Posted on

AIDS vanga thite sûnna hun hmang

AIDS vanga thite sûnna hun hmang

Positive Network Women of Mizoram (PWNM), UNAIDS, CARE-World Vision leh Agapia Sical Centre-te chuan nimin khan IPR Auditorium-ah AIDS vanga thite sûnna hun, ‘International AIDS Candle Light Mermorial Service’ an hmang a, Health minister Lal Thanzara’n a hmanpui.

Lal Thanzara chuan, HIV/AIDS-in nasa takin Mizoram a rún mek tih sawiin, “Mihring zat aṭanga teha HIV/AIDS tamna ber dawttu state kan ni hi a tlungchhiahthlak tak zet a ni,” a ti a; he hunah hian AIDS vanga thite sûn nan bati chhit a ni.

HIV/AIDS chu sorkar leh MSACS ringawtin an do hneh chi a nih loh avangin kohhran leh pawl dangte leh Mizo mipuite’n rálpui phiara an do a ngaih tawh thu a sawi a, “Kohhran leh mi tinte’n beihpui kan thlak a hun tak zet a ni,” a ti.

MLA-te pawhin HIV/AIDS do nan ṭan an la tih sawiin Lal Thanzara chuan, MLA 40-te’n HIV/AIDS dona atana Rs. 1,00,000

ṭheuh an thawh aṭangin HIV hrik pâite enfiahna khawl, CD4 Count Machine lei thar a ni a, June 6, 2016-ah Aizawl Civil Hospital-ah bun fel a nih tur thu a sawi.

Health Minister chuan, MLA 40-te sum thawh hmangin blood bag, hriau (syringe leh needle), condom leh ṭul dangte lei a nih thu a sawi a; Aizawl Civil Hospital (ACH) RKS Committee-te May 27, 2016-a ṭhukhawm chuan ACH-a ART Centre-a inentirna (investigation) zawng zawng HIV veite a thlawna tih a phalsak thu a puang bawk.

Khualzahawm Chandra Kanto Molsom, CARE-World Vision India-a project manager chuan, Mizorama khaw 80 chuang a tlawh tawhnaah HIV/AIDS chungchang hre lo tam tak an la awm thu a sawi a; HIV/AIDS chu a darh nasa hle tih sawiin, “Electric current leh motor la luh lohna khuaah pawh HIV/AIDS chu a lut tawh a ni,” a ti.

PWNM president Vanlalruati sawi danin, khawvel pumah May thla Pathianni hnuhnung berah ‘International AIDS Candlelight Mermorial Service’ hman ṭhin a ni a, kum 1983-ah hman ṭan niin, Mizoramah chuan kum 2006-ah hman ṭan a ni.

AIDS vanga thite sûnna inkhawm hi Robert Lalrempuia Khiangte-in a kaihruai a; ACH medical superintendent Dr KL Remsanga, MSACS project director Dr Lalmalsawmi Sailo leh HIV hrik pâi mi eng emaw zat an tel.

Kohhran leh NGO hruaitute nen HIV/AIDS vei enkawlna a kaihhnawih chungchang sawihona hun hman a ni bawk.

– See more at: http://www.vanglaini.org/tualchhung/55473#sthash.dIHzOusX.dpuf

Facebook Comments
Leave a Reply