Vanglaini Thlirvelna

In pahnih kâng

Nimin zing khawvar hma, dar 1 vel khan Rengdil khua Lalmuanawma in, Assam type leh a bula Lalawmpuii in (râp in) chu a kâng a, bungrua chuh hman lohin a kâng ral. Kângmei hi Lalmuanawma in aṭanga chhuak a ni a, bungrua engmah an chuh hman lo a, Lalawmpuii te erawh tlem azawng an chuh hman a ni.

Central YMA in National CSO Award dawng

Central YMA chuan YMA-in electoral roll siamna leh vote thlak pawimawhzia zirtirna kawnga an thawh ṭhat avangin nimin khan ‘National CSO Award for Best Performance in Voter Education and Electoral Participation’ an dawng. Award hlanna hi nimin khan New Delhi-ah neih a ni a, CYMA aiawhin certificate leh trophy chu CYMA president Lalbiakzuala leh general secretary Lalhmachhuana ten an dawng a ni.

Bangladesh-ah MCI

Mizoram Chamber of Industries (MCI) president K Lalhmingthanga chu Chittagong Chamber of Commerce & Industry-in January 30, 2016-a Chittagong-a World Trade Centre hawnna leh an kum 100 tlin champha lawmna a tel tura sawm a ni. K Lalhmingthanga hian World Trade Centre hawnnaa a tel pah hian Tlabung lama India leh Bangladesh insumdawn tawnna chungchangah Bangladesh sorkar hotute a kawm nghal dawn a, Bamboo State-a Mizoram siam tum chungchangah DoNER hotute a kâwm bawk ang.

MNF-in lawmpui

MNF chuan thuchhuah siamin, Central YMA-in India rama kum tling chin electoral roll-a thun vek an nih theihna tur te, vote thlak pawimawhzia zirtirna leh, inthlanna thianghlim leh felfai a awm theihna tura an hmalakna a ṭhat vanga Election Commission of India-in Civil Service Organisation (CSO) Award a hlan chu an lawmpui thu an tarlang.

Himpuia Mumbaiah

Parliamentary secretary (Education) Joseph Lalhimpuia chuan nimin Connected Learning Initiative (CLIx) hawnna inkhawma tel turin Mumbai a pan.CLIx Programme hi India ram state pali-ah hman tur a ni a, Mizoram pawh chung state zinga thlan chhuah niin, an hawnna inkhawma tel turin Chief Minister sawm an ni a, CM aiawhin Joseph Lalhimpuia hi a tel a ni.

Free Medical Camp

DGAR CAP proj hnuaia HQ IAGR (E) leh 23 Sector AR hmalaknain, 39 Assam Rifles chuan tun hnai khan Vaitin khuaah Free Medical Camp an buatsaih a, Vaitin leh a chhehvel khua aṭangin mi 412 an in entir.

District MJA

Serchhip District MJA leh Kolasib District MJA chuan nimin khan general conference an hmang a, hruaitu thar an thlang. Serchhip MJA-te chuan president-ah  C Lalhminghlua, vice president-ah C Ramengmawia leh treasurer-ah Lalremruata Ralte an thlang. Kolasib MJA chuan president-ah HC Vanlalnghaka, vice president-ah C Thanmawia leh treasurer-ah H Lalmuanpuia te an thlang a ni.

Bank rawk tum

Mizoram Rural Bank, Mamit branch chu Pathianni zan khan misual in rawk an tum a, rawk tumtu Lalhmangaiha (19), Mamit Field Veng chu a chhunga a luh hma in a thawm hria in man a ni. Thudawn danin, Lalhmangaiha hian MRB hi rawk tumin kawngka kar chhiat a tum a, a thawm hria leh lo hmutu an awm avangin man a ni a, Mamit police station ah hriattirin police-ten an la nghal a ni.

Facebook Comments

Add a Comment