Buh leh bâl thar chhuah tam dan tur leh Ram neih dan siamthat dan tur sawiho

Buh leh bâl thar chhuah tam dan tur leh Ram neih dan siamthat dan tur sawiho

Planning & Programme Implementation department leh All Mizoram Farmers Union (AMFU) ṭangkawp chuan, nimin khan Aijal Club-ah ram neih dan kalhmang siamṭhat leh buh leh bâl thar chhuah tam zawk theih dan tur dapna chungchanga inrâwn­khawmna an buatsaih a; Planning minister Lalsawta’n a hmanpui.

Planning Minister chuan, ram neituin a ram ṭangkai loa a dah a, ram dan anga chhiah rit tak pêk a ngaih reng dawn avangin eng emaw ti kawng tala ram hman ṭangkai a nih loh theih lohna atan kalphung thar neih a pawimawh thu a sawi a, “Kan pi leh pute tih dan, kum za aia tam kan hman tawh hi system thar hmanga kan thlak a hun. Kalphung tharah chuan kan ṭhalai tam tak hna thawh tur nei lote hian lo neitu hausa nih tumin an thiamna hmangin lo neitu nih an châk tawh dawn a ni,” a ti.

Nun dan leh tihphung sawh danglam dâwrh khawpa kal loh chuan hmasawn lêm loin Mizote an thên mai mai dawn nia sawiin Lalsawta chuan, “Theihtawp chhuah­in a ṭha ber tur thlirin kan kal dawn. A damdawi a lo kha deuh a nih pawhin a ṭhatna tur thlir thiam a, dawhtheihna nen thláwp turin mipuite ka ngen a ni,” a ti a; kalphung thar hmanga Zoram nuam siampui turin mipuite a sáwm.

State Planning Board vice chairman H Liansailova pawhin thu sawiin, agriculture leh eco­nomic lama hmasawnna thleng tur chuan land administration leh human resource development a pawimawh hmasa ber tih a sawi a, “Ram neih dana kan sûkthlêk kan thlak loh chuan hma kan sâwn tak tak thei dawn lo. Mi hausa leh thil ti theite’n ram zau tak tak an nei a, khawpui hnaia ram zawng zawng mimal ta a nih vek ṭhin avangin hmasawnna hna thawh dawnah pawh bul ṭan theih loha zùzî ta a awm fo a ni,” a ti.

Seminar hawnnaah hian AMFU general secretary Zion Lalremruata’n seminar buatsaih chhan leh a kalphung a sawifiah.

Technical session-ah All India Kisaan Sabha (AIKS) joint secretary Dr Vijoo Krishnan, AMFU finance secretary Dr Chawngkhuma Chawngthu leh AMFU adviser Dr Robert S Halliday ten thupui hrang hrang an sawi a; Mizoram sorkara thlen tur rawtna eng emaw zat chhawpchhuah nghal a ni.

– See more at: http://www.vanglaini.org/tualchhung/55469#sthash.3vBpQUt4.dpuf

Facebook Comments

Add a Comment