Posted on
Gauhati HC Chief Justice-in CM lehkha a thawn Tharum thawhtute an phu tawka hrem a phut

Gauhati High Court chief justice Ajit Singh chuan chief minister Lal Thanhawla lehkha thawnin, September 22, 2016-a Lunglei District Court beih a nih vang leh Chief Judicial Magistrate quarters suasam a nih chungchangah dan kengkawhnain mumal a nei lo tih chiang taka tarlangtu a nih thu a hrilh. He thil thleng avang hian police-te’n mi 28 an man tawh.

Gauhati High Court chief justice Ajit Singh chuan September 23 khan CM Lal Thanhawla hnenah lehkha a thawn a; mipui thinrim pung khawmin Lunglei District Court an khawih leh judge quarters pawh an suasam hial chuan a thin a ṭháwng hle tih tarlangin, thil thleng chu pawmzam theih a nih loh thu a ziak a, a titute an phû tâwka hrem an nih theih nan rang taka bawhzui turin a phut nghal.

Chief Justice chuan, pawi khawihtute man chhuah a, an phu tawka hrem thuai an nih loh chuan Mizorama dan hmanga rorelna chanchinah hun thim a siam a hlauhthawn thu a sawi hial a; pawi khawihtute an thil tih aṭanga thiam loh chantira hrem an nih theih nan te, dan hmanga rorelna leh ram danpui anga sorkar kaihhruaina, mipuite’n an rin theih nante khauh taka thil tih a ṭul thute a sawi bawk.

Chief justice chuan, Court building leh judge quarters tihchhiatte chu rang taka siam ṭha leh turin CM chu a ngen a; hnathawktu zawng zawngte venhimna ṭha tak pe turin a ngen bawk a ni.

Lunglei Zohnuai mipuite’n District Court leh magistrate quarters an khawih ní, September 22 khan mi 16 man an ni a, mi pahnih chu kum tling lo an nih avangin juvenial justice court-a hruai an nih hnuah Remand Home-ah dah an ni a, mi 14-te chu District Jail-ah thawn an ni. Police-te chuan September 23 khan mi 10 an man leh a, niminah mi pahnih an man leh bawk a; mi dang man tur pawh an la neia thu dawn a ni.

September 23-a man mi 10-te  hi Lungleiah magistrate an awm tawh loh avangin Inrinni khan Aizawl District Court-ah hruai an ni a, Court chuan ni sarih chhung judicial remand phawt tura tiin, an thubuai chu October 5, 2016-a ngaihtuah leh turin a dah.

Zohnuai mipuite’n Lunglei District Court building an khawih leh magistrate quarters an suasam dan hi chhui turin Magisterial Inquiry din a ni dawn tih, Home minister R Lalzirliana chuan September 24 khan a sawi.

Thuthar thehdarhtute zawhna chhangin, Home Minister chuan, police-te’n pawi khawihtu an man tawh hnu ‘Kan hmu duh’ tih vanga inhâwr khawm chu huaisen loh thlak hlea a hriat thu sawiin, “Hei hi hri chhia, paih tawh tur a ni,” a ti a; Chief Minister nen an sawi dun hnuah, Magisterial Inquiry din ni se, an tih thu a sawi a ni.

– See more at: http://www.vanglaini.org/tualchhung/61103#sthash.rpzAM0IJ.dpuf

Facebook Comments
Leave a Reply