Dan loa ILP siamsak ṭhin mi 17 man tawh

Dan loa ILP siamsak ṭhin mi 17 man tawh

YMA Sub-Headquarters, Serchhip hnuaia Kumpuan Committee chuan, Serchhip district-ah hnam dang, Inner Line Permit (ILP) siamsak a, an hnen aṭanga sum laksak ṭhin mi 17 an man chhuak tawh.

Serchhip Sub-Hqrs. YMA president Sanghmingthanga, vice president Kawlthuama leh Kumpuan Sub-Committee secretary Lalrammuana te chuan Inrinni khan Serchhipah thuthar thehdarhtute kawmin, hnam dang ILP enfiah kawnga an hmalaknate an hrilhfiah.

Serchhip Sub-Hqrs. YMA hruaitute chuan, ILP chu dik taka inhumhalh nan hman a ṭul thu sawiin, sum hmuhna atana ILP siamsak ching an hriat chhuahte chu ILP an siamsakte permit chu tun thla chhung ngeia titawp turin an hriattir tih an sawi.

Mamawhna vanga hnam dang mi chhawrte’n ILP an siamsak erawh chu dan anga thil tih a nih avangin an sawisel lo tih sawiin, an hna thawk tura ILP siamsaktu zawng zawngte chu an hna an thawh zawh veleh an ILP tihtawpsak tura DC hriattir turin an ngen a ni.

Serchhip Sub-Hqrs.YMA hruaitute chuan, hnam dang mipa, Mizo hmeichhia nupuia neite’n an nupuite sumdawnna licence anga an hmang chu ṭha lo an tih thu an sawi a; Supreme Court thuchhuak angin, Mizo tribal hmeichhiain pasala hnam dang a neih chuan non-tribal a ni nghal tih sawiin, chumi chungchanga dan chu khauh zawka kenkawh a ṭul thu leh Mizo hmeichhia pasala hnam dang neite’n dan anga pek an nih loh chuan sumdawn phalna an nei theih loh thu an sawi bawk.

Serchhip Sub-Hqrs. YMA hruaitute chuan, ILP chu Manipur leh Meghalaya-te pawhin an awh em em a ni tih sawiin, Mizote’n ILP dan an neih chu a hman dik lohna leh a tiṭhuanawp zawnga thil tih reng reng chu do tlat turin Mizo mipuite an ngen a ni.

– See more at: http://www.vanglaini.org/tualchhung/60426#sthash.JXLSukU1.dpuf

Facebook Comments

Add a Comment