Posted on

Football zirna changtlung din dan tur sawiho

Football zirna changtlung din dan tur sawiho

Mizoram Football Association (MFA), Tata Trusts leh NEIDA aiawhte chuan August 2, 2016 chawhnu khan Sports & Youth Services Minister pisaah Sports minister Zodintluanga leh Social Welfare minister PC Lalthanliana an kâwm a, footbal zirna changtlung zawk, Centre of Excellence din dan tur an sawipui.

Zodintluanga chuan, “Sorkarin infiamna hmunhma ṭha kan siam a, ṭhalaite leh naupang zawkte tan sum nei lo chung chungin kê kan pên a. Football zirna changtlung tak din duhtute’n min kal chilh ta mai hi a lawmawm. Sorkar aṭanga puihna awm thei ang apiangin kan pui ang. MFA hnathawh ṭhat hi India ramin a hre tawh tih kan hmu a, football zirna ṭha tak kan neih belh tur hi a phûrawm hle,” a ti.

PC Lalthanliana chuan, tun hnaia infiamna lama hmasawnna chu lawmawm a tih thu sawiin, “Kan department hmunhmate football academy-in mamawh an neih chuan hmantir kan inpeih. Zirna mumal taka football kalpuina tur, a hmuna riahchilha ṭha taka an zirna tur din tum a ni hi a lawmawm,” a ti a; talent nei ṭhate inzirna tur a awm tur chu a phûrpui thu a sawi.

Tata Trusts-a head of sports Anand Datla chuan, minister-te’n an lo dawnsawn danah a lawm thu sawiin, “Mizoramah hian Tata Trusts hmalaknain football zirna changtlung tak kan din thei ngei ang. A rang thei ang bera bul tan kan duh a, a kalpuina tur sum pawh dah hran a ni tawh,” a ti.

MFA honorary secretary Lalnghinglova Hmar chuan, “Tata Trusts, U-Dream, MFA leh sorkar thawhhonaa football zirna ṭha din tur hi MFA chuan a nghakhlel tawh a, hmun danga football zir tura intirh chhuah a ṭhat rualin, mahni state ngeia football zirna ṭha neih hi kan suangtuah ṭhin. Tata Trusts, U-Dream leh sorkar zarah kan nei thei dawn niin a lang,” tiin a sawi.

Minister pahnih hmuhnaah hian MFA aiawhin treasurer Tuikhuahthanga, finance secretary Lalruatsanga Tochhawng leh NEIDA senior project associate Jacob Lalṭhazuala te an tel.

MFA leh Tata Trusts ṭang dun hian U-Dream thawhpuiin Aizawlah football zirna changtlung tak, Centre of Excellence din tumin ruahmanna an kalpui mek a; Tata Trusts-in sum an tum ang a, U-Dream kaihhruainain MFA-in Mizoram sorkar nen ṭangkawpin an kalpui ang.

Tata Trusts leh U-Dream hian Germany-a football zir turin India hmarchhak aṭangin naupang 30 vel tirh an tum mek a, chu’ng zinga a tam ber chu Mizoram aṭanga thlan an ni a; kumin September-ah Germany pan hman tura beisei an ni. Centre of Excellence an din tur aṭangin naupang ṭha zualte Germany-a tirh zel tumin ruahmanna an siam bawk

– See more at: http://www.vanglaini.org/tualchhung/58504#sthash.ltkJ4Y1P.dpuf

Facebook Comments
Leave a Reply