Garage-a lirthei dah tura thupek Khauh zawka kenkawh tum a ni

Garage-a lirthei dah tura thupek Khauh zawka kenkawh tum a ni

Home minister R Lalzirliana chuan, Aizawl khawpuia traffic tâwt tihziaawmna atan lirtheite garage-a dah tura tih thupek chu khauh zawk kenkawh a nih tur thu a sawi a; taxi intlân chhâwktir tum chu dodal awm mah se, kaltlangpui a nih tur thu a sawi bawk.

R Lalzirliana hian nimin khan Congress Bhavan-ah thu sawiin, “Traffic Management Coordination Committee chuan Aizawl khawpuiah traffic awmze nei deuha kalpui a duh a. Kan kawngpuite hi state dang ngaihtuahin a zîm lutuk bik lem lo a, kawng laihna apiangah mi hausain lirthei an dah zel a, hei hian kawng a tizím a ni,” a ti.

Lirthei nei apiangin garage an nei tur a ni tih chu khauh zawka kenkawh a nih tur thu sawiin Lalzirliana chuan, “A bik takin main road-a lirthei dahte phei chu pawisa chawitir zelna tur dan buatsaih a ni dawn. Khauh deuha dan lekkawh a ngai dawn a ni,” a ti a; kawng dunga lirthei dah tam lutuk ṭhin chuan traffic-ah harsatna a thlen ṭhin thu a sawi.

Home Minister sawi danin, garage-a lirthei dah tura tih tawh chu khauh taka kenkawh a nih chuan lirthei nei kher lote tan pawh hmun an neih chuan garage siam se, mi hausa hoin an lirthei man chawiin an dah ang a, an tan eizawnna ṭha tak a ni thei dawn a ni.

HM Zira chuan September 1, 2016 aṭanga taxi intlân chhâwk tura Traffic Management Coordination Committee-in thutlukna a siam chu kaltlangpui a nih tur thu a sawi a, “Mi

ṭhenkhatin dodalna an siam a, heng ho hian mi dang tibuai zawng leh tharum thawh zawngin ti lo hram se ka duh a ni,” a ti.

Taxi intlân chhâwk chu tharum leh mi dang tibuai zawnga dodal an awm chuan sorkar thil tum dodal tum hrim hrimah ngaih an nih tur thu sawiin, R Lalzirliana chuan, “Democracy ram a ni a, lungawi lohna lantir hi dâl ngawt theih a ni lo,” a ti a; tharum tel lo pawhin lungawi lohna chu lantir theih a nih thu a sawi.

Home Minister chuan, Aizawl khawpui traffice tâwt tihziaawmna atan theihtawp an chhuah zel tur thu sawiin, “Taxi intlân chhâwkin khawpui a tinuam zo lo a, mihring chetvelnaah harsatna a la awm tho chuan private motor intlân chhâwk thleng pawha tih theih a ni,” a ti.

– See more at: http://www.vanglaini.org/tualchhung/59665#sthash.0QzRUfed.dpuf

Facebook Comments

Add a Comment