Posted on

SORKAR LAIPUI ATANGIN THU THAR A AWM THUT A NIH LOH CHUAN ZANIN DAR 12 HNU LAMAH MI TAM ZAWKIN CABLE TV KAN EN THEI TAWH RIH LOVANG

SORKAR LAIPUI ATANGIN THU THAR A AWM THUT A NIH LOH CHUAN ZANIN DAR 12 HNU LAMAH MI TAM ZAWKIN CABLE TV KAN EN THEI TAWH RIH LOVANG.. – Vanneihthanga Vanchhawng

MSR : Sorkar laipui atanga dateline sawn hlat thut a awm a nih loh chuan zanin zanlai dar 12 hian Cable TV Digitization Programme phase-III in a huam chinah Analog Signal te chu off vekin digital signal chauhin TV te en theih a ni tawh dawn a. LPS chuan consumer te hnenah digital signal man theihna tur Set Top box a sem chhuak mek.

Sorkar laipuiin Digital India a kalpuina peng pakhata Informatuion & Broadcasting Ministry in Cable TV te phase wise-a Digital signal-a thlak tura a tih angin Phase-III in a huam chinte chuan December 31, 2015 hmaa Digital signal pe chhuak turin Cable TV te an inbuatsaih a, Mizorama Multi System Operator (MSO) nei hmasa LPS Vision chuan control room peifel tawhin Set top box engemawzat a chah thleng tawh a, heng set top box te hi LPS pawttu in-report hmasa apiang hnenah a tahtawlhin connection a pe mek a ni. Thawktute consumer te inah kalin set top box hi an vuah sak mek a, mi engemawzatin digital signal an en tawh a ni. Chutiang chuan LPS hnuaia sub-operator te pawhin an bialah an pe chhuak tan ve mek bawk.

Set top Box te hi smart Card tello a sem phawt a ni a, set top box neite chuan digital signal channel tam tak an en thei phawt a, channel package thlan erawh chu kum tharah tih theih a ni anga, chutah chuan smart card pawh sem chhuah a ni chauh ang.

Tarlan thin tawh angin Ministry of Information and Broadcasting chuan ni 11.11.2011. khan India ram pum a cable TV (analogue) chu Digital Addressable System a thlak vek turin thutlukna a siam a, he digitisation hi phase li (4)-ah then a ni. Phase-I ah Delhi, Mumbai, Kolkata Chennai, Phase-II ah Khawpui 38 mipui maktaduai khat chuang awmna chin te a huam a, Phase-III ah urban area zawng niin Phase-IV ah a dang zawng te telh leh tur a ni.

Phase-III ah hian Mizoram khaw 23 an tel a. Heng khua te hian tuna kan en mek Analogue TV signal chu ni 31.12.2015-ah titawpin Digital Addressable System (DAS)-a thlak vek a ni tawh dawn a, TV signal te encrypt vek tur a nih avangin subscriber zawng zawngin Set-top Box hmanga TV an en a ngai tawh dawn a. Sorkar laipuiin hun hi a pawtsei thut a nih loh chuan zanin zanlai dar 12 thleng chauh set top box tel lovin en theih a ni tawh dawn lova, set top box hi la neilo a tamzawk kan nih hlawm avangin engemawc chhung chu mi tam zawkin cable TV kan nghei rih dawn a ang hle a ni.

Digital Addressable System-ah chuan picture a fiah bik dawn a, Sound quality a tha bik bawk ang. Channel a tam dawn a, Bouquet hrang hrang thlan theih a ni a, A-La-Carte hmangin channel duhzawng a lei belh theih bawk ang.

Digital signal man tur hian Set top box a ngai a,Set-top box hi a tlangpuiin chi hnih Standard Definition (SD) leh High-Definition (HD) a awm a, tunah hian LPS chuan a man tlawm zawk SD hi a pe chhuak mek a, HD pawh a chah thleng thuai dawn a ni. Headend bungrua te leh subscriber management system te hi International Organization for Standardization (ISO) a ni tur a ni a, Set-top box te hi Bureau of Indian Standards (BIS) certified a ni tur a ni a, LPS chuan chutiang bungrua te chu a hmang a ni.

Multi System Operator ni tur hian Ministry of Information and Broadcasting atangin licence neih a ngai a, ni 11.8.2015. khan LPS Vision Production chu MSO licence pek fel a lo ni tawh a, LPS licence area hi “ for the State of Mizoram ” a ni.

Facebook Comments
Leave a Reply