Posted on

TUALCHHUNG CHANCHIN THAR – ZONET

TUALCHHUNG CHANCHIN THAR – ZONET

YMA thahnemngaihna avangin ei rawngbawlna Gas dinhmunin ziaawm lam a pan chho mek niin CM, Pu Lal Thanhawla’n Congress Bhavan-a inkhawmah a sawi a, Gas thlen that leh that loh hi Company leh Agent-te inkar a nih avangin sorkar tan thil tih a harsat chin awm mah se, Gas harsatna hi mipui tam tak nghawng a nih miau avangin sorkar chu mipui tana ding tur a nih angin theihtawp a chhuah niin a sawi. YMA-in Mualkhang leh a chhehvelah Gas khawih chingpen thinte nasa takin an vai a, Department pawhin thlawpin, mi engemaw zat man an ni tawh a, pawi khawihtute hrem chu Court lam thuneihna a nih tawh avangin sorkar-in tih theih a nei tawh lo niin Pu Lal Thanhawla chuan a sawi a. Gas phur tur hian Licence chi hrang hrang neih a ngaih avangin a duh duh tan phurh mai theih a ni lo tih sawiin, sorkar pawhin a phurh ve theih dan tur ngaihtuah mek a nih thu  Pu Lal Thanhawla chuan, tun hnaia Dawrpui Vengthar Local Council By Election-a MNF a chak chu awm a tih thu sawiin, he By Election neih tulna chhan, Local Council Member boral ta, Pu R. Zoramthanga unaupa chu MNF candidate a nih avangin thlan tlin chu Mizo danah thil awm tak a nih thu sawiin, MLA pakhat-in MPC hruaitu pakhat pawisa pe a, thawk dun anga a lantir erawh chu thil tenawm tak nia a hriat thu a sawi. Pu Lal Thanhawla chuan, Mizo thalaiten an thawh theih reng an thawh duh loh leh peih loh avangin hnathawk tur hnam dang, mikhual nuai 2 velin Mizoram an chen chilh mek nia sawiin, hemi titawp tur hian sorkarin theihtawp a chhuah mek niin a sawi a. Tunah hian Skill Development lama tan lak nan Mistiri Training pawh buatsaih chhoh mek a ni, a ti. Mizoram pawna cheng, Zo hnahthlak hnam peng hrang hrangin Mizoram chu an thlahlel hle niin CM chuan a sawi a, an Jerusalem ang hiala an ngaih avangin a chhunga chengte hian rilru zau tak put a, innghahna tlak ni thei tura kuah khawm thiam a tul thu a sawi bawk.  He inkhawm hi MPCC General Secretary, Pu C. Lalpianthanga’n a kaihruai a ni. 

————–

Sorkar laipuia Home Ministry hriattirna chhuah danin, Bay of Bengal-a Cyclone inmun mek avangin naktuk, Inrinni leh Pathianni-ah Mizoram, Manipur leh Tripura tuamin ruah nasa taka sur thei a ni a, he thuchhuah bawhzui hian Aizawl District Magistrate chuan mipuite chu fimkhur tur leh khaw awm dan chik taka thlir reng turin a chah a, ruah sur nasa avanga chhiatna thleng thei laka him nan tuilian thut thei lakah te, leimin thei lakah te leh ruahsur nasa kaihhnawiha chhiatna dang thleng thei laka inveng turin mipuite a chah a ni.
————–

Mara Thyu Tlipy General Conference vawi 30-na chu tun thla ni 1 atanga nimin thleng khan Laki-ah hman a ni. A hmanna inkhawm hi V Hlychho Opi Pandal-ah neih a ni a,  mi 3,000 leh 3,500 inkar an tel a ni. Nilaini leh nimin khan MTP President, Pu T Chatlua kaihhruaiin rorel a ni a, an thuchhuak zinga langsar deuh deuhte chu, Lawngtlai District pal tlang lova Lunglei District-a luh nghalna tur kawngpui, Siaha District-a Romibawk atanga Lunglei District-a Mamte kal tlanga siam rawtna te, Siaha  District-a hnam dang sumdawn phalna, Trade License neite tihtawpsak tura thuneitute ngen rawtna leh Mara tawng humhalha tihhmasawn rawtna te a ni a, hemi bakah hian kum 2016-2017 chhunga tana MTP Budget atan cheng nuai 22 pawm a ni bawk. MTP Conference-ah hian kum 2016 atanga 2019 thlenga an hruaitu turte thlan a ni a, chungte chu President-ah Pu PP Zalena, Sr. Vice President-ah Pu Martin L Nohro, Vice President-ah Pu L Beirangia, General Secretary-ah Pu C Siatha, Treasurer-ah Pu Vapodi leh Asst. General Secretary-ah Pu Pakho Chozah-te an ni. MTP General Conference-a khuallian, Siaha bialtu MLA, Dr.K Beichhua chuan nimin khan Pandal-a inkhawmah thusawiin, MTP thil tum, ‘Tanpui Ngaite Tanpui Kawngah Rilru Hmun khatin’ tih chu tihhlawhtlin a nih theih nan MTP member-te chu mi dangte tanpui thei tura intodelh tum ngei turin a fuih a, thawh hreh nei lo turin a chah bawk. Mizoram-a politics dinhmun sawiin Dr. K Beichhua chuan, Party Politics avangin ram leh mipuite hmasawnna leh hamthatna ngaihthahin a awm niin a sawi a, ram leh mipuiten a taka hma an sawn theih nan inthlan hunah mi tha leh ram siam tumtute roreltu atan thlan a tul thu a sawi. Zu chungchangah Dr K Beichhua chuan sorkar-in zu a thlah zalen avangin mi tam takin an in a, zu in avangin insum theih lohna a awm a, chu chuan HIV/AIDS nasa takin a tidarh niin a sawi bawk. MTP General Conference-ah hian Central YMA atangin Finance Secretary Pu Lalrochuanga Pachuau leh Central YLA aiawh an tel a, thuchah an sawi bawk a ni. Tun tuma MTP General Conference-ah hian Mara Miss 2016 thlan a ni a, Tuipang Dairy veng MTP Branch-a mi, Gospel Khithi chu Mara Miss atan thlan a ni.
—————

Joint Electricity Regulatory Commission for Manipur & Mizoram (JERC) in Pre-payment Metering System chungchang seminar vawiin khan I&PR Conference Hall ah an buatsaih a, a hmanpuitu, Chief Secretary Pu Lalmalsawma chuan, Pre-payment Metering System chu hman theih a nih chuan bill pek tlai leh khawn chhung rei lutuk avanga sorkar sum bawma lut tur lut tlai lutuk thin chu a pumpelh theih dawn niin a sawi a, kawlphetha ‘load’ sem zai kawngah pawh hmasawnna a thlen thei dawn nia a hriat thu te, mipui pawhin kawlpetha an hman zat chiah an chawi dawn avangin bill siam sual avanga buaipui zui ngai te pawh a awm tawh loh tur thu leh, chhungkaw tinin an kawlphetha mamawh zat an hriat chian phah theih tur thu a sawi. He Seminar hi JERC Chairmanm Pu R.K. Kishore Singh-a’n a kaihruai a, Pre-payment Metering System atana JERC in a thawhpui company, Secure Meters Limited aiawhten Pre-payment Metering System chungchang an sawifiah bakah zawhna leh chhanna hun hman a ni bawk. Pre-payment Metering System hman a nih hunah chuan thla tawpa bill pek ngai kher lovin Pre-paid meter a ‘top-up’ thun zat milin electric hman a ni dawn a. Pre-paid mobile phone ang chiahin top-up pawisa a zawh chuan electric hman thei a ni dawn lova, sum neihin a tlin ang zelin kawlphetha hman theih a ni ang a, top-up thun a zawh hun apiangin a thara thun leh zel a ngai tawh dawn niin an sawi. Contracted load aia sang current a hman theih dawn loh avangin, meter reading la tur emaw bill, pe lote current tihtawpsak emaw tihnun sak emaw turin P&E Department mi intirh kher a ngai tawh dawn lova, hei hian Department sum hloh leh hman a titlem thei dawn tih an sawi a, Pre-payment Metering System hmang turin Pre-paid meter vuah a ngai dawn tih an sawi bakah Consumer-te awlsam zawk nan top-up, recharge theihna tur hmun bik, hmun hrang hrangah siam a nih tur thu leh a tahtawlin Debit, Credit Card, Net Banking hmanga ATM Counter-a tih theih turin ruahman a ni dawn niin an sawi bawk.
————–

Tripura Bru Relief Camp atanga Mizoram mi lak let tur enfiah chhunzawm zelah Kaskau Camp atangin vawiin thleng khan chhungkaw 482 atangin lak let theih mi 2,669 enfiah tawh a ni a, an zinga mi 115 chu Kolasib District a mi an ni. Enfiahtu Team lam atanga thu dawn danin, Kaskau Cap-ah hian Mizoram-a lak kir turte hi vawiin khan en fiah zawh hman a nih loh avangin naktukah chhunzawm a ni ang. Kaskau Camp dinhmun hi en fiah zawh a nih hnu, tun thla 7, Thawhtanni atangin Khakchangpara Camp-a mite endik an ni ang.
—————-

Forests Minister, Pu Lalrinmawia Ralte-in ram ngaw leh nungcha behchhana khualzin hip dan ngaihtuah a ni dawn niin vawiina Congress Bhavan-a inkhawmah a sawi a, Mizoram hi ram chhunga Eco Tourism tih theihna hmun tha ber nia sawiin, state dangah chuan ram ngaw awm mah se, ramsa leh nungcha dang a awm lova, lui awm mah se, sangha leh thil dang a awm thin loh avangin khualzin a hip thin lova, Mizoramah chuan hetiang hi a awm kim vek avangin khualzin hip thei turin Mizoram Eco-tourism Policy pawh duan a ni tawh niin a sawi. Pu Lalrinmawia Ralte chuan, Supreme Court thupek angin kum 20 chhung zet thing kih phal a nih loh avangin thing leh mau behchhana Industry din kawngah mipuiten harsatna an tawk a, hei hi tun hnaiah Supreme Court vekin thiat a, Wood Based Industries (Establishment & Regulation) Guidelines, 2016 a siam tak avangin chak zawka hmasawn theih beisei a nih thu a sawi a. Tun hmaa thing leh mau sawngbawlna lama sorkar laipuiin thuneihna pumhlum a neih thin chu dan tharah chuan state sorkar thuneihna a ni tawh dawn niin a sawi bawk.

Labour, Employment & Industrial Training Minister ni bawk, Pu Lalrinmawia Ralte chuan, Congress Party-in kum 2013 inthlana an Party Manifesto-a a telh angin Skilled Development lamah pawh tan lak mek niin a sawi a. Skill Fest-a training tura inziak lut zinga mi 3,200 chuang training tir an ni tawh a, Training chhuak zingah hna hmu lo an awm mang lo niin a sawi. Minister chuan,  sorkar kum kal mek chhungin Army-ah thalai 125, Navy-ah 17 leh Airforce-ah mi 11 an lut tawh tih sawiin, DoNER Ministry atangin Skill Development Training buatsaihna tur cheng nuai 251 dawn a ni tawh tih a sawi bawk.
—————

Mizoram Departmental Officers’ Association-in vawiin khan an member kaisangte lawmpuina a hlan. School Education Department Conference Hall-a inkhawmah an pawl President Pu Lalchuailova chuan, Mizoram sorkar-in an member-te tana kaisanna tha a siamsak thin chu lawmawm a tih thu a sawi a, an la kaisanna zel turah pawh Service dangte nen inkhairual thei ang bera tih ni se an duh thu a sawi. Mizoram Departmental Officers’ Association-n an member kaisang, lawmpuina a pekte chu – Commerce and Industry Addl. Director Pu C. Lalbiakthanga, Commerce and Industry Jt. Director, Pi R. Lalrodingi, Fisheries Jt. Director, Pu Satya Prakash Singh, Social Welfare Jt. Director, Dr. Lalnunthara leh Pi Laldikkimi, Labour, Employment & Industrial Training Dy. Labour Commissioner, Pu Lalmalsawma, School Education Jt. Director, Pu ST Zaduna leh SCERT Jt. Director, Pi D. Ramdinthangi-te an ni.
—————-

Nimin khan Sihphir Youth Club chuan Holy Angels’ Auditorium, Sihphir Venghlunah Career Awareness Programme an buatsaih rualin, zirlai tithate leh eizawnnaa hlawhtlingte an chawimawi a, Tuikum bialtu MLA, Pu Lalrinawma’n hmanpuiin, hlawhtling tur chuan tumruhna leh dawhtheihna te, mahni inhriat chian te a pawimawh thu leh, mahni kawng zawh tur leh  subject zir tur pawh ngaihtuah ngun a ngai tul thu a sawi bawk. Thusawitu dang, Vanglaini Editor, Pu K. Sapdanga chuan, hahdam taka thawh a, tam tak hlawh thiam tura inzirtirna-in Mizoram mipui rilru a ei chhe mek tih sawiin, he hri hlauhawm tak hi do hneh turin thalaite leh zirlaite a fuih a, thawhrimna chu hlawhtlinna chabi a nih thu sawiin, hei pawh hi rinawmna nen lo chuan a tlo thei lo tih a sawi. He inkhawm hi Sihphir Youth Club Joint Secretary, H. Lalbiaktluanga’n a kaihruai a, Labour Welfare Board Assistant Commissioner, Francis Lianmawia pawhin thu a sawi a ni.
———–

Tuichangral zirlai Pawl General Assembly vawi 8-na chu nimin leh vawiin khan Leng khuaa Saihnuna Hall-ah neih a ni a. AH & Vety Minister, Pu C. Ngunlianchunga leh Mizoram State Women Commission Chairperson, Vanlalawmpuii Chawngthu-in an hmanpui a, zirlaite hnenah thuchah an sawi a ni. Tuichangral Zirlai Pawl General Assembly hi kum tin neih thin a ni a, Aizawl leh Tuichangral huam chhung khua-ah a inchhawka neih thin a ni. Kumin General Assembly-ah hian Tuichangral huam chhunga khaw 13 atangin zirlai 300 chuang an kal khawm a ni.
———

Central YMA-in  Tribal ni loten Tribal Certificate an neih tawh lohna turin, a pe chhuaktute chu fimkhur leh zual turin a ngen. A thuchhuahah Central YMA chuan, Tribal ni loten Tribal Certificate an nei thin chu thil tha lo tak a nih avangin, hetiang mite hnena Tribal Certificate pek chhuahte pawh sut leh tur leh pek chhuah a nih tawh loh nan sorkar  pawh vawi tam tak a lo ngen tawh thu a sawi a. Aizawl DC leh Serchhip DC Office atangin Tribal ni lo mi pahnih, Tribal Certificate pek chhuah nia chanchinbu a lo lang chu tha an tih loh thu sawiin, Home Department-in an Tribal Certificate tihtawpsak a, a hnawl chu lawmawm an tih thu an sawi bawk.
————–

MNF Vice President, Dr. R. Lalthangliana’n Mizorama Congress sorkarah mipui nunphung leh rethei zawkte khawsak a hahthlak hle niin a sawi a, nitin khawsakna aiin zu a hnianghnar zawk niin nimina Serlui Block MNF Political training, Buhchangphai Community Hall-a a hmanpuinaah a sawi. Dr. R. Lalthangliana chuan, an party-in thuneihna a chan ruala Minister ten hna an thawh theih nghalna tur ruahman a ni tawh nia sawiin, kut hnathawktuten eizawnna ngelnghet zawk an neih theih dan tur formula pawh an hmu chhuak tawh niin a sawi a, ‘economic policy pawh tlangzarh theih mai tura peih thawkhat tawh niin a sawi.  He training hi MNF Serlui South Block President, Pu Lalrinthara Vankeu-in a kaihruai a ni.
———

Aizawla Mamit Welfare Committee-in Aizawl Hunthar venga lei tlahniam avanga harsatna tawkte tanpui nan vawiin khan nan Rs. 21,200 an hlan. Hemi puala inkhawm tawi buatsaihah Mamit Welfare Chairman, Pu HB Lianmunga chuan, Mamit Sub Headquarters YMA bul tumin Mamit khaw chhungah pawh tanpuina hi an khawn mek niin a sawi. He tanpuina hi Hunthar veng Local Council Chairman, Pu Lalhmangaiha Renthleiin a dawng a, Mamit Welfare hruaitute leh Hunthar veng Local Council member-te an tel a ni.
———–

Aizawl District-a Krismas leh Kumthar boruak tha leh nuam tak hnuaia hman a nih theih nan Aizawl District Magistrate chuan Cr.PC  Section 144 tlawhchhanin Halpuah leh Halmawi lak luh, zawrh leh hman a khap. Hemi rual hian naupang silai lem, a mu kap chhuak thei chi lak luh, zawrh leh hman a khap bawk. He khapna, thupek vawiina chhuah hi thla 2 chhung hman tur a ni.
————

Parl. Secretary, Pu Hmingdailova Khiangte-in nimin khan Zanlawn leh Lungdai tlawhin Zanlawna RMSA hnuaia Secondary School thar a tlawh a,  zirtirtute leh khawtlang hruaitute kawmin sikul chungchanga thil pawimawhte a sawipui bakah, school panna kawng siam that dan tur an ruahman a ni. He School-ah hian zirtirtu 6 leh zirlai 38 an awm a ni. Pu Hmingdailova hian Zanlawn Primary School pawh a tlawh a, he School-ah hian zirtirtu 3-in naupang 152 an enkawl mek a ni. Pu Hmingdailova Khiangte hian Lungdai Khelmual leh Thlanmual panna kawng, meter 400 vela thui MLA Fund atanga siam that mek pawh a en nghal a, Kawnpui SDO (Civil) Pu Lalhmingliana leh khawtlang hruaituten an tawiawm a ni.
————–

Haulawng khuain an khaw kum za tlin an lawmna chu nizan khan zawh fel a ni ta a, nimin khan khawtlang huapin Centenary ruai theh a ni. Nizana Pandal-a inkhawm hnuhnung berah an khaw chhuak pahnih, IAS Officer hlui, Pu SL Sailo-a leh Aizawl Traffic SP, Pu C. Lalthanmawia’n thu an sawi a, hun harsa zawka lehkha an zir thin dan leh harsatna tam tak pal tlanga hlawhtlinna an neih dan sawiin, tuna he khaw mipuite leh zirlaite chu hmasawn zel tura tan la thar turin an fuih a ni. He inkhawm, Organising Committee Asst. Secy, Pu Vanlalruala kaihhruaiah hian Pu RK Lianzuala pawhin thu sawiin, Haulawng khaw mipuite chu Aizawl leh Lunglei inkar kawngpui lun taka awm an nih avanga nunphung leh kawng tinrenga hmasawn tum turin a chah a, hmasawnna chu chhiatpui theih a nih thu sawiin, Haulawng khua chu a tha zawnga chhinchhiahna langsar, mi tin hriat neih tum turin a fuih bawk. Haulawng khaw kum za tlinna lawmna hi a hmain Minister pahnih – Pu Zodintluanga leh Pu PC Lalthanliana pawhin an hmanpui a, zaithiamte an zai bawk.
—————

Vawiin khan Aizawl-ah khaw lum lai berin Celsius Degree 23.9 a ni a, a vawh lai berin Celsius Degree 12.2 a ni.
————

Naktuk, Inrinni-ah chuan khaw lum lai berin Celsius Degree 25 vel, a vawh ber laiin Celsius Degree 12 vel a nih rin a ni. Zing dar 5:27-ah ni a chhuak ang a, tlai dar 4:41-ah a tla leh ang.

Facebook Comments
Leave a Reply