CHIEF SECRETARY HOVIN AIZAWL HMASAWNNA ‘VISION 2030’ SAWIHO

CHIEF SECRETARY HOVIN AIZAWL HMASAWNNA ‘VISION 2030’ SAWIHO

Vawiin khan Chief Secretary Pu Lalmalsawma, IAS hovin Aizawl khawpui hmasawnna tur ruahmanna thar ‘Vision 2030’ sawiho a ni a. He meeting Chief Secretary’s Conference Hall-a neihah hian UD&PA Secretary Dr.C.Vanlalramsanga, AMC Mayor Pu PC Lalhmingthanga, AMC Dy. Mayor Lalringliana, AMC Commissioner Dr.H.Lalthlangliana, EE SIPMIU Pu ZD Lalrotluanga bakah UD&PA, SIPMIU leh AMC aiawh officials engemawzat an tel.

‘Vision 2030’ sawihonaah hian AMC leh SIPMIU ten Aizawl khawpui hmasawnna leh cheithatna tura ‘Masterplan for Aizawl : Vision 2030’ an duan chu power presentation nen an sawifiah a. Aizawl khawpui thanlen zelna tur atana ruahmanna an chhawpte zingah traffic & transportation, tunnel (Rangvamual-World Bank Road leiverh tlang), parking lot & multi-storied parking, solid waste management, water supply leh community toilets chungchang tarlan a ni a. Tun dinhmunah Aizawl khawpui chhungah streetlight awm zawng zawng zinga 68.42% chu chhit en theih a nih laiin 31.58% chu a eng thei lova; a chhiate siamthat bakah streetlight 15,000 dah belh a, kawlphetha hek lo zawnga LED bulb vek hman tura rawtna siam a ni bawk. Aizawl khawpui thang zelah mumal zawka insak a nih theih nan ‘Control of Buildings/Development’ chu hmang tanin Building Regulations awm sa siamthat te rawt a ni a. Kumin October 2016 atangin Aizawl khawpui ‘Building Audit’ neih tan a nih dawn bakah Mizoram Larsap-in a ngaih pawimawh em em ‘Safety Building Audit’ pawh tih theih turin ruahmanna siam chho a nih tur thu tarlan a ni.

Meeting Chairman Chief Secretary Pu Lalmalsawma chuan Mizoram chu lirnghing, leimin leh chhiatrupna dangte thleng thut theihna ram a nih avangin Aizawl Masterplan-ah pawh disaster management lam ngai pawimawha chhiatrup thlen thulah mipuite him theihna tur kawng hrang hrang duang tel turin a hrilh.

Facebook Comments

Add a Comment