Vanglaini – Khawtlang nun siamṭha turin Mahni insiamṭhat hmasak a ngai: CM

Khawtlang nun siamṭha turin Mahni insiamṭhat hmasak a ngai: CM

Central YMA leh IPR department chuan nimin khan Lal Thanhawla Auditorium-ah ‘Khawtlang nun siamṭhat’ tih thupui zirhona an buatsaih a; khuallian, chief minister Lal Thanhawla chuan, khatlang nun siamṭha turin mahni insiamṭhat hmasak a ngaih thu a sawi. www.vanglaini.org

Chief Minister chuan, khatlang nun siam ṭha tur chuan ‘Keimah hi khawtlang nun siamṭha turin ka ṭha tawk em’ tih ngaihtuah a ngai tih sawiin, “Kan tum hlen turin páwn lam leh chhung lamah nun uluk a, mahni insiamṭhat hmasak a ngai. Mahni-ah hmuh tur a awm loh chuan kan tumah kan hlawhchham ang tih ka hlau a ni,” a ti.

Lal Thanhawla chuan, ram leh hnam humhalh tur pawhin mahni inhumhalh hmasak a ngai tih a sawia, “Mahni inhumhalh turin hrisel a ngai a, taksa a hrisel dawn chuan zûk leh hmuama fihlim leh, ei leh inah fimkhur a ngai,” a ti. “Mizote hi thawhchhuah aia tamin kan khawsa em tih ngaihtuah a ngai bawk,” tiin, khawtlang nun siamṭha tur chuan mahni thawh chhuah mila khawsak a ṭul thu a sawi.  

Chief Minister chuan, Mizote’n vanneihna an neih thu sawiin, “Khawtlang nun siam ṭha tur leh ram leh hnam humhalh turin YMA, kohhran leh sorkar an awm a, anni hi lungrual takin an thawkho ṭhin. Hei hi kan hnam vanneihna a ni. YMA kumpuante hi sorkar ngaih pawimawh zawng tak a nih ṭhin avangin, a hlawhtlin theih nan sorkar nen ṭha takin kan thawkho ṭhin,” a ti. 

Central YMA president Lalbiakzuala pawhin thu sawiin, “Kan khawtlang nunah siamṭhat tur tam tak a awm. Chu chu engti kawngin nge siamṭhat a, sutkian a nih ang tih ngaihtuah turin zirhona hi buatsaih a ni. Khawtlang nun siamṭha tur hian do ngai, tih ngai leh nunpui ngaite a awm,” a ti a; khawtlang nun siamṭha turin ngaihtuahna sen nasat a ṭul thu a sawi.  

Lalbiakzuala chuan, ‘Sem sem chán chán, ei bil thau thau’ tih a nih tawh avangin khawtlangah harsatna awm a, “Mizo khawtlang nun hi YMA-in kan siamṭhat loh chuan tu nge siamṭha chuang ang? Kan siamṭha lo a nih chuan kan tu leh fate hian nang leh kei bâk dem tur an nei lo,” a ti.  

Mizo khawtlang nunah siamṭhat theih rual loa chhia a la awm lo tih sawiin CYMA President chuan, “I beidawng lo ang u. He ram hian a chhiatna lai siam ṭha turin nang leh kei hi min au a ni,” a ti a; YMA member-te khawtlang nun siamṭha tura an ngaihtuahna sêng a, theihtawp chhuah turin a sáwm.

Workshop hi chawhma lamah CYMA treasurer J Lalsailova’n a kaihruai a, Planning secretary Dr C Vanlalramsanga pawhin thu a sawi. 

Chawhnu lamah CYMA assistant secretary R Lalngheta kaihhruaina hnuaiah IPR minister Lal Thanzara hoa hun hman a ni a. CID DIG Joseph Lalchhuana leh Health department (Food & Drugs) joint director Lalsawma Pachuau-te paper buatsaih zirho a ni. 

Workshop-ah hian YMA sub-headquarters, group leh branch aiawhte an tel a; thupui atan ‘I ram leh hnam chhan turin pên chhuak rawh’ tih hman a ni. 

– See more at: http://www.vanglaini.org/tualchhung/51521#sthash.EfvUbqbr.dpuf

Facebook Comments

Add a Comment