Posted on

BAWRHSAPIN DAMDAWIIN LEH CHHUNGKAW HARSA HNENAH CHRISTMAS THILPEK HLAN

BAWRHSAPIN DAMDAWIIN LEH CHHUNGKAW HARSA HNENAH CHRISTMAS THILPEK HLAN

Ni 24.12.2016 (Urlawkni) khan Serchhip Bawrhsap Dr Lalrozama IAS chuan Serchhip District Hospitala damlo, damdawiin a Christmas hman ngaia awmten Christmas hlim taka an hman theih nan tanpuina Rs 20000 a pe a, Serchhip khaw chhunga chhungkaw harsa thlan bik pahnih hnenah thilpek a hlan bawk.

Thilpek hlanna hunserh tawi, District Hospital Duty Room-a neihah Dr. Lalrozama chuan, Serchhip a pawl hrang hrang, kohhran leh mimal ten Christmas thilpek an sem chhuak nasa hle a a hriat thu leh a lawm tak zet thu a sawi a.

He hun ropui tak denchhen a midangte tana luanchhuah duh tam tak kan nei hi kan ram tan malsawmna ropui tak a ni, a ti.

Damdawiin tana a thilpek chu beitham viau mah se damloten nuam zawk leh hlim taka Christmas an hmanna tur atan thawktuten lo hmang se a duh thu a sawi a, thilpek hi Medical Superintendent Dr. ZD Lalmuanzova’n thawktute aiawhin a dawng a ni.

He mi hnu hian Dr. Lalrozama hian chhungkaw thlan bik pahnih hnenah Christmas thilpek a hlan zui nghal a, YMA zan duty te thingpui hmeh tur Kurtai Kg 50 YMA Sub-Headquarters President hnenah a hlan nghal bawk.

Bawrhsap in tanpuina hrang hrang a hlanna ah hian MJA Serchhip District President Pu C. Lalhminghlua, YMA Sub-Headquarters President R. Sanghmingthanga leh DIPRO Pu K. Saitluanga ten an tawiawm a ni.

Posted on

“SOCIAL MEDIA HI ZIRNA LEH HNA ZAWN KAWNGA MIN TIBUAITU TUR A NILO” – PARLIAMENTARY SECRETARY PU TT ZOTHANSANGA

“SOCIAL MEDIA HI ZIRNA LEH HNA ZAWN KAWNGA MIN TIBUAITU TUR A NILO” – PARLIAMENTARY SECRETARY PU TT ZOTHANSANGA

Parliamentary Secretary for Tourism, FCS&CA etc. leh Champhai North Bialtu MLA ni bawk Pu TT Zothansanga chuan tun laiin internet, TV leh social media avangin kan buai phah hle thin a; hei hi zirna leh hna an zawnna kawngah min dangtu a ni tur a ni lo, a ti. Heng thu hi vawiina Hnahlan Community Hall-ah Career Awareness Campaign neih naah a sawi a ni a. “Tunlai thalai ten lehkha kan chhiar tlem tawh hle a, engkim hriat vek chu tullo mahse kan chhiar chhun erawh tangkai se, kan hriat chhun hi eizawnna tham ni rawh se,” a ti a ni.

Parliamentary Secretary tunlaiah Sorkar hna a vang telh telh a, Lehkhathiam hna hmulo kan tam telh telh bawk a; Hna sang tak neih tumin national leh state level competitive exam kan bei nasa hle a, a beitu kan tam em avangin thiam viau vek mah ila post in a daih loh avangin tlin vek a theihloh tih chu hria I la, sorkar hna bak hna tha tak tak dang a awm tih erawh hre tel bawk ila a tha, a ti a. Thalai kalkhawmte chu Mizoram chhung chauhva hna zawng lo turin a chah bawk. Tunlaiah hlawhtling turin thiam filawr nih a ngai tawh a. Mi aia zir tam a ngai a, mi thiam tan hna India rama a la tam a ni tiin, mi thiamthei aiin mi taima leh teirei peih mi an hlawhtling tam zawk thu a sawi a. Thalaite zingah kan mi ngaihsan zawngte leh rilru sutthlek dan te her rem a, exam a titha te leh lehkhathiamte ngaihsan a tul thu a sawi a ni.

Posted on

NO VEHICLE ZONE (31.12.2016) CHHUNGA LIRTHEI LEH MIPUI KAL DAN TUR HRIATTIRNA

NO VEHICLE ZONE (31.12.2016) CHHUNGA LIRTHEI LEH MIPUI KAL DAN TUR HRIATTIRNA

Coordination Committee on Traffic Management in a lo rel tawh angin Ni 31 December, 2016 hian Kumthar lawm nana mipui Bazar ke a kal te an him zawk nan “No Vehicle Zone” hman leh tur a ni a. He huna lirthei khuahkhirh dan tur bakah mipui Bazar tur te kal dan tur chu hetiang hi a ni :-

1. Chanmari leh Zodin Square inkarah Dar 10:00 AM atanga tlai Dar 4:00 PM chhungin lirthei eng chi mah, Thirsakawr leh Nawrlirh huamin tlan phal a nilo a. Chanmari leh Zodin Square inkar kawngpui dungah Zing 9:30AM atanga Tlai dar 4:00 PM inkarah motor eng chi mah hun (Park) phal a nilo bawk. Hei hian Hospital Emergency duty bakah natna avanga Damdawiin pante a huam lo ang.

2. Civil Hospital Aizawl atanga chhuak chhimlam pan turte chu Dawrpui Biak In lamah kual lovin Bazar Bungkawnah direct-in a tlan tur a ni.

3. Dawrpui Taxi stand chu Baza Tlang hnuai, AR Mandir Opposite-ah leh AR Quarter Guard hnuaiah hemi hun chhung atan hian sawn a ni.

4. Chanmari leh Power House inkarah lirthei eng chi mah No Vehicle Zone hun chhung hian hun phal a nilo.

5. Chanmari leh Power House inkarah LMV chin hnuai lamte, Passenger la leh drop tur te tan khawizawng pawhin tlan phal a ni a, Power & Electricity Office kawt zawlah kualin Dropping Zone ah Passenger te la leh drop-in Chanmari lamah an let ang.

6. Mipuite Bazar chhunga an kal dan tur pawh hetiang hian ruahmanna siam a ni. Zion Street ah hian a chho zawng chauhin mipuite kal tur a ni a, a chhuk zawng erawh chu Shanghai Bazar (Dr. Rohawka Building) lamah kal tur a mi a, Power House bul atangin Bazar ah luh thlak tur a ni.

Posted on

2015 aiin 2016-ah 30%-in borual a bawlhhlawh

2015 aiin 2016-ah 30%-in borual a bawlhhlawh

Mizoram Pollution Control Board (MPCB) chuan thuchhuah siamin, kum 2016 kumtluanin Mizorama boruak bawlhhlawh dân zir chianna uluk takin an kalpui tih an tarlang a; Aizawlah kum 2015 aiin 2016-ah bawlhhlawh nâwi lêng vêl chawhrualin 30% velin a pung tih an sawi.

MPCB hian boruak bawlhhlawh dân tehna hmun, air monitoring station (AMS) chu Aizawl, Lunglei, Kolasib leh Champhaia hmun 11-ah an bun. Aizawl district-ah chuan Dawrpui, Sikulpuikawn, Bawngkawn, Laipuitlang leh Lêngpui Airport-ah an bun a; Lunglei, Kolasib leh Champhai district-ah chuan hmun pahnih ṭheuhah an bun bawk.

AMS 11 aṭang hian boruak bawlhhlawh dân chawlhkâr khatah ni hnih, ṭum khatah darkar 24 zel khawl hmangin an endik ṭhin a; boruak bawlhhlawh dan chu a tibawlhhlawhtu tehfung chi thum hmangin an endik ṭhin a ni.

MPCB chuan, AMS 11 aṭanga kumtluana result chawhruala a lan dânin, Mizoram boruak, a bikin Aizawlah kum hmasa aiin boruak a bawlhhlawh zual tih tarlangin, “Boruak tibawlhhlawhtu, bawlhhlawh nâwi hrang hrang léng vêl, mihringte’na hîp luh tham leka tê leh hriselna lama harsatna chi hrang hrang min thlen theitu Particulate Matter (PM10) chu Aizawl khawpuiah a sang chak hle,” an ti.

– See more at: http://www.vanglaini.org/tualchhung/65310#sthash.YOskIUS6.dpuf

Posted on

Aizawlah No Vehicle Zone

Aizawlah No Vehicle Zone

Coordination Committee on Traffic Management thutukna angin, vawiin, nak­tuk leh December 31-ahte No Vehicle Zone hman a ni dawn a; chutih laiin, vawiin hi government holiday a la ni lo.

No Vehicle Zone hian Zodin Square leh Chanmari kâwn inkar a huam dawn a, hemi chhungah hian lirthei reng reng chawhma dar 10 aṭanga tlai dar 4 thlengin kal phal a ni dawn lo. Damlo leh mitthi phur lirthei leh ṭul bik thil kal ngai lirtheite  erawh a huam lo ang.

– See more at: http://www.vanglaini.org/tualchhung/65316#sthash.R1Y4wo0z.dpuf

Posted on

CM-in Mizo mipuite tisa leh thlaraua Malsawmna dawng turin a duhsak

CM-in Mizo mipuite tisa leh thlaraua Malsawmna dawng turin a duhsak

Chief minister Lal Thanhawl­a chuan, Krismas leh kum thar lo thleng tur chu Zo hnahthlak zawng zawngte’n tisa leh thlaraua malsawmna an dawnna hun ni thei se a duh thu a sawi.

Chief Minister hian nimin khan thuthar thehdarhtute hmaah Krismas leh kum thar thuchah sawiin, “Krismas lo thleng tur atan Kristian zawng zawngte kan inpuahchah mek a. Lal Isua lo piang tur hi kan hmuah dan inang vek lo mah se, ro thil dang ngaihtuah loin, kan rethei emaw, hausa emaw, Lal Isua’n engkim a ti thei tih hriain he hun lo thleng turah hian a lam i hawi ang u,” a ti.

Khawvelah lal tam tak piang tawh mah se, Lal Isua ang an la piang lo tih sawiin Lal Thanhawla chuan, “Khawvelah hian Pathian nung an la piang ngai lo. Lal Isua chu a pian hma daih aṭangin a pian tur thu zawlneite’n an hrilh lâwk tawh a, a thih tur thlengin sawi lâwk vek a ni,” a ti a; Isua chu a thih hnuah lal dang ang ni loin a ram a zau zel tih a sawi.

– See more at: http://www.vanglaini.org/tualchhung/65315#sthash.RaoxvNIT.dpuf

Posted on

Aizawlah free wifi pek chhuah ṭan a ni

Aizawlah free wifi pek chhuah ṭan a ni

Aizawl Municipal Corporation (AMC)-in Aizawl khawpui chhung hmun ṭhenkhata a thlawn­a internet wifi hman theih tur (free wifi) an rua­hman chu nimin khan Govt. Aizawl College-ah AMC mayor PC Lalhmingthanga’n a tlangzarh. Free wifi hi nimin aṭang khan hman nghal theih a ni.

PC Lalhmingthanga chuan, Aizawla free wifi dah chu AMC in­thlan dawna an manifesto zinga mi a ni tih sawiin, January 2016-a Board of Councillors meeting-ah kum 2016 chhunga peih hman tur­in thu­tlukna an siam tih a sawi a, “September 2016-ah peih hman tur­ah kan inngai a, mahse, technical thil leh tender-ah tihfel theih loh a awm avangin kan tlai a.

– See more at: http://www.vanglaini.org/tualchhung/65319#sthash.Kin7L42D.dpuf

Posted on

Mizo Music Festival zai turte an inpeih tawh

Mizo Music Festival zai turte an inpeih tawh

Decmber 29 leh 30-a Sialsuk Tlanga neih tur Mizo Music Festival-a zai turte an inpeih ta. He festival-ah hian tunlaia Mizorama zaithiam leh band kan neih ṭhat ber berte an che dawn. Chu mai bakah lâm thiam rual­te an kal che ang a, intihsiakna lian tham a awm bawk dawn.

Zaithiam leh band che turte zingah hian LilZo, Thangromawia, Israel Lalbiakrema, Mimi Renthlei, Rosy, J&J, Michael M. Sailo, Tetei Ralte, Ruotmawi, Vanlalhlana, Zoramchhani, Andrew, C. Sanga leh Feli Fanai te an tel. Band-ah hian Dreamhunter, Albatross, Triau Trackx, Reverse Tragedy, The Prophets, Kroashia, Freddys Nightmare te pawh an tel.

– See more at: http://www.vanglaini.org/thalai/65296#sthash.7kTOkrMJ.dpuf

Posted on

Tuialhthei thawn chhuah titawp turin CYMA-in YMA group pali a ngen

Tuialhthei thawn chhuah titawp turin CYMA-in YMA group pali a ngen

Central YMA chuan thu­chhuah siamin, Mizorama petrol pump-te’n tuialhthei an lak luh tawh, black-a zawrh tura Manipur-a thawn chhuah tihtawp a nih theih nan a ṭul anga mahni huam chhung ṭheuha ngawrh zawka hma la turin YMA group pali – Tuiphal group, Khawzawl group, Saitual Group leh Zawlbuk group-te beisei an nih thu a tarang.

CYMA thuchhuah chuan, nimina CYMA office bearer meeting-ah tun hnaia Mizorama petrol/diesel váng ta lutuk chungchang an ngaihtuah tih tarlangin, “Mizoram petrol/diesel-te black-a Manipur lama thawn chhuah a tam thu hriat a ni. Mizo mipuite’n oil-ah harsatna kan neih loh nan CYMA chuan black-a zawrh tur Mizoram petrol/diesel Manipur-a thawn chhuah hi tihtawp a nih theih nan hma a la a ni,” a ti.

CYMA chuan, tuialh­theia harsatna chu Mizoram sorkar pawhin a ṭul anga hma a lak an beisei thu sawiin, “Hetih mek lai hian, Manipur-a Zo hnahthlak unaute’n harsatna an neihte chu Manipur group YMA kaltlangin CYMA chuan a ṭul angin hmalak a tum,” an ti a; tuialhthei leh leh ei leh barah Manipur sorkar­in mamawh a nei a nih chuan Mizoram sorkar pawh mumal takin a be tura an ngaih thu an tarlang bawk.

– See more at: http://www.vanglaini.org/tualchhung/65278#sthash.Wc7Jp3wp.dpuf

Posted on

Mizoram Music Festival Sialsuk Tlangah zaithiam rual

Mizoram Music Festival Sialsuk Tlangah zaithiam rual

Mizoram music history-a band ṭha ber ber –  Albatross, Dream Hunter leh Tribal Power che vel tur en a chakawm rualin tunlaia thawm nei lian bera chhal ngam, LilZo leh Triau Trackx an inlar dawn a, hun rei tak Mizote awi tleitu zaithiam rual an inlan dawn; December 29 & 30-a Sialsuk Tlanga rimawi kutpui turin ngaihven a hlawh ta hle.

Krismas leh Kumthar inkar chawlh lai a nih dawn avângin organiser leh Sialsuk khawtlang lam chuan ‘chhungkuaa kalna tlak’ ngeia he hun hi siam an tum a, Sialsuk khawtlang chuan an khaw tlang mawi tak tlawh turin Mizoram mi zawng zawng an sawm. Sialsuk awmna hi a laili ṭha a, Aizawl aṭangin a hla loin kawng a nuam a, chutiang bawkin Ser­chhip, Thenzawl leh Lunglei bakah khawpui lian dangte aṭang pawhin pan khawm remchang tak a ni.

Zai tur list en hian music chi hrang a kim hle dawn a, puipunnaṭhenkhat anga va zai zawka bo vang vangna chi ni loin, a performer leh mipui tan pawha ‘nuam tham’ turin hun pek an ni ang. Stage pahnih a awm dawn avângin awlsam takin an inchhawk zung zung thei dawn a,  Active Sound lamin light leh sound an buaipui dawn a ni. Ei leh in tuihnai a awm dawn a, naupang infiamna a hranpaa buatsaih a ni bawk.

– See more at: http://www.vanglaini.org/thalai/65260#sthash.VGXZjJ3r.dpuf