Aizawl Vs Bengaluru Ticket Vawiin aṭangin zuar chhuak dawn

Aizawl Vs Bengaluru Ticket Vawiin aṭangin zuar chhuak dawn

January 16, Inrinni tlai dar 1:00 hian Rajiv Gandhi Stadium-ah Aizawl FC leh Bengaluru FC te an inkhel dawn a, ticket hi Rs 200, Rs 500 leh Rs 1000 man niin vawiin chawhma dar 11:00 aṭangin a lei theih ang.

Ticket hi Millenium Centre kawt, Vanapa Hall kawt, Sikulpuikawn, Chanmari Kawn leh Chhinga Veng Waiting Shed (near ṬS Market)-ah te zawrh a ni dawn. Zan lamah dar 7:00 PM – 10:00 PM inkarah ticket hi Chhinga Veng Community Hall-ah a lei theih bawk ang. Ticket leina hmunah hian Aizawl FC jersey zawrh a ni nghal dawn a, jersey hi puitling hak Rs 500 niin naupang hak Rs 400 a ni thung.

Ticket chungchanga hriatchian duh nei chuan Chhinga Veng YMA president 9436140367 leh secretary (9862331353)-ah te zawh fiah theih a ni.

Aizawl FC hi Inrinni khan Kolkata-ah I League champion Mohun Bagan lakah 1-3 in an tlawm a, Pathianni khan Aizawl an rawn thleng. Nimin zing khan RG Stadium-ah training an nei a, Bagan nena an inkhelh ṭuma che ṭha Albert Zohmingmawia’n inhliam vangin team training pangngai a zawm thei lo.

Aizawl FC technical director Hmingthansanga chuan, “Kan result-ah chuan kan lungawi lo a, kan khelh dan erawhin beiseina eng min siam a ni. Kolkata-a Mizo awm ten min ṭawiawm ṭha em em a, an chungah kan lawm takzet. Kan hmachhawn leh tur hi Bagan ang thoa team ṭha Bengaluru a ni dawn a, Mizo mipuite puihna kan mamawh a, ṭha taka min ṭawiawm turin kan sawm a ni,” tiin Mizo mipuite ṭanpuina an mamawh nasat thu Vanglaini palai a hrilh.

– See more at: http://www.vanglaini.org/infiamna/48378#sthash.AiFFSCrL.dpuf

Facebook Comments

Add a Comment