Posted on

College-a pawn lam mi sawm turin HTE dept phalna lak hmasak a ngai

College-a pawn lam mi sawm turin HTE dept phalna lak hmasak a ngai

Higher & Technical Education (HTE) department chuan Mizoram sorkar hnuaia college-ah páwn lam mi thu sawi tura sâwm khapna order an tihchhuah chu an siam

ṭha a, order thar a tichhuak. Order thar ang chuan, phalna lak a nih hnuah college-ah páwn lam mi thu sawi tura sawm phal a ni.

HTE department chuan August 18, 2016 khan order tichhuakin, sorkar college-ah thu sawi turin páwn lam mi sàwm an khap a, August 23 khan order dang tichhuak lehin, college-a páwn lam mi thu sawia sawm khapna order chu sût a ni.

Order tharah chuan, college zirtirtu ṭhenkhat, an subject kaihhnawihah politcian-te thu sawi tura sáwm an awm ṭhin thu tarlan a ni a, ‘Hei hian zirlaite tan an zirna kal zelah thil ṭha lo a tuh a hlauhawm’ tiin an ziak.

Order thar chuan, zirtirtute’n active politican-te an college-a thu sawi tura an sàwm dawnin, an thu sawi tur leh an sawm turte sawiin, sorkarah phal an dil tur a ni a; thupek zâwm lote chungah dan anga action lak tura tih a ni.

Thuthar thehdarhtute zawhna chhangin HTE minister R Romawia chuan, college education chu tluang taka kalin, zirlaite’n zirtirna hrisel dawng se tih chu an duh ber a nih thu a sawi a, “College zirlaiah hian politics kaihhnawih thil a tel lo thei lo. Mahse, politican-te hi mahni ṭánghma hai dan thiam tak kan ni a, kan naute hriat lohin an thinlungah eng emaw an tuh ang tih a hlauhawm a, fimkhur a ngai,” a ti.

R Romawia chuan, college-a thu sawi tura politician-te sàwm an nih avangin thil chhia a thlen an la hriat loh thu sawiin, “Sorkar hnathawk nih chuan neutrality an vawng tur a ni a, chutih laiin, páwn lam mi sawm hi khap ngawt theih a ni lo,” a ti a; politcian-te an sawm dawn erawh chuan, thawkho nihna anga a him chin a ni em tih inhriatpui tawn ṭha an tih thu a sawi.

Politician-te chu fimkhur tura chahin Romawia chuan, “Kan zirlaite hi mahni ham-

ṭhatna atan leh politics-a hamṭhatna lakna atan hman tum lo ang u. Nakin lawka kan ram hruaitu turte hma lam hun hi i ngaihtuah ang u. Politcian-te chuan college ni lo platform eng emaw zat kan nei a, hei hi i hmang ṭangkai mai ang u. Kan zirna sang hi politics ball-ah a chang ang tih a hlauhawm tak zet a ni,” a ti.

HTE Minister chuan, college zirlaite chu mahni thua thutlukna siam thei vek tawh ni mah se, college zahawmna tihbawrhbân palh a hlauhawm thu sawiin, a hun laia college politics ball-ah a chang ang tih chu an hlauh ber a nih thu thuthar thehdarhtute a hrilh.

College-a politcian-te thu sawi tura an zirtirtute’n an sawm dawna phalna lak phawt phût a nih dawn tak avangin zirlaite chu chêp lutukah inngai lo se a duh thu sawiin R Romawia chuan, “Zirlaite hi an ṭhatna tur a nih chuan an chêp lohna tur kan ngaihtuah nasa hle a ni,” a ti.

– See more at: http://www.vanglaini.org/tualchhung/59607#sthash.qW5pYSSj.dpuf

Facebook Comments
Leave a Reply