5TH CADET, SUB-JUNIOR & JUNIOR TABLE TENNIS CHAMPIONSHIP

5TH CADET, SUB-JUNIOR & JUNIOR TABLE TENNIS CHAMPIONSHIP

Vawiin chawhma dar 10:30 khan Serchhip District Bawrhsap Dr. Lalrozama, IAS chuan New Serchhip Indoor Stadium ah 5th Cadet, Sub-Junior leh Junior Table Tennis Championship 2016 a hawng.

A hawnna inkhawmah thusawiin Dr. Lalrozama chuan, infiammi kalkhawmte chu tih tak zeta bei turin a chah a, theihtawpa inkhel chunga an lehkha zirlaite hlamchhiah chuang hauh lo tura ngenin, infiammi hlawhtling, lehkhathiam bawk si a nih theih tih hre reng turin a fuih a. Zirna hnualsuata infiamna lama hlawhtling ta chuang silo te pawh nih palh theih tak a ni ve a ni, a ti. In zir zel tur an nih angin an hotute leh Coach te thu ngaichang a, harsatna an neihte pawh zawt hreh lo turin a ngen a. Hmasawn tura theihtawp chhuah tur leh hmasawn dawn lova inhriat chuan kawng dang zawn nachang hre thuai turin a hrilh a ni.

He Championship hawnna inkhawm hi Pu Lalremchhunga, Vice President, Mizoram Table Tennis Association chuan a kaihruai a, MTTA in hmasawnna an neih hrangte leh a hma chhawpte sawiin infiam mite chu theihtawpa tan la zel turin a ngen a ni.

He championship hi Mizoram Table Tennis Association leh Serchhip District Table Tennis Association tangkawpin an buatsaih niin Category hrang hrang pathum ah intihsiak a ni dawn a, Cadet mipa 14 leh hmeichhia 8, Sub-Junior mipa 17 leh hmeichhia 7, Junior mipa 16 leh hmeichhia 7 telin an vaiin infiammi 69 an tel a, naktuk dt 19.8.2016 ah zawh fel hman tum a ni.

Facebook Comments

Add a Comment