CYMA-in Krismas thuchah a tichhuak

CYMA-in Krismas thuchah a tichhuak

Central YMA chuan nimin khan Krismas leh kumthar lo thleng tur pualin thuchah a tichhuak a, “Kristiante hunpui Krismas leh kumthar lo thleng tur hi hlim leh lâwm taka hman a nih theih nan CYMA chuan mi zawng zawngte duhsakna chibai kan bûk a che u,” an ti.

CYMA chuan hunpui lo thleng tur chu mi tinin thlamuang leh hlim taka an hman theih nan YMA branch tinte bawhzui turin ngenna a tichhuak a; YMA duh dan leh beiseite chu a hlawhtlin theih nan sorkar, tlawmngai pawl, kohhrante leh mipui ṭawiawmna a ngen a ni.

YMA  ngenna

1.Krismas leh kumthar hi mi tinin hlim leh lâwm taka hman a nih theih nan veng chhungah mi harsa, damlo leh mu lum zo lo an awm em tih dapchhuakin, chutiang mi an awm chuan a theih leh remchang anga chhawmdawla ṭanpui ni se.

2.Hunpui hi thlahlel taka mi tinin kan nghah ṭheuh a nih avangin mi dangte tana tawrhna thlen thei, silai lem (inhliam theihnate), mite tithlabár theitu hâlpuah chi hrang hrangte hâl/zuar lo tur leh lei lo turin mi zawng zawng kan ngen a ni.

3.Hunpui hi ṭhalai leh râwltharte’n nun kawng sual an chhar thar hun lai leh kawng ṭha lo an zawh ṭan hun a nih ṭhin avangin, puitling tel loin zanah naupang khawlaiah vah chhuahtir loh ni se. Naupangte thlahthlam lo turin chhung tinte kan ngen a ni.

4.Boruak muanawm tak hnuaiah hunpui hi kan hman ṭheuh theih nan YMA branch tinin mahni huam chhungah duty insiamin, mi ṭha leh pawisawi lote rilru tina lo zawnga hawihhàwmna lantir chungin duty neih ni se. YMA kumpuan ‘Ram leh hnam humhalh’ bawhzui zelin mimal, chhungkua leh khawtlang tibuaitute, a bikin ruihhlo khuahkhirhna kawngah theihtawpa hma la turin branch-tinte kan ngen a ni.

– See more at: http://www.vanglaini.org/tualchhung/64544#sthash.vTCNkqVg.dpuf

Facebook Comments

Add a Comment