Posted on

Mizo naupangte’n German naupang neih loh an nei – Fall

Mizo naupangte’n German naupang neih loh an nei – Fall

German Students National Football Team te’n nimin khan Kolkata lam panin Aizawl an chhuahsan a, January 11-ah India ram an match hnuhnung zawk chu Bengaluru-ah Ozone FC nen an khel ang.

German team hian nimin chawhma lam khan Lammualah MFA Grassroots naupangte training an neihpui a, darkar khat leh a chanve chhungin Mizo naupang tan hriat tur ṭha an hnutchhiah hnem hle.

German team technical advisor Arunava Chaudhuri chuan, “Mizo naupang zingah player thiam bik ka hmu a, a nawlpuiin inkhelh an thiam em em bawk. Grassroots football hi Mizoram football hma thlir an ni a, dawhtheihna in neih erawh a pawimawh ang. Tuna grassroots naupangte hi kum 10 chuang hnuah chuan Mizo hmel an ni ang a, chumi hun chu innghah thlen theih a ngai dawn a ni. German team-in nuam an ti a, kei pawhin ka hun tawn hi chinchhiah tlak ka ti a, MFA-in football tan hna ṭha tak thawk zel se tih hi ka duhthusam a ni,” tiin Vanglaini palai a hrilh.

MFA Grassroots naupangte hi ṭum danga an training dan thoin group hrang hrangah ṭhendarh an ni a, German player-te pawh inṭhendarhin anmahni position mil ang zelin player-te an zirtir a, an chevel a hmuhnawm hle.

Germany Under 15 tana khel tawh Adam Fall chuan defending a zirtir a, German right back chuan, “Mizo naupangte hian German naupangte neih loh an nei a, ball awmna a zirin rang takin an tihtur an hre nghal thei a ni. Chutihrualin hmasawnna tur erawh a la tam em em a, inkhelh laiin naupangten concentration an neih reng a ṭul a, player ṭha zawk ni turin rim taka an thawh a ṭul a ni,” tiin a sawi. German team-in Mizoram XI 3-1 a an hneh khan SC Freiburg youth system chhuak Adam Fall freekick aṭangin Germany-in an goal hnihna an khung.

German team coach Markus Jung chuan, “Mizoramin min thlen danah lawmthu ka sawi nawn leh duh a ni. Team pumpuiin Mizoram hi nuam kan ti em em a, in naupangte pawhin hmabak eng tak an nei a ni,” tiin a sawi.

Kum 2016-ah MFA Grassroots course ṭan a la ni lo a, batch 10-na chu January 11, Thawhṭanni hian Lammualah ṭan a ni ang.

– See more at: http://www.vanglaini.org/infiamna/48202#sthash.LJuW64zN.dpuf

Facebook Comments
Leave a Reply