Lalnunpuia Hrahsel A album thar a buaipui leh ta

Lalnunpuia Hrahsel A album thar a buaipui leh ta

‘Harhna ropui’ hla chauh pawh sawi ila kan hriat nghal, Lalnunpuia Hrahsel chuan a hla phuahte hi zai­thiam hrang hrang saktirin album a buatsaih leh a, reiloteah hmuh kan inbeisei.

Lalnunpuia Hrahsel album tihchhuah tur hi Lalnunpuia Hrahsel leh a Hlate Volume 4 hi a hming tur chiah chu a ni lo a, a album hming tur takah a la buai deuh a, a main title turah hian ‘Lalpa mi hriat’ emaw ‘Amen, ka pe thei lo’ tih emaw hman a tum. He album turah hian a hla phuah bakah Sap hla a lehlinte pawh tun ṭum chu a awm ang a, Sap hla lehlin pathum emaw vel a awm ang. A hla phuahte hi album-a siamin a lo tichhuak tawh ṭhin a, tuna mi hi a palina tur a ni.

Nunpuia hian tunah hian a album tur hi a buaipui chho mek a, album-a mi tur hla hi music video-a siamin a hmahruaiah a tichhuak chho dawn. A album hming a puttir tura a hual deuh ‘Lalpa mi hriat’ tih leh ‘Amen, ka pe thei lo’ tihte hi Pensy-i’n a sa ve ve dawn a, tunah hian recording pawh a buaipui chho mek. Heng hla pahnihte hi Pensy hian Lunglei lamah a record ang a, video pawh an shoot nghal ang. Mimal zaithiam dang bakah chuan zaipawl pawh an zai dawn.

Lalnunpuia Hrahsel hi music lamah hlawhtlinna a chang lian hle a, Lelte Awards 2015-ah khan Album of the Year leh Song of the Year a dawng tawh a ni. Kumina Lungleia Vulmawi Awards an sem turah hian category pathumah a lang bawk. ‘Harhna ropui’ hla chu Song of the Year-ah a lang a, ‘Best Album-ah ‘Saiip puan sinin’ tih a lang bawk. Amah hi Best Song Composer-ah nominate a ni.

– See more at: http://www.vanglaini.org/thalai/60234#sthash.WttMh1uV.dpuf

Facebook Comments

Add a Comment