Posted on

GSI mithiamte’n lei tlahniam an enfiah

GSI mithiamte’n lei tlahniam an enfiah

Hunthar Veng, Aizawla lei tlak hniam ṭhinna hmun zir chiang tura Shillong aṭanga lo kal, Geological Survey of India mi thiamte chuan August 24 khan lei tlahniam an enfiah ṭan.

GSI mithiam lo kalte hi senior geologist pahnih – G Rangmei leh WS Rocky te an ni a; Nilaini zing dar 9:30 aṭangin Hunthar Venga National Highway-54 kawngpui tlahniam ṭhin leh, kawngpui chung lama mihring chenna hmuna lei tlakhniamna hmun an en.

GSI mite hian nimin khan lei tlahniam hi an enfiah zui leh a, Hunthar Veng bakah, Vaivakawn aṭanga tuihawk luan dante an enfiah bawk. GSI mithiamte hi Hunthar Veng Local Council-te leh Mizoram sorkar aṭangin DC pisa lam aiawh, Disaster Manage­ment & Rehabilitation department, Geology & Mineral Resources deptt. leh PWD hotute’n an ṭawiawm a ni.

GSI mithiamte hi September 3, 2016 thleng Aizawla chám tura beisei an ni a; an chàm chhungin lei tlakhniamna hmun an enfiah bakah, an hmuh dan aṭangin lei tlahniam ṭhin chinfelna tura hna thawhna tur sorkar laipuia sum dilna tur DPR an siam dawn a ni.

Hetih lai hian, Hunthar Venga lei min vanga mahni chenna in chhuahsante ṭanpui nan Aizawl Municipal Corporation (AMC) chuan Rs. 1,00,000 a pe a; nimin chawhnu khan AMC aiawhin bialtu councillor C Lalmuanpuia’n Hunthar Veng LC chairman Lal­hmangaiha Renthlei kutah a hlan.

– See more at: http://www.vanglaini.org/tualchhung/59615#sthash.ZzA2ZKK3.dpuf

Facebook Comments
Leave a Reply