MIZO NULA LALRINTLUANGI CHUAN MOUNT EVEREST A LAWN CHHUAK

Lalrintluangi leh a thiante hi team member 10 niin All India NCC Girls Expedition team an ni a, Northeast India atangin amah chiah a tel. Lalrintluangi leh a thiante hian May ni 18 khan base camp atangin camp 2 an pan a, camp 2-ah hian ni 18 zan an riak a, ni 19-ah camp 2 atangin camp 3 panin an chhuak leh a, May ni 19 zan camp 3-ah riakin nimin May ni 20 khan camp 3-ah an chawl hahdam a. Nizan khan camp 4 panin an chhuak leh ta a ni. Rei lo te camp 4-a an chawlh hnuah nizan dar 8 khan tlang chhip lawn turin camp 4 an chhuahsan a, tukin May 21 zing dar 6:30 vel khan 1st team te chuan tlang chhip an lawn chhuak (summit) a, Rintluangi te hian vawiin chawhma dar 11 vel khan tluang takin khawvela hmun sang ber, Mount Everest chhip an lawn chhuak ve ta a ni.

Mizo zinga Mount Everest lawn chhuak hmasa ber Pu David Zohmangaiha chuan Mizo hmeichhia Lalrintluangi’n khawvela tlang sang ber a lawn chhuak chu thinlung taka a lawmpui thu sawiin “tlang chhip lawn chhuah hnua a hawn leh lam kawng hi a hautak em em a, chhuk kal a nih avangin chetsual a hlauhawm a, an lawn chhuah tawh avangin an mahni rilruah phurna leh fimkhur tawk lohna a awm palh fo thin a, chesual palh an awm fo a, lawn lam aiin chhuk lama chesual hi an tam zawk a ni” a ti.

Tluang taka base camp an rawn thlen leh theih nan Mizo mipui ten i tawngtaipui ang u.

Tun dinhmunah hian Lalrintluangi te hi biak pawh theih an ni tawh rih lova. Tluang taka an rawn kir theih chuan naktuk zing lamah base camp an thlen leh theih beisei a ni.

Tlang chhip atanga an hawng lam hi mahni thiam ang angin an kal miah miah tawh mai thin a, mimal tinin guide pakhat (Sherpa) an nei theuh a, an mahni buai buaiin an buai thla mawp mawp tawh mai thin niin Everester Pu David Zohmangaiha chuan a sawi.

Lalrintluangi (19) hi Dawrpui vengthar nula niin KM Higher Secondary School-a pawl 12 zirlai a ni a, Pu Lalbiaknipuia leh Pi Zirthangi te fa 5 zinga naupang ber dawttu a ni.

Mizo zingah Pu David Zohmangaiha chuan kum 2013 May ni 18 khan Mount Everest hi a lo lawn chhuak tawh a, Larintluangi hi a pahnihna niin, a ni hi Mizo hmeichhia khawvel hmun sang ber lawn chhuak thei kan neih hmansak ber a ni. A lawmawmin a ropui a, a chhuanawm takzet a ni.

Courtesy: Vanneihthanga Vanchhawng

Facebook Comments

Add a Comment