Zokhawtharah Zofest hman ṭan a ni

Zokhawtharah Zofest hman ṭan a ni

MZP huaihawtin nimin khan Myanmar ramri bul, Zokhawtharah Zofest ṭan a ni a, minister of state Lalrinmawia Ralte khuallian a ni. Zofest-ah hian Mizoram chhung leh pawn aṭangin palai ṭhahnem tak an kal a,vawiin leh naktukah chhunzawm a ni ang.

Zofest hawnna inkhawm hi MZP president Lalsangzuala Ngente-in a kaihruai a, general secretary L Ramdinliana Renthlei-in report a pe. Minister Lalrinmawia Ralte chuan thu sawiin, ‘Insuihkhawm leh zai i rêl ang u’ tih hla phuahtu Capt. LZ Sailo-in Mizote insuihkhawm leh theih nan theihtawp a lo chhuah tawh tih sawiin, “Tuna kan hlauh ber tur hi kan insuihkhawm loin kan inlungrual lo ang tih hi a ni,” a ti.

Mizo hnam péng hrang hrangte chu inlungrual taka awm tura sáwmin Lalrinmawia chuan, “Kan unaute’n ‘Mizoram chu kan Jerusalem’ tia an sawi ṭhin hi kan ngaihtuah ngai em? Lusei ṭawnga an tawng loh vang maiin kan hmusit mai ang tih ka hlau hle. Lusei

ṭawnga kan ṭawng loh paw’n Mizo tho kan ni tih kan hriat a ngai,” a ti a; Mizote chu Myanmar, Bangladesh leh India ram hmun hrang hrangah an awm darh thu a sawi.

Lalrinmawia Ralte chuan, awmna azirin ṭawng a dang thei a, a pai thei tih a sawi rualin, “Kan vaiin Mizo, unau vek kan ni tih kan hriat a ngai. Mizorama awmte hi kan inenfiah a ngai tak zet a, kan unaute ram dang leh state danga awmte innghahna tlak leh belh tlak tura kan awm a ngai,” a ti.

Zofest-ah hian chawhnu lamah seminar neih a ni a, ‘Unau kan ni’ tih thupui hmanga Mizoram University-a Prof. J Doungel paper buatsaih zirho a ni.

– See more at: http://www.vanglaini.org/tualchhung/64543#sthash.4BwD5FXs.dpuf

Facebook Comments

Add a Comment