Posted on

India rama zirna ṭha thlang chhuak Mizoram University 51-naah a lang pha

India rama zirna ṭha thlang chhuak Mizoram University 51-naah a lang pha

Ministry of Human Resource and Development chuan India rama zirna peng hrang hrang zirna hmun ṭhate a puang chhuak a, IIT Madras leh IIM Bangalore te a ṭha berah an lang a, university hrim hrim ṭha an thlan chhuahah Mizoram University chu 51-na a ni.

HRD-in National Institutional Ranking Framework (NIRF) report a tar chhuahah hian Indian Institute of Technology (IIT) – Madras chu engineering zirna lamah a ṭha ber a, ma­nagement lamah chuan Inddian Institute of Management (IIM) – Bangalore chu a ṭha ber.

NIRF hian university, engineering, pharmacy leh management zirna hmun hrang hrang 3,500 zet a zirchianna aṭangin report hi a siam a, Human Resource and Development minister, Smriti Irani chuan a tlangzarh a ni.

Engineering lamah chuan IIT te a ṭha ber an ni hlawm a, top 10-ah IIT vek an lang a, Madras chu a ṭha ber a, a dawtah Bombay niin, Kharagpur chu pathumna a ni a, Delhi chu palinaah langin Kanpur chuan pangana a luah pha.

Management lamah pawh IIM ho an che ṭha tlangpui a, IIM lo lang pawh an awm nual. IIM – Bangalore chu a ṭha ber a, pahnihna hi Ah­medabad niin, Calcutta chu pathumna, Lucknow chu palina leh Udaipur chu panganaah an lang. IIM ni lo zinga thleng sang chu International Management Institute, New Delhi chu pasarihna a ni a, Indian Institute of Forest Managment, Bhopal chu pariatna a ni a, top 10-a lang dang chu IIM te an ni.

Pharmaceutical-ah Manipal College of Pharmaceutical Sciences, Manipal chu a ṭha bera thlan chhuah a ni a, University institute of pharmaceutical sciences –Chandigarh chuan dawtin, Jamia Hamdard, New Delhi chu pathumna a ni. Poona College of Pharmacy, Erandwane, Pune chu palinaah langin, Institute of Pharmacy, Nirma University, Ahmedabad chuan pangana dinhmun a luah.

Indian Institute of Science, Bangalore chu Science lam zirna ṭha ber a ni a, Institute of Chemical Technology (ICT), Mumbai chu pahnihna niin, tunlaia chanchinthar luah ngun Jawahar­lal Nehru University, New Delhi chu pathumna a ni a, University of Hyderabad chu palina, Tezpur University, Assam chu pangana a ni. NEHU chu 15-naah a lang pha a, Mizoram Univeristy chu 51-naah a lang pha bawk. North East-ah chuan Mizoram aia University ṭha hi Gauhati University a ni a, 22-na a ni a, NEHU a ni bawk a, Tezpur University a ni bawk. University ṭha bikah hian University 100 an tar chhuak.

– See more at: http://www.vanglaini.org/thalai/52689#sthash.F8Y4Fb2h.dpuf

Facebook Comments
Leave a Reply