AIR-in golden jubilee pualin kawng zawh

AIR-in golden jubilee pualin kawng zawh

All India Radio (AIR), Aizawl station chuan an kum 50-na lawmna kal mekah nimin zing khan Aizawlah cancer veite pualin kawngzawh (walkathon) an buatsaih a, IPR minister Lal Thanzara’n a hmanpui.

Kawngzawh ṭan hmaa AIR, Aizawl pisa tuala inkhawm tâwi buatsaihah minister Lal Thanzara chuan, AIR Aizawlin kum 50 a tling ta chu a lawmpui thu sawiin, “Radio kaltlanga mipui rawngbawlna hna an thawh hi ram leh hnam tan malsawmna a ni,” a ti.

Lal Thanzara chuan, Aizawla AIR station puitling awm hmaa Gauhati leh Shillong aṭanga Mizo programme an tihchhuah hun laite thlirin, khaw khata mi neinungte chauhin radio an neih phâk avanga Mizo programme tihchhuah chânga ṭhenawm khawveng an kalkhawm ṭhinte chu lunglenthlak a tih thu a sawi a, “Kum heti zat bahlah lo leh hmasawn zawnga programme an kaltir thei zel hi a lawmawm hle a ni,” a ti.

IPR Minister chuan, AIR Aizawl kum 50 tlin lawmna puala cancer veite ṭanpuina tur ruahmanna an siam chu fakawm a tih thu sawiin, sum leh pai thawhtu mi ṭhahnemngaite hnenah lawmthu a sawi a ni.

AIR Aizawl Walkathon-ah hian zing dar 6:30-ah AIR Aizawl Station aṭanga Millennium Centre kawt thleng kawng zawh a ni a; Millennium Centre kawta a khârna inkhawmah minister Lal Thanzara’n cancer veite ṭanpuina tura sum thawhkhawm Rs. 1,70,830 chu Mizoram State Cancer Institute director Dr Thangchungnunga hnenah a hlan.

AIR Aizawl golden jubilee ní tak chu July 31 a ni a, Pathianni a nih avangin vawiin hian Vanapa Hall-ah a lawmna pui ber an hmang dawn a, chief minister Lal Thanhawla khuallian a ni ang.

AIR Aizawlah hian thawktu 77 leh a ṭul huna koh theiha (casual) thawk eng emaw zat an awm a; ni tin primary channel leh FM Zoawi-ah darkar 22 chhung an tichhuak ṭhin a ni.

– See more at: http://www.vanglaini.org/tualchhung/58259#sthash.IJ39hKc3.dpuf

Facebook Comments

Add a Comment