HEALTH MINISTER-IN 365 DAYS MEDICINAL PLANTS CAMPAIGN HAWNG

HEALTH MINISTER-IN 365 DAYS MEDICINAL PLANTS CAMPAIGN HAWNG

State Medicinal Plants Board (SMPB), Health & Family Welfare bultuma ‘365 Days Campaign on Medicinal Plants’ neih tur chu vawiin khan Central YMA Hall, Tuikhuahtlang-ah Health Minister Pu Lal Thanzara’n a hawng a, he hunah hian Dy. Chief Whip Pu R.L Pianmawia leh MLA Pu Nihar Kanti Chakma pawh an tel a ni.

‘365 Days Campaign’ hawnna inkhawm SMPB CEO Dr.Lallunghnema kaihhruaiah Khuallian Pu Lal Thanzara chuan ramthing hnah kung (ramhmul) damdawi (Medicinal Plants) chu khawvelah a than chak hle thu sawiin, ram changkang zawk ten an chhawr tangkai thu leh sum vaivir pawh a tam thu a sawi a. Mizoramah pawh ramthing hnah kung damdawi hmang tangkaia sum chang theia siama hmalak chu sorkar thil tum a nih thu a sawi. AYUSH hmalaknain Mizoram district hrang hranga khaw thlan chhuah bikah medicinal plants-te chu chin tir an ni a, heng hi state pawnah thawn chhuaka eizawnna tlaka siam leh Mizoram chhungah ngei ramthing hnah kung damdawi hlutzia inzirtir chhoh zel an tum thu a sawi. Mizo ramhmul damdawite chin uar leh humhalh kawngah Central YMA ten sorkar theihtawpa an thlawp leh thawhpui thinna chungah lawmthu sawiin 365 Days Campaign-ah pawh CYMA nen thawhho zel tum a nih thu Pu Lal Thanzara chuan a sawi a. Pathian malsawmna dawngin Mizoram chhunga thlai hnahte chu ram dang aiin an tha zawk a, hetihlaia a ti chereu zawnga ram leilung fate kan che leh mai thin chu sim a tul a ni a ti. Ramthing hnah kung damdawi chi hrang hrang Mizoram chhunga awmte chu humhalh leh venhim chu mipuite mawhphurhna a nih thu sawiin, Mizoram atanga tharchhuah medicinal plants-te chu neitu nihna ‘patent’ nei ngei tum a nih thu a sawi bawk.

He huna thusawitu dang Pu Lalbiakzuala CYMA President chuan ‘365 Days Campaign on Medicinal Plants’ hawnna inkhawm hi ramthing hnah kung humhalh kawngah tun hma lam atangin CYMA-in hma a lo lak thin dante a tarlang a. Khaw hrang hranga YMA in ram a neih te pawh humhalhin ramhmul damdawi chinna bik ‘plantation’ atan hman a nih thin thu a sawi. CYMA kumpuan thupuiah nungcha leh ramngaw humhalh bakah intodelh a tel ang ngeiin State Medical Plants Board hmalakna chu an phurpui leh an tuipui thil tak a nih thu a sawi a, medicinal plants tih lar leh Mizoten kan chhawr theih nan CYMA-in nasa taka hmalak zel an tum thu a sawi bawk.

India Prime Minister-in ramchhunga ramthing hnah kung humhalh leh chawilar a ngaih pawimawh em avangin Ministry of AYUSH chuan August ni 20-21, 2016 khan rampuma kalpui tur ‘365 Days Campaign on Medicinal Plants’ hi Jaipur, Rajasthan hmunah a hawnna an nei tawh a. Mizoram atanga he hun chhimtu SMPB leh CYMA aiawhte bakah Mizo ramhmul damdawi chingtute nen mi 18 hnenah vawiin khan Khuallian Pu Lal Thanzara chuan ‘Certificate of Excellence’ a hlan a ni.

Vawiin hawnna inkhawmah hian Team Leader Pu J. Lalsailova chuan Jaipur Tour Report pe a. Dr.K. Lalropari, H&FW Principal Director leh Dr.Thanpuii, ex-Director, RIPANS leh Vice-President, MHIP ni bawk ten thusawina hun hmang bawk.

Facebook Comments

Add a Comment