Hunthar Vengah lei a tawlh belh zel

Hunthar Vengah lei a tawlh belh zel

Thawhlehni zan leh nimin zing lam khan Hunthar Venga lei tawlh chu a tawlh belh leh a; in ṭhiah belh erawh a awm rih lo.

Hunthar Veng Local Council vice chairman K Lalfakawma’n Vanglaini palai a hrilh danin, Thawhlehni zan leh nimin zinga lei tawlh belh avang hian dinhmun hlauhthawnawmah in ṭhenkhat a awm belh leh a, ṭhiah ngai tura ngaih ni mah se, in ṭhiah belh erawh a la awm lo.

In aṭanga bungrua thiar chhuak pawh an awm belh rih lo a, mahse, lei tawlhna chhaka B Sairengpuii te chhungkua leh an in luahtute chu Thawhlehni zan khan an riak chhuak a ni.

K Lalfakawma sawi danin, August 13, 2016 zan aṭanga Hunthar Venga lei khî leh tawlh vang hian nimin thleng khan in pasarih an ṭhiat tawh a, chhungkaw 46-in bungrua thiar chhuakin an chenna in an chhuahsan tawh. In ṭhiah la ngai tura ngaih pahnih a la awm thu a sawi bawk.

Thawhlehni zana ruahsur vanga lei a tawlh belh leh avangin nimin khan Disaster Management & Rehabilitation department-a mithiamte leh Geological Survey of India (GSI) mithiam pahnihte’n lei tawlhna hmun hi an tlawh leh a; tui paihna tur siam a ngaih avangin DMR department aṭangin nimin khan hmanrua lakkhawm a ni a, vawiin lamah tui paihna tur siam tum a ni.

Chenna in chhuahsantute zinga a tam zawk chuan an chhungte an bêl a, chhungkaw pali erawh chu Hunthar Venga Legal Metrology building-ah an khawsa rih a, Chakma House-a invawm lut chhung­kaw tlem azawng an awm bawk.

Mahni chenna in chhuahsante hnenah hian Aizawl District Disaster Management Authority (ADDMA) aṭangin chhawmdawlna, immediate relief ni khatah puitling pakhat tan Rs. 60 leh naupang pakhat tan Rs. 45 pek chhunzawm zel a ni.

– See more at: http://www.vanglaini.org/tualchhung/59917#sthash.jl4BYGep.dpuf

Facebook Comments

Add a Comment