Posted on

​PRAISE ON TLUANG TAKIN ZO

PRAISE ON TLUANG TAKIN ZO


Pathian hruainain Fakzai Hunpui Praise On nimin October 28, 2016(Zirtawpni) zan khan Bungkawn Kohhran Golden Jubilee Hall tluang takin hman zawh a ni.

1-na R. Lalrinmawii, Leitan

2-na Zorinsanga Sailo, Ramhlun North

3-na Cindy Lalthanpuii, Tlangnuam

Special Award hrang hrang sem a ni bawk a –

Best Performance – Cindy Lalthanpuii, Tlangnuam

Most Promising – Irene Laldingngheti, Tuikual South (18 yrs)

Most Inspirational – Lalruatfeli, Lunglei Chanmari

Best Participation – KTP, Bungkawn Branch
Result Puan zan hian Hunserh CKTP Leader Rev. Zothansangan a hmang a. Top Ten Lawmman sem hi Rev. H. Lalrinmawia. Mizoram Synod Moderatori chuan a hmang a, Rev. PC Pachhunga, Executive Secretary i/c MSSU chuan Special Prize a hlan a. Appreciation Certificate hrang hrang chu Pu R. Lalnuntluanga, Synfo Coordinator & Praise On Convener,  Rev. Remlalfaka, Organising Commmittee Member leh Pu PB Lalbiakzuala, Organising Committeee Member ten an hlan. Main Sponsor leh Co Sponsor-te pawh an rawn telkim thei a ni.
He hunah hian Mizoram Synod Choir te zaiin Central KTP Hruaitute-CKTP Leader

Rev. Zothansanga, Pu PC Biakmuanpuia, Asst. Secy., Pu Zonunsanga, Treasurer;

Pu Vanlalpeka, Finance Secretary leh Committee Member-te Pu Lalchhuanliana, Editor, Kristian Thalai, Dr. Lalrotluanga,

Upa Rosangliana leh T. Upa Lalrinawma te an tel thei a ni.

Top tena mi te –

Lalfamkima, Dawrpui Vengthar Branch

Lalhmangaihzuali, Kulikawn Branch

Lalrinawmi Sailo, Electric Veng Branch

Lalrinchhana Jongte, Hmunthar Branch

Lalruatfeli, Lunglei Branch

Loncy Lianchungnunga, Laipuitlang Branch

Saitluangpuii Sailo, Zemabawk North Branch te leh Top three te hian Pathian fakna hla an saho a ni
Thil tha ti atan Krista Isuaah chuan siama awmin ama kut chhuak kan ni si a; chu thil tha tih chu kan awmna turin Pathianin a buatsaih lawk a ni. Ephesi 2:10
Organising Committee

PRAISE ON

Organised by SYNFO

in collaboration with

Inkspot Digiprint Solutions

Co-Sponsors:

CL Paper, Kulikawn

Hlunbuang Store, Bara Bazar

Trade Centre, Chanmari

MD&D Enterprise, Peter Street, Khatla

Music Home, Chanmari

Posted on

Eirûk thubuai tihtawp PRISM-in mak an ti

Eirûk thubuai tihtawp PRISM-in mak an ti

PRISM chuan thuchhuah siamin, Kau-Tlabung Mini Hydel Project leh Tuipanglui Mini Hydel Project (MHP) thubuai tâwp dan chu mak an tih thu leh nuihzatthlak an tih thu an tarlang.

Kau-Tlabung MHP leh Tuipanglui MHP siam danah eirûkna a awm nia hriat vanga FIR leh PIL thehluttu PRISM chuan, “Nasa taka eirukna awm leh dan bawhchhiatna awmte hi chiang takin chhuichhuah a ni a, tu tute emaw hnena pawisa pekte pawh chiang taka hâi lan niin, an inpekna cheque-te pawh man chhuah a ni,” an ti.

http://www.vanglaini.org/tualchhung/62761

Posted on

Vanglaini – Larsap leh CYMA hruaitute an inkâwm

Larsap leh CYMA hruaitute an inkâwm

Central YMA hruaitute chuan nimin khan Raj Bhavan-ah Governor Lt.Gen. Nirbhay Sharma an kâwm a; eirawngbawlna gas tihchingpen chungchanga an hmalakna leh ruihhlo an do dante an hrilh.

Larsap chuan, CYMA an hmalakna hrang hrang chu fakin, ram leh hnam tana an thawh zelna tura duhsakna a hlan a, “Mizo ṭhalai tam zawkin sipai an zawm theih nan training mumal taka pek a nih theih nan YMA-in hma la se a duhawm. Mizorama Sainik School din turah zirlai mipa leh hmeichhia lak ve ve tum a ni a, hei hi ram pumah a hmasa ber a ni dawn,” a ti.

http://www.vanglaini.org/tualchhung/62764

Posted on

Vanglaini – Kawlphetha renchem inzirtir

Kawlphetha renchem inzirtir

State Designated Agency for Energy Conservation, Power & Electricity department leh School Education department ṭangkawp chuan nimin khan School Education conference hall-ah Aizawl district-a high school 70-a energy club-te pualin zirlaite energy renchem pawimawh leh ṭul zia inzirtirna, Enegy Conservation Awareness an buatsaih.

Awarness campaign-ah hian zirtirtute chu energy club kalphung hrilhfiah an ni a; sum leh hmanraw pawimawh hrang hrangte pek nghal an ni.

Energy club-in a tum ber chu, zirlaite kawlphetha renchem pawimawhzia zirtir a ni.

http://www.vanglaini.org/tualchhung/62769

Posted on

Aizawl FC-in Chhinga Veng an tlansan

Aizawl FC-in Chhinga Veng an tlansan

I League club Aizawl FC-in Ricky Lallawmawma goal hmangin Chhinga Veng FC 1-0 in an hneh a, K. Malsawmkima hote hian point 13 hmuin Mizoram Premier League kaithar nena an inthlauhna chu point riat a tling ta.

Chhinga Veng FC-in coach thar Chawngthansanga hnuaiah match li khel tawhin point an la hmu lo a, nimin tlai inkhel pawimawh taka Aizawl FC an hneh loh bawk avangin table mawngphaha awm thei dinhmunah an ding. MPL kaithar hian point nga an hmu tawh a, nizan lama table mawngphaha awm Dinthar FC (4 points) leh Bethlehem Vengthlang FC inkhel result-in an hmalam hun a hril ang.

Posted on

Vulmawi Kum 40 a tling dawn ta

Vulmawi Kum 40 a tling dawn ta

Mizo band zinga chuai thei lo, tun thlenga hla lar la nei thei, Vulmawi chuan kum 40 an lo tling dawn ta reng mai a, kum 40 an tlin lawmna hi ropui takin November 17 leh 18, 2016 khian Tahan, Myanmar-ah neih a ni ang.

Kum 1976-a din Vulmawi hi an hunlaia Mizo ṭhalai leh Mizoram pum ngaihsan an ni a, tunah erawh member an awm darh ta hle. Tawneng chu Switzerland-ah a awm a, Lalruanga hi USA-ah awmin, Hmingliana hi Yangoon-ah a awm. Buta leh Siama te unau erawh Aizawlah an awm thung. An member pali lai maiin mual an liam tawh a, an drummer Zothana te, an bassist Thâwngnova te, (Rihlipui) Nghaka leh an drummer pakhat dang Zara te an awm tawh lo. Member la damte hi an band kum 40 tlin lawmnaah hian tel vek an tum a, stage-a zaiho leh turin an inpuahchah mek.

Posted on

Sorkarin gas phur tur truck 9 a hmu tawh

Sorkarin gas phur tur truck 9 a hmu tawh

Mizoram sorkara Food, Civil Supplies & Consumer Affairs (FCSCA) department chuan, Mualkhang Gas Bottling Plant aṭanga eirawngbawlna gas phur turin hma a la mek a; nimin thleng khan gas phur tur truck pakua an hmu tawh.

FCSCA secretary Dr Franklin Laltinkhuma’n Vanglaini palai zawhna chhanga a sawi danin, IOC gas transporter-te’n tender an chhan dan anga gas an phurhna rate chu a hniam lutuk a; Mualkhang

aṭanga Mizoram hmun hrang hranga an phurhna rate chu km. khatah gas bûr khatah Re. 0.129 a ni a, Borkhola aṭanga Mualkhang thleng phurhna rate chu gas bûr khat km. khatah Re 0.187 a ni.

Transporter-te’n gas an phurh ṭhinna rate chu a hniam lutuk avangin Mualkhang aṭanga Mizoram hmun hrang hrang Supply department hnuaia gas phur tur truck-te chu sorkarin an phurh man pek belh a tum tih sawiin, Dr Franklin Laltinkhuma chuan, “An phurh man pek belh turin ruahmanna kan siam a, a zat turte kan chhût chhuak a, Finance department-ah kan thehlut tawh. Finance lam pawhin min lo dawngsawng ṭha khawp mai,” a ti a; Finance department-ah hian nimin khan a thehlut tih a sawi.

Supply Secretary sawi danin, FCSCA department hnuaia gas phur tur hian truck pakua an hmu tawh a, chungte chu an registration number-te nen IOC hnenah an thawn thla tawh a ni.

Posted on

Commonwealth Weightlifting-ah Jeremy tan gold

Commonwealth Weightlifting-ah Jeremy tan gold

Mizo rawlthar Jeremy Lalrinnunga chuan Penang, Malaysia-a Commonwealth Youth Weightlifting Championship-ah India tan gold medal a la; Jeremy hian snatch-108 kg, Clean & Jerk-127 kg, total -198 kg chawiin gold hi a la a ni.

Kum 16-a upa Jeremy-a hi Army Boys Weighlifting Academy, Pune-a awm niin August khan Commonwealth inelna hmachhawn tur hian national camp a zawm a, North East Games 2016-ah khan Mizoram tan gold medal a lo la tawh bawk.

Govt. Complex rawlthar Jeremy hi November 8-16 inkara neih tur Asian Youth Weighlifting Championship-ah India aiawh turin a feh chhuak leh dawn bawk a ni.

Posted on

Grassroot football tournament ṭan

Grassroot football tournament ṭan

Sir Ratan Tata Trust, Mizoram Sarva Sikhsha Abhiyan (SSA) leh Mizoram Football Association (MFA) ṭang­kawp buatsaih, 1st. Inter-District Under-14 Grass­roots Football Tourna­ment for Boys and Girls chu nimin khan Rajiv Gandhi Stadium-ah Sports & Youth Services (SYS) minister Zodintluanga’n a hawng.

Zodintluanga chuan, infiamna leh zirna chu a kal kawp thei tih sawiin, naupangte chu taimakna, tumruhna leh mahni inthununna kawnga theihtawp chhuah turin a fuih a, “Sorkar leh MFA-in hmunhma leh hmanrua a pek che u hi an tih theih tawk a ni a, a bak chu nangmahniah a innghat tawh a, naupangte in ṭan a ngai tak zet a ni,” a ti.

Sports Minister chuan, Mizoram sorkar leh Ratan Tata Trust-te’n thawhhona ṭha tak an nei chu lawmawm a tih thu sawiin, “Centre of Excellence pawh Aizawlah din a nih theih nan thawhhona thuthlung (MoU) buaipui mek a ni a, a tirah naupang 50 lak a ni ang,” a ti a; Centre of Excellence chuan football-ah hmasawnna a zuantir dawn a, coach ṭha takin football a zirtir ang a, hostel leh sikul ṭha tak pek an ni dawn tih a sawi a; hei hi MFA lamin an bawhzui mek a ni.

Tournament hawnna inkhawm hi SSA state project director Lalhma­chhuana’n a kaihruai a; Tata Trust-a head of sports Anand Datla leh MFA honorary secretary Lalnghinglova Hmar ten thu an sawi bakah, footballer Jeje Lalpekhlua’n naupangte tana thuchah a thawn tihchhuah a ni.

Tata Trust, SSA leh MFA thawhho­naah hian district parukah football zirna kalpui a ni a; Aizawl district-ah centre 14, Lunglei district-ah centre 12, Champhai district-ah centre 10, Mamit district-ah centre pariat, Kolasib district-ah centre pariat leh Serchhip district-ah centre pariat a awm.

Posted on

LUNGLEI DC THARIN CHANCHINBU MITE KAWM

LUNGLEI DC THARIN CHANCHINBU MITE KAWM

Vawiin chawhnu khan Lunglei DC Pi Lalzarmawii, IAS chuan a pisaah Lungleia chanchinbu mite kawmna a nei a, thawh hona tha neih puiah a sawm a ni.

Pi Lalzarmawii chuan mahni chauhin hna a thawh theih lova, DC-a officer leh staff te bakah department dang leh chanchinbu mite thawh hona tel lo chuan sawrkar programme chak takin a kalpui theih loh a ti a. Kan tanrual a tul tiin, thurawn pek a ngaihna apiangah inthlahrung hauh lova thurawn pe thin turin a chah a ni. Chanchinbu mite chu sawrkar hmalakna an puanzar kawngah fimkhur taka thu rintlak chauh chhuah thin turin a beisei thu a sawi a. Mipui rawngbawltu an nih angin, mi chunga leng ni a inngaihna neih a thiang lo a ti. District headquarters-a a hun tam thei ang ber hman a tum thu a sawi bawk a ni.

Chanchinbu mite pawhin DC thar an nei chu lawmawm an tih thu sawiin, thawh hona tha tak neih an beisei thu an sawi a. District hmasawnna atana hma a lakna apiangah an thlawp tur thu an sawi a ni. Heng bakah hian district hmasawn nana tan lak ngaihna lai nia langte sawihona an nei bawk a ni.