Posted on

Aizawla inkhel tur Mama a phur

Aizawla inkhel tur Mama a phur

March 12-ah Aizawl FC-in East Bengal an mikhual dawn a, RG Stadium-a inkhel turin Kolkata club winger Mizo tlangval S. Malsawmtluanga-te’n nimin khan Aizawl an lo thleng.

Mizote hmaa football eizawnna tlak a nihzia pho langtu Mama chuan Aizawl ngeia I League an khel tur chu a phur zia sawiin, “Aizawl FC ka hmachhawn theih dawn leh dawn loh ka sawi thei lo a, hotute thu thu a ni. Mahse, Aizawl khawpui ngeia I League match boruak ka hip tur hrim hrim hi ka phur a, ka tel loh hrim hrim hi ka hlau a ni tawp mai,” tiin a phur hle.

Indian football-a Mizote tana kawngsialtu pawimawh tak Mama chuan sawi chhunzawmin, “Hun rei tak chhung he hun lo thleng tur hi ka lo thlir tawh ṭhin a, ka beiseinate chu tunah chuan a tak ramah ngei ka hmu dawn ta,” tiin I League-a Mizo club hmachhawn tur a awm ve ta chu lawmawm a tih thu a sawi.

East Bengal-a a football career tam zawk hmangtu Mama chuan Aizawl FC chungchang sawiin, “I League level-ah chuan chak reng theih a ni lo a, a harsa ṭhin. Aizawl FC player-te zingah tawnhriat nei ṭha an la awm lo a, an tan a harsa lehzual. Mahse, tun dinhmunah chuan ka rin aiin Aizawl FC hian an khel ṭha zawk a, a pawimawh ber erawh fan-te ṭawiawmna a ni. Mizo mipuiten duhthusamin Mizo club an la ṭawiawm lo a, banner-te nena au tur an mamawh,” tiin Mizote chu an I League club tun aia ṭha zawka ṭawiawm turin a chah.

Kum 31-a upa midfielder chuan Aizawl FC chu Mizo club an nih vang ringawta hlah thlem an tum loh thu sawiin, “I League-ah chuan eng pawh thleng thei a ni a, hneh sa an awm thei lo. Mizo ka nih avangin Aizawl FC hian point thum an hmuh ka duhsak a, mahse professional kan nih miau avangin Mizo rilru dah ṭhaa kan khelh a ṭul dawn a ni,” tiin a inlan a nih chuan a team tan theihtawp a chhuah tur thu a sawi.

– See more at: http://www.vanglaini.org/infiamna/51378#sthash.0GVvLacf.dpuf

Facebook Comments
Leave a Reply