Posted on

INDIAN AMBASSADOR-TE LEH SORKAR MI PAWIMAWHTE INKAWM

Mizorama cham mek Indian Ambassador to Phillipines Pu Lalduhthlana Ralte, IFS leh Indian High Commissioner to Malawi Pu Vanlalhuma, IFS te chuan vawiin khan Industries Minister Pu H.Rohluna, Home Minister Pu R.Lalzirliana leh Chief Secretary Pu Lalmalsawma, IAS te chu an office chamber-ah lengin Ministry of External Affairs (MEA) leh Mizoram State inkara thawh hona tha zawk awm theih dan tur kawng hrang hrang an sawipui.

Ambassador pahnihte hi Pu H.Rohluna, Minister, Industries, Trade & Commerce, etc. pisaah lenglut hmasain Prime Minister-in MEA leh state te inkarah inlaichinna tha zawk awm tura a duh avangin ram palaite chu state hrang hrangah a tirhchhuah angin Mizoram rawn tlawh an nih thu Minister an hrilh a. Minister hi Parliamentary Secretary Pu Joseph Lalhimpuia bakah a department chan hrang hrang hotuten an tawiawm a, ram palaite hnenah Mizoram hmasawnna tura MEA dawr tulna hrang hrang an lo thlen a ni. Kolodyne Multi Modal Transit Project chungchangah sorkar laipuiin chak zawka kalpui an duh thu te; Kaupuichhuah-a Integrated Checkpost atana pawimawh tak Theka Lui chunga double-lane lei dawhna tur Bangladesh sorkar atangin Clearance sawifel sak te; India leh Myanmar sorkarten Zokhawthar leh Rih-ah ‘Visa on Arrival’ tih phalsak te; Hnahlan, Zote, Vaphai leh Pang khuaa ‘border haat’ atana mamawh Tiau lui chunga lei dawh nana sum mamawh chungchangte leh Phillipines rama Mizo handloom leh handicraft sumdawnna hmalakpui theih dan turte an sawiho.

Ram palaite hian Home Minsiter Pu R.Lalzirliana chu a pisaah tlawh lehin foreign policy, a bik takin Indo-Myanmar leh Indo-Bangladesh inkarah Mizoramin hmun pawimawh tak a luah theih thu an sawi a. Home Minister hi Parliamentary Secretary Col(Rtd) ZS Zualan a tawiawm a, Mizoram chu state ralmuang bera hriat a nih avangin ramri ven hna tha taka an thawh theih nan leh state chhungah boruak muanawm tak a awm zel theih nan Mizoram Police-te thawmthat nan sum mamawh dan te an hrilh a. Passport chungchangah mipuiten harsatna an tawh thin dan Ambassador-te hnenah an thlen bawk a, Passport Office-a thawkte chuan mipui an lo dawnsawn dan leh passport pawh a rei lo theih ang bera an lo tihfel sak theih nan a tan la turin Home Minister hian a ngen a ni.

Ambassador pahnihte hian vawiin vek khan Chief Secretary Pu Lalmalsawma chu a pisaah tlawh lehin Mizoram sorkar leh MEA inkara thawhhona tha zawk a awm theih nana lo kal an nih thu an hrilh a; Chief Secretary chuan Prime Minister-in MEA kaltlanga state-te mamawh leh duhdan hre tur a hmalakna chu fakawm a tih thu a hrilh. Sorkar mi pawimawhte an hmuh hnuin Ambassador-te hian Passport Seva Kendra Office tlawh nghalin Dy. Passport Officer Pu C.Vanlalhruaia nen an inkawm a; state tinah MEA hmelhmai chu Passport Office-te an nih avangin mipuiten passport chungchanga an rawn dawrnaah hawihawm taka lo dawngsawng thin tur leh passport chungchangah pawh fel leh rang thei ang bera bawhzui sak turin an chah a ni.

Facebook Comments
Leave a Reply