Posted on

Hindi zirtirtute’n chaw an la nghei zel Mi 31 damdawi-inah admit an ni

Hindi zirtirtute’n chaw an la nghei zel Mi 31 damdawi-inah admit an ni

Mizoram CSS Hindi Teachers Association (MCHTA) chuan sorkara dah ngheh phûta Chief Minister’s Office luhna gate bula chaw an nghei chu an la chhunzawm zel a; damlo chau tawh mi 31 chu Inrinni zan khan Aizawl Civil Hospital (ACH)-ah dah luh an ni.

MCHTA hruaitute hnen aṭanga thu dawn danin, CSS hnuaia Hindi zirtirtute’n chaw an nghei mekah hian damlo leh chau zual mi 160 chuang an awm tawh. ACH medical superintendent Dr KL Remsanga sawi danin, chau zual zinga mi 31 chu Inrinni zan khan ACH-ah admit an ni a; damdawi-inah khum an indaih loh avangin ACH hotute’n Auditorium-ah khum an dawh belh a ni.

Chaw nghei mek zingah nau pai mekte pawh an awm a, nau pai zinga ṭhenkhat phei chuan nau an chhiat tawh niin MCHTA hruaitute chuan an sawi. Harsatna tawkte hi kawṭhalo te, zunthlum leh thisen sang nei, harsatna tâwkte an ni hlawm a; nau pawm lai eng emaw zat an awm tih an sawi bawk.

Dr KL Remsanga chuan Vanglaini palai zawhna chhangin, damdawi-ina admit-te hi an ngaihtuahawm lem lo tih a sawi a, an ṭha chho leh deuhte chu an chhuahtir leh nghal zel mai dawn tih a sawi.

Harsatna an tawh mek laia sorkar hotute’n ngaihsak tlaka an ngai lo chu hriatthiam har an tih thu an sawi a; an harsatna tawh mek chungchangah hian ṭawngṭaipui turin Mizoram mipui an sawm a ni.

https://www.vanglaini.org/tualchhung/68985

Facebook Comments
Leave a Reply