Posted on

Oil zawngtute’n chhiah vbc. 23.23 pe tawh Company-te’n an beisei ang an la lai chhuak lo

Oil zawngtute’n chhiah vbc. 23.23 pe tawh Company-te’n an beisei ang an la lai chhuak lo

Mizorama oil leh gas zawngtu company pathumte’n Mizoram sorkarah chhiah chi hrang hrang cheng vbc. 23.23 an chhûng lut tawh. Hetih lai hian, oil leh gas zawngtu company-te hian an beisei ang an la hmu lo.

Nimina Assembly session-ah MNF mem­ber Lalruatkima zawhna Commerce & Industries minister H Rohluna’n a chhan danin, Mizorama oil leh gas zawngtu zingah ONGC-I in chhiah an pe hnem ber a, cheng vbc. 11.10 an pe tawh.

Company dangin chhiah an pek dan chu – ONGC-II in nuai 41.14, Oil India Ltd.-in vbc. 8.49 leh NAFTOGAZ-in vbc. 3.22 a a ni. Hetih lai hian, NAFTOGAZ-te hi sorkarin an contract a tihtawpsak tawh.

H Rohluna chuan, oil zawn hna hi kalpui zel a nih thu sawiin, “Maubuang leh Keifang ramah Oil India-in an verh a, Maubuang hi an vawi khat verhna a ni a, an beisei aia a chan avangin harsa an ti hle. Sum pawh an sêng nasa. Km. 3 chuang an verh a, gas chu hmu mah se, an beisei ang an hmu lo,” a ti.

Keifang ramah pawh beisei sang tak nei mah se, an verh tawh chin km. 3.800 chuangah an beisei ang an la hmuh loh thu sawiin Industries Minister chuan, “Lungalthei chu an hmu thuai a, gas awmna chin an la verh thleng lote an nih kan ring a, Oil India hotute chu verh leh turtea sawipui an ni,” a ti a; Keifanga leiverh hna chu chawlh­san hrih a nih thu a sawi.

H Rohluna chuan, chhim lama oil leh gas zawngtu NAFTOGAZ-te contract tihtawp a nih avangin mi dang thlang turin sorkar laipui an nawr mek tih sawiin, “Global tender a nih avangin an la ti chiah loin kan hria,” a ti a; Oil India pawh an term a tawp avangin kum 2019 thlenga pawhsei turin sorkar laipui an dawr mek thu House a hrilh.

ONGC-te’n Meidum leh Zanlawnah lei verh hna an zo tawh tih sawiin H Rohluna chuan, “Meidum bikah gas hmuh a ni a, hemi aṭang hian ni tin gas standard cubic 5,52674 pe chhuak thei turin an report a ni,” a ti.

Commerce & Industries Minister tarlan danin, oil leh gas hi Mizoram aṭanga lak chhuah a nih chuan Ministry of Petroleum-in ruahmanna a siam dan chuan, oil hmuh chhuah aṭangin state-in royalty 12.5% leh gas-ah 10% a chang dawn. A hlâwkna chu net profit hnuaiah state leh sorkar laipuiin 50-50 in an insem thung dawn a ni.

Facebook Comments
Leave a Reply