan state sorkarin tun thlenga chhuanlam a la hman, evaluation neihah Mizoram chauh endi tur a ni lo a, CSS Hindi teacher-te awmna state zawng zawngah kalpui tur a ni,” an ti a; Central lamin thawh hun a pawhsei theih loh avangin CSS language teacher nei ve state dangte chuan state sorkara seng lut turin ruahmanna an siam vek tawh niin an sawi.

https://www.vanglaini.org/tualchhung/69117

Facebook Comments

Add a Comment