Aadhaar card siam la chawlhsan zel hrih Sept. 2016 chhungin chhunzawm hman tum

Aadhaar card siam la chawlhsan zel hrih Sept. 2016 chhungin chhunzawm hman tum

 

Mizoramah Biometric Enrolment tih leh Aadhaar card siam hna chawlhsan mek a ni a; Mizoram sorkar chuan ruahmanna thar siamin, September 2016 chhungin tih chhunzawm leh theih tuma hmalak mek a ni.

Aizawl DC pisa aṭanga thu dawnna chuan, Aadhaar card siam turin thlalak leh thil ṭul dangte tih theih a ni tih lo tih a sawi a, “Aadhaar card siam hna hi thla tharah ti ṭan leh hman kan inbeisei a, mahse, kan ti thei ngei dawn em kan hre rih lo,” a ti.

Mizorama Biometric Enrolment leh Aadhaar buaipuitu hi ECIL an ni a, anni hian a tak taka hna thawk turin Lyra Consultancy Service leh Integrated System Service-te an ruai leh chhâwng a ni. Aadhaar card siamtute inkarah inhmuh thiam lohna a awm avangin Aadhaar siam thei a nih rih lo.

Hetih lai hian, kum 2014 china Aadhaar card siamtir tawh, la la chhuak lote tan DC pisaah ngaihven theih a ni thung.

Aizawl DC pisaa SDC chuan, Mizorama Aadhaar siamtute chu hna ṭan leh tawh turin sorkarin a nawr ve reng tih a sawi a, “An la intilungawi chuang lo a. Mipui mamawhna a san avangin sorkarin ruahmanna a siam a, company-te’n hna an chhunzawm lo a nih chuan company ruai tawh loin, sorkarin thawktu bik tur lain kalpui a tum,” a ti.

Mizorama biometric enrolment tih Aadhaar card siam leh theihna tur hian General Administration departmnent leh ICT department chuan an bawhzui mek. Mizoram sorkar hmalakna enpuia bawhzui turin Unique Identification Authority of India addl. director

general Piyush Chhetya chu August 18 hian Guwahati aṭangin Aizawlah a lo kal dawn a ni.

Thu dawn danin, Aadhaar hi kum 5 chin chung lamah tih a ni a, Mizoramah 50% velin an ti tawh a, Aizawl district bikah chuan 60% velin an ti tawh a ni.

Mipuiin eirawngbawlna gas an lâk a, sorkarin a man a tum ṭhensak (subsidise)-na sumte chu July 1, 2016 aṭangin bank leh gas agency-a Aadhaar card number thehlut lote hnenah thun a ni lo. Gas agency leh bank-a Adhaar card number la thehlut lote tan September 30, 2016 thleng thehluh theih a ni a, chumi chhunga thehlut hmante chu July 1 – September 30, 2016 chhungin gas an leina subsidy pawisa lut rih lo mah se, a hnuah a lût leh tura tih a ni.

June 2016 thleng khan Mizorama gas agency hrang hrangah regular customer 2,20,990 an awm a, chu’ng zinga 43,995 te chuan Aahdar card thehlut tawhin, chinfel sak an ni tawh. Bank leh gas agency-a Aadhaar card number thehlut lo 1,76,995 an awm. Gas agency-te hnena an bank account thehlut tawh chu 2,06,651 an ni a, la thehlut lo mi 14,339 an awm bawk.

Gas subsidy atan bank-ah Aadhaar card number thehluh ngei phût a nih avangin Mizoram sorkara Food Civil Supply & Consumer Affairs (FCSCA) department chuan July 12, 2016 khan Ministry of Petroleum & Natural Gas hnenah ngaihhnathiam tura ngenna an thawn a; mahse, tun thlengin chhanna an la dawng lo nia thu dawn a ni.

– See more at: http://www.vanglaini.org/tualchhung/58994#sthash.Tg5EIUPV.dpuf

Facebook Comments

Add a Comment