Posted on

Central YMA leh political party-te’n Khuangchera chawimawi tum an duh lo

Central YMA leh political party-te’n Khuangchera chawimawi tum an duh lo

Sorkar laipui leh BJP Mizoram Pradesh bultuma Ailawnga pasalṭha Khuangchera nimina chawimawi tum a ni chu, Central YMA, MNF leh ZNP-te chuan an duh loh thu an puang.

Nimina Central YMA thu­chhuak chuan, “BJP-te’n Mizo pasalṭha Khuangchera, India zalenna sualtu anga an chhál leh chawimawi an tum hi CYMA chuan ṭha a ti lo a, Khuangchera hi India zalenna atana British sipaite dotu a ni lo a, British a do lai khan Mizo­ram hi tu thuhnuaiah mah a awm loh bakah, India awpna hnuaia awm kan nih loh avangin, India tana beitu anga chawimawi tum hi a dik lo a ni tih hi CYMA ngaihdan a ni,” a ti. Hemi chungchanga MZP leh MSU hmalakna chu an thlawp thu an tarlang.

Nimina MNF National Executive Meeting resolution chuan, pasalṭha Khuangchera, India ram zalenna suala thi anga sawi chu dik an tih loh thu tarlangin, “Pasalṭha Khuangchera khan India a awm tih leh India tana zalenna sual a nih thu pawh a hriat kan ring hauh lo,” a ti. Sorkar laipuiin India freedom fighter anga Khuangchera ngaia chawimawi an tum, zirlaite’n an dodal chu ṭha an tih thu an puang a ni.

ZNP president Lalduhoma statement chuan, “India a awm tih pawh hre reng reng lo Khuangchera chu India zalenna suala martarah puan an tum a. Kan hnam history hi a nih ang taka humhalh kan duh. India ram tana martarte kha kan zah em em rualin, kan hnam pasalṭha Khuangchera hi hnam dang tana martar anga puan kan phal lo. Hemi kawnga hmalatute

apiang kan thlawp tlat a ni,” a ti a; Naga hnam tana martar Rani Gaidialiu pawh India tana martar anga puan an tum avangin Naga ho pawh an lungawi lo hle niin a tarang.

Lalduhoma chuan, kum 1923-ah India ram chu Hindu rama siam tumna awm­in, Hindutva tih ṭawngkam a chhuak a, kum 1989-ah BJP-in Hindut­va chu an lungphûmah an puang tih a sawi a; tuna BJP an sorkar leh hnuah Saffronisation of Education, Uniform Civil Code, Yoga leh bawng talh khapte a ri ring hle nia sawiin, “India ram history pawh a Hindu thei ang zawnga ziah nawn leh tumin, Mahatma Gandhi leh Nehru-te hming pawh nawh reh tial tial a ni… Mahatma Gandhi thattu Nathuram Godse-a pawh RSS chuan martara puan an tum ta zel a ni,” a ti.

– See more at: http://www.vanglaini.org/tualchhung/59266#sthash.tBDht3ht.dpuf

Facebook Comments
Leave a Reply