Posted on

Mizoramah PRRS léng mek zel District hrang hranga vawk an thih belh

Mizoramah PRRS léng mek zel District hrang hranga vawk an thih belh

Mizoram disrtrict ṭhenkhata Porcine Reproductive & Respiratory Syndrome (PRRS) léng vanga vawk thi chu a tlahniam tial tiala hriat a ni a; chutih rualin, ni tin deuh thaw vawk thi a la awm. Hetih lai hian, tun hnaia Ser­chhipa vawk natna hri léng chu PRRS a ni tih an finfiah tawh.

AH&Vety director Dr Saingura Sailo sawi danin, AH&Vety doctor-te chuan Serchhipa vawk thi 30 thisen leh tîsâ an endik aṭang-

in PRRS vei 18 hmuh chhuah a ni a, May 28 thleng khan Serchhip district-ah hian vawk 35 a thi tawh niin an hria. Thenzawla vawk thite erawh chu PRRS vanga thi an ni lo.

AH&Vety Director chuan, PRRS chu tun hma angin a thawk na tawh lo a, mahse, hri chu vawkah lang chhuak nghal mai loin, hun eng emaw chen a dam theih avang­in, vawk chak lohlai leh taksa chauh deuh laiin a lo lang chhuak leh thei tih a sawi.

PRRS vanga vawk an thih tamna ber district – Champhai district-ah chuan vawk an la thi zauh zauh reng a, May 27 thleng khan vawk 2,702 a thi tawh a, chung zinga pasarih chu May 26-a thi an ni.

Champhaiah hian AH&Vety department chuan tun hnai khan Town Hall-ah PRRS hri léng lo do lêt dan tur leh inven dan zirtirna an buatsaih a; AH&Vety-a Disease Investigation Wing officer Dr Esther Lalzoliani chuan, PRRS chu kum 1987-ah USA-ah a lên

ṭan thu sawiin, “PRRS hri vei tawh vawk dam leh tate hi hriléng pu darhtu an ni thei. Hri vei dam leh vawk vulh chhunzawm a nihin chi thlah kawngah harsatna an neih tawh ṭhin avangin talh mai a ṭha zawk,” a ti.

PRRS laka fihlim vek tur chuan a vei tawh vawk zawng zawng tihral vek a him ber tih sawiin, Dr Esther Lalzoliani chuan, “Tun

ṭuma PRRS hri léng bul ṭantu hi kum 2013-a hri vei vawk dam lehin a thehdarh nge, hmun dang aṭanga lak luh put darh zawk tih chiang taka hriat a ni lo,” a ti a; PRRS ṭâi darh ṭanna tak chu mithiamte’n Bhopal-a an enfiahna aṭangin a hriat theih tur thu a sawi.

– See more at: http://www.vanglaini.org/tualchhung/55294#sthash.fU7lfdqS.dpuf

Posted on

Aizawl District Athletics Meet

Aizawl District Athletics Meet
2nd Aizawl District Open Athletics Meet 2016 chu May 25-26 chhung khan Rajiv Gandhi Stadium, Mualpuiah neih a ni a, kum 2016-2018 hruaitu tur thlanna neih nghal a ni bawk. Athletics Meet 2016-ah hian Aizawl District chhunga mimal, club, association leh institution hrang hrang aṭangin infiammi ṭhahnem tak an inlan. Running Event, Throwing Event leh Jumping Event hmang te a inelna hi neih a ni.

Aizawl District Athletics kum 2016-2018 hruaitute

President:H. Lalramhluna,Chanmari West

Vice President: C. Zairemthanga Bethlehem VT

Secretary: Lalhnunhlua Mission Veng

Asst. Secretary: Zorammuana Zemabawk

Treasurer: Ramngaihzuala Zemabawk

Fin, Secretary: Lalbiakhluna Pachuau Chaltlang

Inelna hrang hranga pakhatna te

Running Event

100m(M)

Lalsangbera Dawrpui

100m(W)

Ramtharnghaki Mission VT

200m(M)

V. Lalhmachhuana Ramhlun South

200m(W)

Ramtharnghaki Mission VT

400M(M)

Kishan Guala Armed Veng

400M(W)

Ramtharnghaki Mission VT

1500m(W)

Ramtharnghaki Mission VT

3000m(M)

Kishan GualaArmed Veng

Throwing Events

Shot Put(M)

Jeremy Vanmalsawma Republic Veng

Shot Put(W)

Ramengmawii Sailo Ramhlun Venglai

Javelin Throw(M)

Remruatpuia Republic

Javelin Throw(W)

Laldikmawii Bawngkawn

Discuss Throw(M)

Jeremy Vanmalsawma Republic Veng

Discuss Throw(W)

Ramengmawii Sailo Ramhlun Venglai

Jumping Event

Long Jump(M)

Alan Lalruatfela Mission VT

Long Jump(W)

Ramtharnghaki Mission VT

High Jump(M)

David VanlalhriataMission VT

High Jump(W)

Ramtharnghaki Mission VT

– See more at: http://www.vanglaini.org/infiamna/55215#sthash.nxKx4v5l.dpuf

Posted on

Bairabi – Silchar rel tlan tur Prime Minister-in a vai liam

Bairabi – Silchar rel tlan tur Prime Minister-in a vai liam

Bairabi leh Silchar inkarah nimin khan khualzin (passenger) phur rél lian a tlân ṭan. Khualzin rel hi nimin tlai khan prime minister Narendra Modi chuan video conferencing hmangin Shillong aṭangin a vailiam a; Bairabi rel chawlhhmunah he mi pual hian inkhawm buatsaih a ni.

Bairabi chawlhhmuna khualzin rél lut hian nimin chawhnu khan Assam-a Katakhal railway junction aṭangin Bairabi a pan a, tluang takin Bairabi a thleng. Tlai dar 4-ah Bairabi aṭangin a chhuak a, Silchar a pan.

Bairabi thlenga rél lian kawng siam thar hi Railways safety commissioner SK Pathak-a’n May 24 leh 25 khan a enfiah a; a him tawka an hriat avangin rêl hi tlantir ṭan a ni.

Khualzin phur rél vailiam pual hian nimin chawhnu khan Bairabi-ah inkhawm buatsaih a ni a, minister of state Lalrinmawia Ralte, parliamentary secretary lt. col ZS Zuala leh PC Zoram Sangliana MLA ten an hmanpui.

North East Frontier Railways siam khualzin phur rél lian hi ni tin Bairabi aṭangin a chhuak dawn a, Silchar thleng chuan man Rs. 35 a ni a, Silchar thlen hma Lala Bazar thleng chuan man Rs. 25 a ni ang.

Rel hian zing dar 5:45-ah Bairabi a chhuahsan ang a, zing dar 9:15-ah Silchar a thleng ṭhin ang. Silchar aṭangin tlai dar 4:45-ah chhuakin, zan dar 8:15-ah Bairabi a thleng ṭhin ang.

Bairabi-a khualzin phur rél tlantir rual hian, Jiribam leh Silchar inkarah te, Kamakya leh Vaisodevi inkarahte khualzin phur chi rel tlantir a ni bawk a; chungte pawh chu PM Narendra Modi-a’n Shillong-a aṭangin a vailiam a ni.

Tarlan tawh angin, Bairabi rél kawng hi rél lian chi tlân theih turin tihlen a ni a, March 21, 2016 khan rél lianin buhfai wagon 40 phurin Bairabi a thleng ṭan a ni.

Hetih lai hian, Railways safefy commi­ssioner SK Pathak chuan nimin khan Sairang leh Sihhmui inkara rél kawng siam dan tur leh Sihhmuia rel chawlhhmun siam dan turte a enfiah nghal a ni.

– See more at: http://www.vanglaini.org/tualchhung/55244#sthash.TxBXnUut.dpuf

Posted on

May 27 aṭangin Bairabi – Silchar inkarah Passenger phur rél lian a tlân ṭan dawn

May 27 aṭangin Bairabi – Silchar inkarah Passenger phur rél lian a tlân ṭan dawn
May 27, Zirtawpni aṭang hian Silchar leh Bairabi inkarah khualzin (passenger) phur rél lian tlan ṭantir a ni dawn a, video conferencing hmangin rél tlân tur hi prime minister Narendra Modi-a’n a vai liam ang.

Mizoram sorkar hnuaia Railways consultant Hrangtawna hnen aṭanga thu dawn danin, Railways Safety commissioner SK Pathak hoin May 24 leh 25 khan Bairabi-Silchar inkar kawnga passenger phur rél lian a tlan theih leh thei loh tur endik a ni a; May 24 khan trolley hmangin kawng laih dan, leilâwn leh kawng siam dante enfiah a ni.

Nimin khan speed trial neih a ni a; rélah mithiamte chuangin Bairabi-Silchar inkar kawngah an tlân chhin a, a him tawk leh him tawk loh an enfiah. Speed trail-a an an zir chianna aṭang hian rél tlân chak zawng tur an bithliah ang.

Rél hi Bairabi aṭangin km. 84-a thui Katakhal-ah a kal ang a, Katakhal aṭangin km. 28 vela thui Silchar-ah hian a kal leh dawn a ni.

Vanglaini palai zawhna chhangin Hrangtawna chuan, Bairabi-Silchar inkara rél tlan tur chu passenger phur rél lian pangngai a nih thu a sawi a, “A tlân hun tur vel chu Prime Minister-in a vai liam hnuah a hriat theih ang,” a ti.

Tarlan tawh angin, Bairabi rél kawng hi rél lian chi tlân theih turin tihlen a ni tawh a, March 21, 2016 khan a hmasa ber atan rél lianin buhfai wagon 40 phurin Bairabi a thleng a ni.

– See more at: http://www.vanglaini.org/tualchhung/55134#sthash.NE1aPlPU.dpuf

Posted on

Remna Ni a huhoa Hman dan tur rel

Remna Ni a huhoa Hman dan tur rel

June 30-a Remna Ni, Mizoram mipui leh pawl hrang hrangte’n a huhoa an hman dan tur sub-committee-in a ruahman chu nimin khan Remna Ni Organising Committee-in Central YMA office-ah an thlirho.

Meeting hi CYMA president Lalbiakzuala’n kaihruaiin, sub committee-in programme a duana siamṭhat ngai nia hriat

ṭhenkhat chu committee-in lo thlir nawn se tih a ni a, hei bakah hian he ni lawmna atana sum mamawh turte pawh sawi­ho a ni a, ram hruaitute leh pawl hrang hrangte pawhin sum mamawh hmuh theih dan tur lo ngaihtuah se tih a ni.

Khuallian atana prime minister Narendra Modi sawm chungchang pawh sawiho a ni a, a sawm tura ruat CYMA vice president Vanlalruata leh finance secretary Lalrochuanga ten May 19 khan Delhi-a PMO office-ah sawmna an thehlut a, a lo dawngtu PMO-a Officer on Special Duty chuan PM a lo pek tur thu a hrilh tih tarlan a ni.

Meeting-ah hian pawl leh kohhran hrang hrang aiawh mi 23 an tel.

– See more at: http://www.vanglaini.org/tualchhung/55129#sthash.2ZuGCf7t.dpuf

Posted on

Vanglaini – Ruahsur leh leimin vangin rel service khaihlak

Ruahsur leh leimin vangin rel service khaihlak

Hmarchhak bial hmun hrang hranga ruah sur leh leimin vangin Assam, Tripura, Manipur leh Mizoram-a rel service te chu a khaihlak mek. 

Northeast Frontier Railway (NFR) official chuan hmun hrang hrangah leimin chuan rel kawng a hnawh ping a, thenfai hna thawh mek a ni, a ti. Rel tlan tir leh tur hian ni hnih emaw ni thum vel a la ngai dawn niin a sawi a, tunkar tawp hi chuan dan pangaia tlan tir leh beisei a ni a ti. 

NFR official chuan Guwahati hmun hrang hranga kawng ping thenfai hna chu Engineer bakah district administration official te chuan an vil reng a ni,a ti bawk. 

Southern Assam-a Lumding leh Badarpur-ah te chuan Thawhṭan zan khan ruah nasa tak a sur a, hmun eng emaw zatah lei a min bawk. NFR chief public relations officer Pranav Jyoti Sharma chuan Guwahati leh Silchar service pali te chu tihtawp lailawk a ni a ti a, heng bakah hian Silchar-Sealdah inkara service Kanchanjunga Express leh Silchar-New Delhi via Guwahati Poorvattar Sampark service Kranti Express te chu tihtawp lailawk a ni bawk. 

Guwahati-Silchar railway line hi southern Assam-a district pali bakah Barak Valley, Tripura, Manipur leh Mizoram te chakkhai lakna ber a ni.

– See more at: http://www.vanglaini.org/hmarchhak/54831#sthash.DAGPhOkn.dpuf

http://www.vanglaini.org/hmarchhak/54831

Posted on

Vanglaini – Fed Cup champion ngei kan tum – Jeje

Fed Cup champion ngei kan tum – Jeje

Mohun Bagan-in I League-ah Aizawl FC an hneh loh hnuah an chesual zui a, Bengaluru FC lakah nomawi an chan. Mariners hian nomawi chawi miah loa season khar an tum lo a, Federation Cup-ah Aizawl FC lakah phuba lak an tum.

Mariners striker Jeje Lalpekhlua chuan, “I League kan chawi tak loah chuan Mohun Bagan tan chuan Federation Cup hi a pawimawh a, chetsual a thiang lo. Club hruaitute pawhin nomawi chawi ngei turin min fuih a ni. Ka tan chuan Fed Cup hi a pawimawh lehzual a, tun hi final ka vawi khat thlenna niin nomawi chawi ngei ka duh,” tiin Vanglaini palai a hrilh.

Hnahthial tlangval Jeje hian club football inelna lian pahnih I League leh Indian Super League nomawi a chawi tawh a, Federation Cup hi a lungthu kimna tur a ni.

Goal aia nomawi a dah pawimawh thu sawiin Jeje chuan, “Final-a goal khung a châkawm rualin nomawi chawi si loh chuan awmzia a awm lo. Ka duh ber chu champion a ni a, goal chu a nawmna ti famkimtu chauh a ni,” a ti.

Mohun Bagan striker Jeje hian goal ruk a khung tawh avangin top scorer tura rinkai a ni a, amah hnaih bertu Aizawl FC striker Joel Sunday-a’n goal li a khung tawh. Nizan khan Federation Cup-a champion ngun ber Kolkata club-in final khelhna tur Guwahati an thleng.

– See more at: http://www.vanglaini.org/infiamna/54826#sthash.qv0C4KSi.dpuf

http://www.vanglaini.org/infiamna/54826

Posted on

Sumdawnna lirtheite an nuar zel dawn

Sumdawnna lirtheite an nuar zel dawn

Commercial Vehicles Joint Action Committee (CVJAC) chuan, a ni hnihna atan nimin khan Mizoram pumah lungawi lohna an lantir a, sumdawnna lirtheite an tlân chhuak lo. CVJAC lungawi lohna hi vawiinah pawh chhunzawm leh a ni ang.

CVJAC hruaitute hi nimin khan an ṭhukhawm a; lungawi lohna an lantir mek chu sorkar aṭanga thuthar a la awm loh avangin a hma aia chak zawk leh khauh zawka chhunzawm zel an rêl a, mipui hriatthiamna an ngen. CVJAC chuan, “Sorkar tan kan thil phûtah tihhlawhtlin theih loh khawpa harsa a awm lo,” an ti.

CVJAC thuchhuak chuan, Trans­port Minister leh Congress party thuchhuahin lirthei hlui a thara thlak tih duh luat vanga chatuana neih tum anga an sawi chu chhangin, “Tumah chatuana neih tum an awm lo a, motor hlui tawh service-te’n motor thara thlak an duh ve leh Motor Vehicle Rules pawhin India ram puma commercial vehicle-te tana a phalsak mek ang hi Mizoramah pawh phalsak ve kan duh mai a ni,” an ti. Aizawlah city bus tam tawh vanga an indin chhawk mek laiin, sorkar chuan a duhnaah chuan permit 15 an pek belh duh tho tih an sawi.

Sumdawnna lirtheite an nawrh avang hian phai lam leh thing­tlang lam aṭangin chawhmeh leh mamawh chi hrang hrang lak luh theih a ni rih lo a; hei vang hian Aizawla bazar hrang hrangah chuan chawhmeh, a bikin thlai lam a vang ṭan a ni.

Lirtheite nawrh vang hian Aizawla sikul tam takin harsatna an tâwk a, sikul châwl tawpte an awm bakah, sikul kal thei lo zirlai tam tak an awma thu dawn a ni bawk.

CVJAC nawrhna hi district khawpui dang – Kolasib, Mamit, Champhai, Serchhip, Lunglei, Lawngtlai leh Saiha-te bakah, khaw hrang hrangah sumdawnna lirtheite’n an zawm ṭha hle a; sumdawnna lirthei tlân hmuh tur a awm lo.

CVJAC-te hi Aizawl khawpui chhunga hmun hrang hrang bakah, district khawpuiahte leh hmun dang ṭhenkhatahte an duty a; zan lamah pawh duty an indah bawk.

Transport director R Rem­mawia’n Vanglaini palai zawhna chhanga a sawi danin, Aizawla mipui harsatna zualpui phuhrûk turin sorkarin nimin khan sorkar bus 24 a tlantir leh. Ramrikawn lamah bus pahnih, Sihphir, Durtlang leh Mualpuiah bus pakhat ṭheuh tlantir a ni a; a bak bus 19 chu khawpui chhung tlangdung kawngpuian tlantir a ni. A hma ang bawkin, bus service tinah hian police pahnih zel an duty a ni.

Transport Director chuan, one time tax, kum 15 atana ṭum khata lirthei chhiah pek nghal vek tur tih chuan sumdawnna lirthei zawng zawng a huam lo tih a sawi a, “One time tax kum 15 atana pek nghal tur tih hian private motor zawng zawng, auto-rickshaw, taxi leh maxicab-te a huam. Bus, truck, pick-up leh commercial vehicle dang zawng chu a huam lo a; a hmaa kal dan angin, kum khat, kum chanve (half yearly) leh thla thum (quarterly) atan pek theih reng a la ni,” a ti.

– See more at: http://www.vanglaini.org/tualchhung/54847#sthash.4wexXaYl.dpuf

http://www.vanglaini.org/tualchhung/54847

Posted on

MZP-in HSLC-a tiṭha Mizote an chawimawi

MZP-in HSLC-a tiṭha Mizote an chawimawi

MZP chuan nimin khan Vanapa Hall-ah High School Leaving Certificate (HSLC) Exa­mination 2016-a Top 10-a tling Mizo zirlaite chawimawina hun an hmang a; Home minister R Lalzirliana’n a hmanpui.

Inkhawm hi MZP vice presi­dent B Valaltána’n a kaihruai a; khuallian R Lalzirliana chuan, zirlaite tan hun vawn dik a pawimawh thu sawiin, “Hun vawn dik hi zirlaite tih ngei ngei tur a ni. Nun uluk u la, tun dinhmuna in din lai hian nasa taka lehkha zira ṭan la turin ka sawm che u a ni,” a ti.

R Lalzirliana chuan, zirlai pass ngawr ngawr chu eizawnna tlak a ni tawh lo tih sawiin, “Thiamna tak tak paw chhuak turin ka chah duh che u,” a ti a; zirlaite’n politcs an ngaihven tur a ni a, tute nge ṭha a, tute nge dik tih an zir chiang ve tur a nih thu a sawi rualin, “Politics chhia hi luh chilh ve a hun rih lo. Pathian ṭih tlat turin leh nu leh pa thu awih turin ka duh che u a ni,” a ti bawk.

MZP president Lalsangzuala Ngente chuan HSLC top 10-a tling Mizo zirlaite lawmpuina thu sawiin, “Hlawhtlinna tam zawk chang thei turin tun aṭangin hma lam hun atan ruahmanna kan siam a, mithiam zawk ràwn nachang hriat a pawimawh hle,” a ti a; khawpuia awm kher loh pawhin, thingtlang hmun kilkhâwr tak aṭang pawhin tumruhna leh taimakna nen zir chuan hlawhtlinna sang tak a chan theih thu a sawi.

MZP hian HSLC top 10-a tling Mizo zirlaite lawmpui nan thuziak leh pawisa an hlan a ni.

– See more at: http://www.vanglaini.org/tualchhung/54398#sthash.8pfIQdjn.dpuf

Posted on

Press Releases

CHIEF MINISTERIN 9TH INTER BRANCH YMA CRICKET TOURNAMENT 2016 KHARNA HUN HMANPUI

Chief Minister Pu Lal Thanhawla chuan nimin chawhnu khan Sihhmuia Suaka Cricket Groundah CYMA leh Cricket Association of Mizoram (CAM) tangkawp buatsaih 9th Inter Branch YMA Cricket Tournament Final & Closing Function a hmanpui.

Chief Minister chuan YMA te nen tanghoa thalaite hmakhua thlir a hetiang cricket tournament buatsaih a ni hi hmasawnna ropui tak a ni a ti a. Tunhma chuan cricket inkhelh buatsaih anihin an baihvai theih hle thu sawiin, tuna mahni club tantu (fans) te an inaukhum thei hi Mizoramah cricketin hma a sawnzia a tilang a, a lawmawm hle a ni a ti. Chief Minister chuan kawngtinrenga thalaite khawvel thar siam hi khawtlang bat a ni tiin, tunah chuan nasa takin hma kan sawn tawh a ni a ti a. Football bikah phei chuan FIFA meuh pawhin Mizoram chu ‘football factory’ min ti hial a ni a ti a. Footbal rawn khum thei tur chu cricket hi a ni a ti a. Cricket hi Mizote khelh thiam chi a ni tiin, BCCI in recognition min pek hunah chuan khawvel dengchhuak thei cricketer kan nei thuai ang a ti a. BCCI hotute pawh alo hrilh tawh thin thu a sawi nghe nghe a ni.

Chief Minister chuan sorkar leh khawtlangin thalaite tana khawvel thar a buatsaih mek tihlawhtling thei turin thalaite ah bawk a innghat a ni a ti.

9th Inter Branch YMA Cricket Tournamentah hian Aizawl atangin branch 33 leh Lungdai atangin 1 leh Thinsulthliah atangin 1, avaiin branch 35 an tel a, April ni 5 khan Republic Veng fieldah khel tanin April ni 15 thleng an khel a, April ni 16 atanga final thleng hi Suak Cricket Groundah khelh leh a ni. Match tin hi 20 Overs a khelh a ni a, nimina final match ah hian Durtlang Branch leh Ramhlun Venglai Branch ten khelin Ramhlun Venglai hian Durtlang hi 17 Runs a hnehin an champion a, trophy leh Rs.20,000/- an dawng a ni. Durtlang hian trophy leh Rs.10,000/- an dawng bawk a ni.

Tournament kharna hun hi ground-ah hman a ni a, Pu R.Lalvensanga, Chairman Sports Sub Committee, CYMA in a kaihruai a ni.

https://dipr.mizoram.gov.in/press-release/chief-ministerin-9th-inter-branch-yma-cricket-tournament-2016-kharna-hun-hmanpui