Mizoram junior team an vanduai

Mizoram junior team an vanduai

50th Junior National Football for BC Roy Trophy-ah Mizoramin champion nomawi an humhim zo lo. Nimin final-ah inelna thlengtu Punjab-in penalty hmanga Mizoram hnehin an champion.

S.Kartar Singh Bains Memorial Football Stadium, Punjab-a inkhelah Mizoramin Lalbiaknia (Tawia) hmangin hma hruai mah se Punjab-in injury time-ah an sut a, extra time-ah goal a luh loh hnuin penalty shootout-ah Punjab 4-2 in an chak.

Goal khat
Mizoramin defensive game khel mah se bul an ṭan ṭha a, minute 10-na lekah tlarhmaa mal tlat Tawia’n chance ṭha a hlah. Punjab lamin freekick hmangin Mizoram an rum ṭhaih zui a, yard 30 vel aṭangin goal ban an pet per a, Mizoram an him.

Minute 27-naah Chite Veng rawlthar Tawia’n box chhungah Punjab defender-te bumin chiang zetin a pet goal a, attacking midfielder Lalṭhapuia’n minute 40-naah Punjab keeper chauh hmachhawn mah se Mizoram goal hnihna a khung thei lo.

Goalkeeper pahnih inhliam vanga lut Zoliansanga’n hna hautak a nei lo, final-a keeper Sangsanga hi semifinal-a chakna goal khungtu a ni.

Defensive game
Second half an ṭan a, Punjab-in an siphurh sut tumin na takin an nawr let a, Mizoram hna ber chu an goal neih sa venhim a ni.

Mizoramin hian defensive game khawng ṭha tak an khelh avangin Punjab-in nawr bet mah se goal khungna chance ṭha an nei lo. Mizoramin counter attack hmangin goal khung belh theihna tur hun ṭha an nei zawk a, keeper nen chauh an inhmachhawn hnuah ṭum hnih dang an hlah.

Injury time-ah Mizoram keeper Sangsanga a chesual a, Punjab freekick pet chu man theih mai niin lang mah se a nam per sual a, goal-ah a luh zui avangin 1-1 a ni.

Extra time
Player inhliam vanga buai Mizoram tan penalty shootout hmanga vanneihna zawn chu an tih theih sang ber niin a lang tawh a, theihtawp an chhuah avangin Punjab-in extra time minute 30 chhungin goal an khung thei lo.

Punjab an vannei
Penalty shootout-ah inelna thlengtu Punjab-in ṭantu an nei ṭha a, Punjab lamin pet hmasain goal an khung nghal a, Mizoram erawhin an hlah thung. Punjab tana a vawi thumna pettuin a pet goal lo a, Mizoramin nih rual theihna hun ṭha an bawh pelh. Punjab an chesual nawn tawh lo a, penaltyshootout-ah 4-2 in an chak.

Fak phu Mizoram
Mizoramin inhliam vang leh hrem vangin midfielder pali an chhawr thei lo a, khawihli neih vangin goalkeeper pahnih an chhawr thei lo bawk. Player 20 awmna squad-ah Mizoramin an player pawimawh paruk an hmang thei lo a, chutichung chuan huaisen takin final an hmachhawn. Nomawi humhim thei lo mah se Mizoram hian chak an phu a, team enkawltute leh player-te an chhuanawm hle.

Team enkawltute thukhawchang
Mizoram coach Lalremtluanga chuan, “Kan theihna zawng zawng kan chhuah a, chak thei kan ni a, a tawpah erawh kan squad chhah tawk loh kan tuar a ni. Kan vanduai tih bak sawi tur ka hre lo,” tiin chak tuma theihtawp an chhuah thu a sawi.

Mizoram manager Lalchhuanawma Pautu (L.Ch-a) chuan, “Chak thei kan ni a, mah se kan vanneih ṭum a ni lo. Kan result-ah lawm lo mah ila player-te khelh dan erawh ka chhuang hle. Kan chak loh chhanah tumah inmawhpuh tur kan awm lo, team angin kan khel a, kan chak lo pawhin team angin kan chak lo tur a ni,” tiin Vanglaini palai a hrilh.

Final Kalkawng
Group Stage
Mizoram 2 – 0 West Bengal
Miz : K. Roluahpuia 7′; Lalbiaknia 78′

Mizoram 1 – 1 West Bengal
Miz : K. Roluahpuia 32′

Semifinal
Mizoram 2 – 1SAI
Miz : R. Lalṭhapuia 45′; Zoliansanga 97′

Final
Mizoram 1 – 1 Punjab
Miz : Lalbiaknia 27′
Penaltyshootout-ah Punjab 4-2 in an chak

– See more at: http://www.vanglaini.org/infiamna/49641#sthash.oITDXJIC.dpuf

Facebook Comments

Add a Comment