Aizawlah lirthei khû endik chhunzawm

Aizawlah lirthei khû endik chhunzawm

Mizoram Pollution Control Board (MPCB), Transport department leh Traffic police-te ruahman angin tunlai hian Aizawlah lirthei khute endik mek a ni. Lirthei khu endik hi July 20, 2016 khan kalpui thar leh ṭan a ni.

Traffic police leh Transport depart­ment hnuaia MVI-te chuan Aizawla hmun remchang laiah lirthei khu nasa zualte an endik a, Pollution Under Control Certificate (PUCC) an neih leh neih loh an enfiah ṭhin. Traffic SP C Lalthanmawia chuan, mipuite’n harsatna an tawh loh nan khawpui chhung hmun remchang laiah lirtheite chu endik a nih thu a sawi.

Endikna paltlang lote chu sum chawitir nghal loin, an lirthei lehkha pawimawh (document) leh driving licence-te hrènsak phawt an ni a, PUCC an neih hunah pek kîr leh tur a ni. August 15, 2016 hnu lamah chuan endikna paltlang lo leh PUCC nei lote chu a ṭul anga sum chawitir an ni tawh dawn.

MPCB member secretary C Lalduh­awma chuan, Central Motor Vehicle Act-in a phût angin, lirthei khû (emission) chu Mizoramah kum 2012 aṭangin endik ṭan a ni tih sawiin, mipuiin an hriatthiam tâwk loh bakah, thawktu indaih lohna vangin a nih tur ang taka kalpui a ni rih lo tih a sawi a; tunah chuan dan ang taka bawhzui tum a ni tih a sawi.

Lirthei khû endikna hi Aizawlah chuan New Secretariat Complex, Ngaizel, Bawngkawn leh Zemabawkahte a awm a;  chungahte chuan lirthei eng chi pawh endik theih a ni. Tuikhuahtlanga MPCB pisaah pawh two wheeler bik an endik thei. District dangah chuan Lungleiah chiah lirthei khu endikna khawl dah a la ni.

Lirthei khû endiktir man chu two wheeler-ah Rs. 50, LMV-ah Rs. 100, MMV-ah Rs. 120 leh HMV-ah Rs. 150 a ni a; PUCC pek chhuah tawh chu thla ruk a dam a, thla ruk hnuah endiktir zel a ngai.

Endiknaa tling lote chu an tlin theih nan lirtheite siamṭhatna hun pek an ni a, chumi hnuah endiktir leh tura tih an ni. PUCC nei lote chu Rs. 1,000 chawitir theih an ni a, ṭum khat aia tam mante chu Rs. 2,000 chawitir theih an ni.

Lirthei khu endik kawnga hmalakna thar a awm leh tâk hnuah New Secretariat Complex-a kawng pêngṭhuam (Zero Point)-a lirthei khû endiknaah chuan lirthei khu endiktir tum ṭhahnem tak an awm. Endiktute sawi danin, a hma chuan ni khatah mi 10 vel chauhin an endiktir ṭhin a, July 20 leh 21 kha chuan mi 200 vel ve ve an endik hman tih an sawi.

– See more at: http://www.vanglaini.org/tualchhung/57862#sthash.aw9kTN1U.dpuf

Facebook Comments

Add a Comment