Posted on

Taksa sawizawi

Taksa sawizawi

Hausa tur chuan taimak/thawhrim a ngai a, mi hrisello chuan hna an thawk thei lo. Hrisel turin ei leh in mai bakah taksa sawizawi a pawimawh. Mi kan changkang tawh a, taksa hriselna kan ngai pawimawh a. Tun hma lama milian leh hausate zinga rei tak tak mu thin te pawhin insawizawi a that zia hriain zingah exercise an la thin. Ei leh in lamah pawh thau/mawm, thlum leh taksa ngeihloh chi kan hrechho thar zel a, vawi khata ei teuh chu taksa in a ngeihlo a ni tih hriain ei leh in kawngah pawh ‘balance diet’ chuan Mizote nunah thuk takin zung a kaih ta.

Aizawl khawpui ah pawh tuktin mi engemaw zat insawizawi hmuh tur an awm a, an zingah hian zunthlum, BP sang leh Doctor ten insawizawi tura an tih engemaw zat awm mahse a tam zawk hi chu hriselna ngaih pawimawh vanga insawizawi thin an ni. Thalai zingah hriselna hlutzia hria a insawizawi thahnem tak an awm laiin nu leh pa, kum lama upa deuh ho pawh mi engemaw zat chu tuk tin deuhthaw Aizawl khawpui ah hian taksa sawizawi an la awm. Heng mite hian hriselna leh hlimna an hlawkchhuak thin a lo ni.

Doctor pakhat chuan Aizawl khawpui ah kea kalte tan leh insawizawina tur atan kawng a zim lutuk chu a vei hle tih a sawi a. “Lirthei kalna atan hmun kan kian zau lutuk a, a pawimawh zawk mipuite hian kea kalna tur hi kan nei zim lutuk a. Kan neih chhunah mi thenkhat ten hmanrua te an dah bakah kawngsira inpho/inzuar thin ten remchang ah an lo hmang ve zel hi a diklo ka ti a, thuneitute hian hma la thei se ka duh hle a ni,” a ti.

Zinga kal thin Mawia chuan kum engemaw zat tuk tin deuhthaw zingkarah a insawizawi thin tih sawiin a hlawkpui hle niin a sawi a. A experience sawiin, “Kumtin hi thlasik dawn, zing boruak nawmlai hian kea kal hi kan pung hluai thin a, mahse Krismas a zawh meuh hi chuan kan thawl leh hle zel hi mak ka ti a. Kum tluan hian ti peih ta ila chuan kan hrisel phah lehzual ngei ka beisei a ni,” a ti a. Mizote mizia pakhat ‘Phur changa thil ti hluai mai’ kan nihna a phochhuak chiang hle nia a ngaih thu a sawi bawk.

Zing kara exer la thin Zauvi chuan tuk tin kalchhuak theilo mahse a theih phawt chuan a chhuah ziah thu a sawi a. A bikin thlasik laia kalchhuah chu a peihawmlo hle nia sawiin tih hram hram a tum vanga vawiin ni thleng a ni tiin tuk khat a thulh chuan a tuk zelah thatchhiatna a thlen thin niin a sawi. Zauvi chuan zing karah khualzin phur motor ‘sumo’ leh bungraw phur motor te an chet chhuah hma thin avangin duh angin boruak a thianghlim tawklo nia an hriat thu a sawi a. “Khawpui hmun thenkhata park leh taksa sawizawina hmun an siam ang leh lirthei kal phallohna ang chi hi Aizawl ah hian siam theih nise tih hi ka awt thei khawp mai,” tiin a sawi bawk.

www.mizobaptist.org

Posted on

LAWNGTLAIAH STATE LEVEL SCIENCE EXHIBITION NEIH A NI

LAWNGTLAIAH STATE LEVEL SCIENCE EXHIBITION NEIH A NI

He exhibition hi LADC-a Executive Member i/c Education Pu Laltlawmlova Chinzah chuan a hawng a. Lawngtlaia state pum huap exhibition buatsaih a ni chu lawmawm a tih thu sawiin, chu chuan zirlaiteah hmasawnna leh tumruhna nasa tak a pek belh ngei a beisei thu a sawi a. Thiamna tak tak nei turin a bu chhiara vawn ringawt a tawk tawh lo tiin, kan thil thiamte hman tangkaina tur hriat chu thiamna tak tak lan chhuahna zawk a nih thu a sawi. Pu Laltlawmlova Chinzah hian zirlaite model pho chhuahte chu a en kual nghal bawk.

A kharna inkhawmah Lawngtlai DRDA Project Director Pu H.Dolianbuaia chu Khuallian a ni a. Exhibition-a tel zirlaite’n an thiam thil pho chhuahna remchang an nei chu vannei a tih thu sawiin, hma lam pan zel turin duhsakna a hlan a. Hlawhtling tura kawng tha ber chu taima taka lehkha zir a nih thu sawiin, harsatna tam tak pal tlanga lehkha zir chuan a tawpah rah duhawm zawk a chhuah ngei ngei thin, a ti. Pu H.Dolianbuaia chuan zirlaite chu an thiamna leh theihna tipung zel turin a fuih a. Exhibition lawmman a sem nghal bawk.

He exhibition hian a tum chu, thangtharte rilrua science hlutna tuh a, an hriatna te chher hriam a, ram hmasawn nana ngaihtuahna seng tura fuih leh an thiamnate chhawr tangkaitir a ni.

He exhibition-ah hian Mizoram chhung district hrang hranga sikul 30 vel atangin zirlai 90 vel an tel a. He’ng zirlaite hian thupui paruk awm zinga an duh ber pakhat hmanga model an siam chu an pho chhuak a ni. Thupui then tinah hian lawmman pakhatna atanga pathumna thleng siam a nih bakah, participation prize siam a ni bawk a. Zirtirtu ti tha (best guide teacher) panga thlan chhuah an ni bawk. Thupui then tina a ti tha zual pathumte atang hian National Level Science Exhibition-a tel tur la thlan chhuah leh tur a ni.

source – dipr.mizoram.gov.in

Posted on

Khawthlir – Vanglaini

C Rokhuma vui

November 23, 2016 chawhma dar 11:30-a thi, C Rokhuma (100), Mission Vengthlang chu nimin khan vui a ni. Padma shree dawngtu C Rokhuma hi an ina thlah a nih hnuah, kohhran upa a nih angin, chawhnu dar 2-ah Mission Vengthlang Presbyterian Kohhran biak-inah vui a ni.

MLA hluite sûn

Former Legislature Association of Mizoram (FLAM) chuan nimin khan an pisaah kumin atana ṭhutkhawm hnu­hnung an nei a; kumina an member thite- Assembly deputy speaker hlui LP Thangzika, Lalthangliani Sailo leh minister hlui J Lalthangliana te sûnna hun an hmang.

Vaikhawtlangah MST bus enchhin

Transport department chuan November 28, 2016 khian Kawlbem kaltlangin Vaikhaw­tlangah MST bus a tlantir chhin dawn. MST tlantir tur hi enchhina a nih angin, tlan chhunzawmtir a nih dawn leh dawn loh chu an la ngaihtuah ṭha leh ang

Posted on

Andrew-a music video Vawiin aṭangin YouTube-ah

Andrew-a music video Vawiin aṭangin YouTube-ah

‘Nunna Thar’ hla nen Ṭhazual chart-ah a lang mek a, Andrew hian hei hi duh tawk mai loin, Krismas hla, a hmaa lyrical video-a a lo tihchhuah tawh chu music video pangngai zawka siamin, vawiin aṭangin a video hi YouTube-ah a dah chhuak ang. Andrew-a music video thar hi ‘December’ a ni a, tun kar khan a audio version chu Mizo Store-ah a dah chhuak tawh a, a video hi vawiinah kan hmu ve thung ang. Andrew-a hian a hla thar hi nizan khan Pathian hnenah a hlan tawh bawk.

Andrew chuan YouTube-a a dah chhan a sawi a, “Krismas hla a ni a, Krismas season chhung hi music lam aṭanga thlir chuan a rei lo hle. Chuvang chuan mi tam zawkin an hmuh a, an ngaihthlak theih nan YouTube-ah hian ka dah a ni,” a ti. ‘December’ music video hi RZA Bawitlung, Kolasib kut­chhuak a ni.

– See more at: http://www.vanglaini.org/thalai/64025#sthash.mTTPms1A.dpuf

Posted on

Hnam lâm thiam ber – Ramthar North YMA

Hnam lâm thiam ber – Ramthar North YMA

Art & Culture department leh Central YMA-in Lammuala ni hnih awh hnam lâm intihsiakna, 12th Chief Minister’s Running Trophy in YMA Cultural Dance Competition 2016 chu nimin khan khar a ni a, chief minister Lal Thanhawla’n lawmmante a sem. Lâm pathuma tiṭha ber chu Ramthar North Branch YMA an ni.

Khârna inkhawmah CM Lal Than­hawla chuan, mahni hnam nunphung leh ziarângte chu zahpui leh ṭhansan chi a ni lo tih sawiin, “Kan changkan ang zelin kan culture-te hi kan ngaisangin kan chhawm nung zel tur a ni,” a ti.

YMA chu Zo nun ze mawi tung dingtu leh chawisangtu, ṭhalaite kaihruaitu a ni tih sawiin, “Kan hnam a tlukchhiat loh nan theihtawp chhuaha kan ṭan tlan a ngai a, hemi kawngah hian ṭhalai kaihruaitu leh sorkar pawh thurâwn pe a, kawng engkima thawhpuitu YMA hi an pawimawh em em a ni,” a ti.

Chief Minister chuan, khawtlang nun siamṭhatna leh ram leh hnam siamna kawngah ram leilung fa zingah bâng thei an awm lo tih sawiin, “Kan zavaia mawh a ni a, a chhiat leh a ṭhatah mawh kan phur vek a, YMA hmalakna tichak turin YMA branch tinte an pawimawh,” a ti.

Ṭanrual chu chakna a ni tih sawiin, “Kan zavaia kan ṭanrual chuan hnam zahawm leh hnam ropui kan ni thei,” a ti a; Mizo hnam ziarángte chhawm nung a, chawi vul a, siam ṭhat ngai laite siamṭha a kal turin YMA member-te a chah.

– See more at: http://www.vanglaini.org/tualchhung/64052#sthash.MqzNgT9K.dpuf

Posted on

Mizorama HIV hrik pâi mi 13,040 an awm Thla 7 chhungin HIV+ve 1,666-in an pung

Mizorama HIV hrik pâi mi 13,040 an awm Thla 7 chhungin HIV+ve 1,666-in an pung

Mizoramah kum 1990-a HIV hrik pai hmuh a nih aṭanga kumin June thla tawp thleng khan thisen endik tawh mi 5,54,644 zinga mi 13,040-in HIV hrik an pai tih hmuhchhuah a ni tawh a; AIDS vangin mi 1,313 an thi tawh. Thla sarih (April-October 2016) chhungin HIV hrik pai hmuhchhuah mi 1,666-in an pung.

Mizoram State AIDS Control Society (MSACS) report hnuhnung ber, June 2016 thlenga Mizoram dinhmun an tarlana a lan danin, thisen endik tawh mi 5,54,644 zinga mi 1,89,177 chu nu naupai thisen endiksak an ni a, nu nau pai zinga mi 1,272 chuan HIV hrik an pai tih hmuh chhuah a ni. Thisen endik dang zawng mi 3,65,467 chu general client an tihte an ni a, chu’ng zinga mi 11,768 chuan HIV hrik an pai.

Thisen endik tawh zat mi 5,54,644 aṭanga chhûtin, HIV hrik pai hmuh chhuah zat hi 2.35% a ni a; kum 2011 chhiarpuia Mizorama mihring awm zat 1,097,206 aṭanga chhûtin 1.19% a ni thung.

HIV/AIDS vangin June 2016 thlengin Mizoramah mi 1,313 an thi tawh a, chung zinga mi 833 chu mipa niin, mi 451 chu hmeichhia an ni a, mi 29 chu naupang an ni.

MSACS chhinchhiah danin, general client (nu nau pai tel loin) HIV hrik pai mi 11,768 zinga 7,451 chu mipa an ni a, mi 4,317 chu hmeichhia an ni. HIV hrik pai hmuh tawh mi 13,040 zinga 7,451 chu mipa an ni a, 8,091 (68.75%) chu mipat hmeichhiatna aṭanga kai an ni a, mipa 4,537 leh hmeichhia 3,554 an ni.

– See more at: http://www.vanglaini.org/tualchhung/64053#sthash.ZaUgeQKk.dpuf

Posted on

Mipui him nan Traffic SP-in thu a chhuah

Mipui him nan Traffic SP-in thu a chhuah

Traffic SP C Lalthanmawia chuan thu­chhuah siamin, Krismas leh kumthar vuakvêtah mipui leh lirthei khalh­tute an him zawk nan hriattirna a chhuah a, “Mipui leh lirthei khaltute’n ṭha taka zâwm turin Aizawl City Traffic Police chuan a ngen a, dan bawhchhia man an awm chuan dan angin hremna lekkawh a ni ang,” a ti.

Traffic SP thuchhuah

1.MV Act Section 178-in a phût angin passenger phur chi lirtheiah passenger-te’n ticket an nei ngei tur a ni a, ticket nei loa chuang chu Rs. 500 chawitir theih a ni. Counter nghaktute’n passenger-te ticket an pe ngei tur a ni a, passenger list copy hnih a siam ang a, duplicate copy driver an kentir tur a ni.

2.Passenger phur lirtheite’n seat capacity aia tam an phur thei lo a, lirthei hnung, hma, chung leh hnuaia lawr thui lutukin bungrua an phur tur a ni lo. Passenger phur chi lirtheiah bungrua phurh khap a nih ang bawkin, bungraw phur chi lirthei (goods carrier)-in passenger a phurh khap a ni. Dan phal bakin passenger phur chi lirtheiin bungrua an phur tur a ni lo. Dan bawhchhiate chu MV Act Section 194 hmangin Rs. 2,000 thleng chawitir theih a ni.

3.Rûi chunga lirthei khalh hi dan khap a ni a, MV Act Section 185 hmanga na taka hrem theih niin, driving license tihtawpsak thlenga hrem theih a ni. Lirthei khaltute’n rûi chungin an khalh tur a ni lo. Rûi chunga lirthei khalh hriatte chuan Traffic Police Control Room phone number 0389-2322307-ah hiattir ṭhin tur a ni. Lirthei khalh chunga mobile phone hman leh meizûk a khap a ni.

4.Lirthei khalhtu chu eng lai pawhin zahawm takin a inthuam tur a ni a, passenger phur lirthei khalhtute phei chu an inthuamna uluk zawka enfiahsak ṭhin an ni ang.

5.Aizawl kawngpui sira lirthei tlân leh mipui kêa kalte dîpdâl theia lirthei chhia dahte chuan December 12, 2016 hma ngeiin an senghawi vek tur a ni.

6.Aizawlah darkar khata km. 30 aia chakin lirthei tlân phal a ni lo a, hei aia chaka lirthei khalhte chu MV Act Section 183 hmanga hrem theih niin, Rs. 400-1,000/ thleng chawitir theih an ni.

7.Lirthei, a bikin two wheeler-a proton vuah phal a ni lo a, hetiang vuah lui mi dang tana bengchheng siamte chu MV Act Section 190(2) hmangin Rs. 1,000 – Rs. 2,000 thleng chawitir theih a ni.

8.Lirthei neitu/khalhtu reng rengin mahni lirtheiah anmahni biak pawh theih ngeina tur phone number lirthei windshield/dashboard-ah dah turin kan inngen a. Hei hi emergency-a lirthei neitu/khalhtu awlsam zawka biak nana tih a ni.

9.Zebra crossing hi kea kalte tana siam a nih angin, traffic jam laiin lirthei khalhtute’n zebra crossing hliahin lirthei an tiding tur a ni lo. Kawng kân duh, zebra crossing-a awm an awmin lirthei khalhtute’n kawng kân turte an ngaichâng ṭhin tur a ni.

– See more at: http://www.vanglaini.org/tualchhung/64057#sthash.QmxJPMrL.dpuf

Posted on

Jeho-a’n silver medal a la

Jeho-a’n silver medal a la

Jeho Himnakulhpuingheta chuan 11Even Sports TTFI National Ranking Table Tennis Championship, 2016 khelh zawh taka Sub Junior categoty-ah silver medal a la. Mizo naupang dang Alberto Lalremruata chuan bronze a la ve bawk.

Inrinni zan khan R. Dengṭhuama Indoor Stadium, Mualpuiah final hi khelh niin Mizo naupang beiseiawm Jeho-a hian inkhel bul a ṭan fuh tawk lo. Yashansh Malik lakah game hmasa pahnih chu 11-7, 11-9 in a hloh. Lunglei Salem Veng naupang Jeho-a hian a defensive game hmuhnawm lantirin game hnih la ve mah se 4-2 in an chak lo.

Semifinal-ah Jeho-a hian Delhi naupang Payas Jain chu 4-1 in a sawp a, inkhel dangah Alberto erawh champion zui ta Malik lakah hian 4-3 in a chak lo thung. Mizo naupang pahnih Jeho leh Alberto te hi tum ṭumah hian an inzir mekna Petroleum Sports Promotion Board (PSPB) hminga khel an ni.

– See more at: http://www.vanglaini.org/infiamna/63793#sthash.mEDWA95M.dpuf

Posted on

AMC-in khawpui dang tih dan ṭhate Aizawla tih ve dan tur zawn an tum

AMC-in khawpui dang tih dan ṭhate Aizawla tih ve dan tur zawn an tum

Aizawl Municipal Corporation (AMC) councillor-te chuan, tun hnaia India rama khawpui hrang hrang inrêlbâwl dan zir chianga an kalnaa an thil hmuh, Aizawl khawpui tana tih ve atana ṭha an tihte chu bawhzui an tum thu an sawi.

AMC councillor 12-te leh official pathumte chuan November 1-12, 2016 chhung khan Delhi, Shimla, Chandigarh, Deh­radun, Musoorie leh Jaipur-te an tlawh a; khawpui sorkar inrelbawl dan leh inenkawl dante an zir.

Tour-a AMC counci­llor kalte chu – deputy mayor Lalringliana, Zonunsangi Fanai, B Lalawmpuii, K Lalhmingliani, Ro­siam­ngheta, Laltlanzo­va Khiangte, Lalhming­mawia, R Thanglura, H Zonunsanga, C Lalthan­sanga, K Romawia leh H Vanlalruata te an ni.

AMC study tour-a kalte hian Inrinni khan Aizawl Press Club-ah thuthar thehdarhtute kâwmin, an zinnaa an thil hmuhte an sawi.

– See more at: http://www.vanglaini.org/tualchhung/63833#sthash.bT2d9XYY.dpuf

Posted on

Naisingpara-ah Bru enfiah

Naisingpara-ah Bru enfiah

Tripura-a Mizoram Bru rlantlante hruai kirna tura enfiah hna chu Inrinni khan Bru relief camp paruk zinga lian ber, Naisingpara camp-ah an nei a ni a, vawiinah chhunzawm leh a ni ang. Naisingpara-ah hian Inrinni tlai thleng Mizoram mi chhungkaw 2,109-a mi 12,684 enfiah an ni tawh.

Thu dawn danin, Nai­sing­para-ah hian Inrinni bikah chuan Mamit district aṭangin chhungkaw 485 endik an ni a, puitling 2,077 leh naupang 912, an vaiin mi989 an ni. Kolasib district-a awm tur chhung­kaw paruka puitling 27 leh naupang 12, mi 39 enfiah an ni a; Lunglei district mi chhungkaw pakhata puitling pakhat leh naupang panga, mi paruk enfiah an ni bawk.

– See more at: http://www.vanglaini.org/tualchhung/63831#sthash.Sat0dQxW.dpuf