Vishal Megamart din duh loh lantir nan MIMA bultumin Aizawla dawrte khâr a ni

Vishal Megamart din duh loh lantir nan MIMA bultumin Aizawla dawrte khâr a ni

Aizawla Vishal Mega­mart hawn tur duh loh lantirna atana MIMA-in Aizawla dawr zawng zawng khâr tura an ngen angin, nimin khan Aizawla dawr tam zawk a inkhâr a, chhun dar 12:30 velah dawr khâr tura an tih chu MIMA chuan an titawp.

MIMA ngenna angin, an pawl hruaitute leh dawr­kai ṭhenkhat chu nimin chawhma khan Millenni­um Centre kawtah an kal­khawm a, Millennium Centre aṭangin Bawngkawn lam panin kawng an zawh. An kawngzawhah hian mi 100 vel an tel a, police-in Chan­mari kâwnah an lo dang.

Police-in an lo danna hmunah hian MIMA hruai­tute’n thu an sawi. MIMA president PC Laldinthara chuan, Aizawla Vishal Megamart hawn tur chu hnam dang ta ngei nia an hriat thu sawiin, sumdawnnaa Mizote chîmralna tura an ngaih thu a sawi a; tuna an hmalakna chu an chhunzawm zel dawn thu a sawi bawk.

MIMA President hian Chanmari kâwnah hian chhun dar 12:30 velah dawr khâr an tih chu an titàwp rih a, dawrte chu hawn theih a nih thu a puang a; chumi hnuah an kawngzawha telte an ṭîn darh a, MIMA hruaitute chu an kal zel dan tur ngaihtuahin an ṭhukhawm nghal a ni.

MIMA-in dawr khâr tura an ngen ang hian Aizawl khawpuia dawr tam tak a inkhâr a, Dawrpui, Zarkawt leh Chanmari-a dawrte chu an inkhar deuh vek a, veng dangah erawh chuan dawr inhawng hmuh tur a awm nual thung.

MIMA chuan thuchhuah siam­in, dawr khâr tura an ngennate dawrkaite’n ṭha taka an zâwm chu lawmawm an tih thu an tarlang a, “Duty tura mi tam tak chhuakin Bawngkawn pana kawng kan zawh phei chu Chanmari-ah police-te’n min dan bakah, Bawngkawn Local Council-te ngenna zahawm tak tihhlawhtlin nan kawngzawh tihtawp a ni,” an ti.

Hetih lai hian, Vishal dawr enkawltu Lalṭhai chuan zawhna chhangin, Vishal Megamart chu anmahni (LRM) ta ngei niin a sawi a, “Kan ta ngei a ni… Thawktu 64 an awm a, chu’ng zinga mi 56 chu Mizo an ni. Hlawh zawng zawng pawh keimahni pek vek a ni a, an bank account-ah kan thunsak. Insurance leh EPF-te pawh kan tihsak vek a ni,” a ti.

Taxation department-a an inziah luhnaah hnam dang hminga ziah luh a nia sawi chungchanga zawhna chhangin Lalṭhai chuan, “Taxation-a registration hi kan duhthusamin kan ti a, inbumna a awm theih avangin company hming ngeia tih kan duh,” a ti. Vishal Megamart dawr an siamah share an neih thu te, share nei lo se chuan an tih loh tur thu te, tun kar tawpah emaw, kar leh tîr lamah emaw hawn an inbeisei thute a sawi bawk.

https://www.vanglaini.org/tualchhung/69063

Facebook Comments

Add a Comment