Posted on

Sipai leh Jet Airways luh tum turin sáwm

Sipai leh Jet Airways luh tum turin sáwm

Mizoram Youth Commi­ssion (MYC) chairman T Sangkunga, MLA chuan, kumin November 2-6 chhungin Mizoramah sipai lâk rûnpui neih a nih dawn thu leh September 1-ah Jet Airways-in Aizawlah cabin crew tur an lak dawn thu a sawi a; Mizo ṭhalaite a tam thei ang ber luh tum turin a sáwm.

T Sangkunga hian nimin khan Aizawl Press Club-ah thuthar thehdarhtute a kâwm a; Indian army-a hna chi hrang hrang lâk tur leh Jet Airways-in cabin crew lak an tum chungchang leh, MYC hmalakna kal mekte a sawi a ni.

MYC Chairman sawi dan­in, November 2-6 chhunga Mizorama sipai lâk rûnpui neih tur hi Rajiv Gandhi Sta­dium, Mualpuiah neih tur a ni a; general duty, tradesman, technical, clerk/storekeeper technical, nursing assistant leh inventory management-te lak tum a ni.

General duty leh trades­man atan pawl 10-a 45% hmu chin, mipa nupui la nei lo, kum 17 leh a chanve leh kum 21 inkar tan a dil theih a; minute 6 chhunga km. 1.6 tlan thei leh push-up vawi ruk aia tlem lo ti thei nih a ngai dawn. A dang zawngah HSSLC pass, subject zawng zawnga 40% leh belhkhawma 50% hmu chin, kum 17 leh a chanve leh 23 inkar tan dil theih a ni thung.

Sipai atan hian kumin September 1 aṭanga October 15 chhungin online hmangin dilna thehluh theih a ni a; website chu www.joinindianarmy.nic.in a ni.

Jet Airways chuan September 1, 2016-ah MYC Office, Aizawlah campus recruitment an ti dawn a; kum 18-28 inkar, mipa tan ft. 5’8″ leh hmeichhe tan ft. 5’2″ aia hniam lo, hmai, ngháwng leh kuta tattoo leh ser nung nei lo, pawl 12 pass tan dil theih a ni.

T Sangkunga chuan, cabin crew atan hian August 23 aṭangin MYC-in training a buatsaih dawn tih sawiin, tlin ngei duhte chu August 19-22 inkarah marksheet leh certificate leh passport thlalak kenga MYC pisaa inziak lut turin a chah. Zawhna chhangin T Sangkunga chuan, Jet Airways cabin crew lak zat tur hi bithliah a awm lo a, an duh ang an hmuh zat zat an la mai dawn tih a sawi.

MYC Chairman chuan, MYC-in Aizawlah IAS coa­ching leh SSC coaching a kalpui mek thu a sawi a; MYC leh Labour, Employment & Industrial Trai­ning department nen ṭang­kawpin Mizoram páwnah mi 3,322 hna an hmuhsak tawh thu a sawi bawk.

– See more at: http://www.vanglaini.org/tualchhung/59255#sthash.aCSeKG8t.dpuf

Facebook Comments
Leave a Reply