Posted on

Mihringa sumdawnna thubuai 20 ziak tawh

Mihringa sumdawnna thubuai 20 ziak tawh

Mizoram police-a CID (Crime) chuan, kum 2000 aṭanga March 2016 theng khan mihringa sumdawnna (human trafficking) chungchangah thubuai 20 a ziak tawh a, a kaihhnawihah mi 42 an man tawh.

CID (Crime) chhinchhiah danin, mihringa sumdawnnaah hian Mizoramah chuan kum 2000-ah thubuai ziah luh ṭan a ni a, thubuai ziah luhte chu an chhui zui nghal zel a, thubuai 20 zinga 16 chu chhui chhuakin, Court-ah chargesheet an thehlut tawh a ni.

Kum 2004 leh 2005 khan thubuai pali ve ve ziah luh a ni a; kumin March thla thleng khan human trafficking tuartu mi 32 an awm tawh.

Hetih lai hian, thubuai chhui lai pakhat an nei a, thubuai dang pakhat erawh chu vanduaina thlenna hmuna police-te kutah an hlan thung.

CID (Crime) SP Lallianmawia chuan, hna thawh tur hmuhsak thei anga phai lam aṭanga inzuar company eng emaw zat an awm tih sawiin, chu’ng hna an zawrhte chu rintlak tak tak a awm laiin, rintlak loh leh mihringa sumdawnna atana hman tum an awm ṭhin avangin finkhur a ngai hle tih a sawi.

Lallianmawia chuan, Mizo ṭhalai, Mizoram pawna hna thawk turte chu, an thawhna tur zir chiang hmasa phawt tur leh a rintlak leh rintlak loh finfiah hmasa turin a chah a ni.

– See more at: http://www.vanglaini.org/tualchhung/53119#sthash.rGLtq8Y7.dpuf

Facebook Comments
Leave a Reply