Mizo hnam ralna turin engmah Kan ti dawn lo – Home Minister

Mizo hnam ralna turin engmah Kan ti dawn lo – Home Minister

Home minister R Lalzirliana chuan, Congress sorkarin Mizo hnam ralna tur thil a tih dawn loh thu a sawi a, “MLPC Act pawh a ṭhat loh chuan kan hlîp leh mai ang,” a ti.

R Lalzirliana hian nimin khan Congress Bhavan-ah thu sawiin, “MLPC Act hman a nih dawnin, a ṭhat loh chuan kan sût leh mai tur thu kan sawi lâwk a, kan hnam ralna tur thil engmah kan ti dawn lo,” a ti a; tun dinhmunah chuan MLPC Act ṭhat leh ṭhat loha thutlukna siam tur chuan a la hma deuh niin a sawi.

Home Minister chuan, MLTP Act hman a nih lai aiin MLPC Act hman a nih hnuah zu vanga damdawi-in admit an tlem niin a sawi a; total prohibition laiin nge MLPC Act hman hnuah zu vanga khawtlanga buaina chhuak, Casualty pan zat, chetsualna leh thil ṭha lo dang a thlen tam zawk leh zawk loh zir chian leh tur a nih thu a sawi a ni.

MLPC Act ṭhat leh

ṭhat loh zir chiang tura din Committee-in uluk takin thil pawimawh hrang hrang an zir dawn tih sawiin Lalzirliana chuan, “MLPC Act ṭhatna leh chhiatna kan bûk ang a, hman zui zel leh zel loah eng nge kan ram tan ṭha zawk ang tih en a ngai a ni,” a ti.

R Lalzirliana chuan, Mizoram BJP-te’n pasalṭha Khuangchera chawimawi an tum chungchang sawiin, “India zalenna sualtu ni âwm taka chawimawi an tum hi Mizo ṭhalai rilru lak an tumna leh BJP a len zel theihna atana vervêk taka an ruahmanna a ni,” a ti a; ṭhalai eng emaw zatin Khuangchera chawimawi tum an dodal chu lawmawm a tih thu a sawi.

MPCC Vice President chuan, tun hnaia MNF party hotu pakhatin MPC leh ZNP-te an tênau deuh avangin North East Democratic Alliance-a tel vel tlaka ngaih an ni lo tia a sawi thu a tarlang a, “MPC leh ZNP-te an ni emaw, thawhpui tura tê lua an awm lo. A ṭul dan azir zelin keini chuan thawhpui theih loh party kan nei lo,” a ti.

– See more at: http://www.vanglaini.org/tualchhung/59325#sthash.OE8aaN6z.dpuf

Facebook Comments

Add a Comment