Posted on

State Library-in lehkhabu 60,056 an nei mek

State Library-in lehkhabu 60,056 an nei mek

Mizoram State Library chu nimin khan MJA Public Library hruaitute’n tlawhin, lehkhabu pindan hrang hrang an fang. State Library-ah hian kumin July thla tawp thleng khan member 5,896 an awm a, lehkhabu 60,056 an nei mek.

MJA member-te hi State Library-a librarian Lalramliana leh assistant librarian Zirsangzuali ten an lo dawngzawng a, thil pawimawhte an sawiho.

Lalramliana chuan, an awmna hmun a fuh tâwk loh avangin tlawhtu an nei tlem tih a sawi a, “A thawktute hi chu kan nuam a, building pawh kan nei ṭha a; mahse, mipui tana a chhawrnahawm lo leh hmang ṭangkaitu an tlem hi hrehawm kan ti hle a ni,” a ti.

Lalramliana chuan, State Libra­ry-a member-te leh an lehkhabu neih zawng zawngte chu computer-ah an thun lut vek tawh tih sawiin, “Lehkhabu duh bik zawn chhuah a awlsam phah hle,” a ti. State Library hnuaiah Mizoram chhungah recognised library 485 a awm mek thu a sawi bawk.

State Librarian-in a sawi danin, Mizoram State Library-ah hian lehkhabu 60,056 awm mekin, chungte chu naupang chhiar chi 4,885, Hindi 15,283 leh a dang zawng (general) 39,888 a ni. Library member 5,896 an nei mek a, chungte chu puitling 5,011 leh naupang 885 an ni.

Mizoram State Library hi tun hma angin tlawhtu an ṭhahnem tawh lo a; a awmna hmunin a zir loh vang leh Mizo mipui, a bikin ṭhalaite’n lehkhabu an chhiar an uar tawh loh vangah thawktute chuan an ngai.

July 2016 chhung khan tlawhtu mi 191 chiah an nei a; chu’ng zinga 76 chu zirlai niin, pakua chu zirlai naupang an ni. July thla chhung vek khan lehkhabu hawh chhuaktu mi 106 an awm a, puitling 78 leh naupang 28 an ni.

Ni tin chanchinbu Mizo 11 leh English pathum an la mek a; chanchinbu dang (magazine) Mizo pakua leh English 10 an la bawk.

Mizoram State Library hotute chuan, State Library chu hmang ṭangkai tur leh tlawh fo turin Mizo mipui an sáwm a; naktuk, Zirtawpni hian Chanmari YMA Hall-ah Librarian’s Day hman an tum.

– See more at: http://www.vanglaini.org/tualchhung/58839#sthash.EAP4UpgQ.dpuf

Facebook Comments
Leave a Reply