AIZAWL CITY SURVEILANCE PROJECT II HNUAIAH CAMERA 35 VUAH BELH LEH

AIZAWL CITY SURVEILANCE PROJECT II HNUAIAH CAMERA 35 VUAH BELH LEH

by Vanneihthanga Vanchhawng

Vanneihthanga Vanchhawng's photo.

MSR : Aizawl khawpui chhung hmun pawimawh leh venhim ngai lai CCTV hmanga venhimna tur atana hmalakna Aizawl City Surveillance Project thawhhnuihna chu nimin Dec 23, 2015 khan hman theiha peih fel a ni ta.

He Project Phase-II-ah hian phse-I CCTV camera ten an tuam phak loh Aizawl bazar Bungkawn atanga Chanmari kawn inkara hmun pawimawh zual thlan chhuah hmun 10 (sawm) ah Camera 35 (sawmthum panga) dah belh a ni a. He Project thawhhnihna hi a buaipuituten Krismas hunpui hmaa hman theih turin theihtawp an chhuah avangin tun hunah hian hman theiha peih theih a ni.

Aizawl City Surveillance Project hnuaia CCTV dahte hi Mizoram Police chuan tangkai takin an hmang mek a, hnu chhuina leh buaina ven nan tuna Project-in a tuam thar hmun te pawh hi tangkai hle tura ngaih a ni.

Kum 2012 March thla khan Home Minister hovin sorkar mi pawimawh thukawmte’n Aizawl City Surveillance Project duangchhuaka kalpui dan tur an ngaihtuah a, DPR siam niin sorkar laipui Ministry of Home Affairs-ah thehluh a ni. Ministry of Home Affairs chuan lo pawmin 30.3.2013 khan he project atan hian cheng vbc 12.65 a ruahman a. A thawhkhatna atan cheng nuai 395.5 sanction nghalin hna thawh tan nghal a ni a, Modernization of State Police Force (MPF) hnuaia Union Home Minister Discretionary Fund atangin sum hi hmuh a ni a, he project pumpui atana sum ruahman hi kum kalta khan dawn kim a ni tawh nghe nghe. MPF Scheme hnuaiah hian State sorkar chu 10% tum ve thin tur a tih a nih laiin Aizawl City Surveillance Project atan bika sum ruahman hi chu sorkar laipui atangin zaah za hmuh a ni.

He Project hi Phase-3 a thawh turin ruahmanna siam a ni a, Phase–I hnuaiah hian Aizawl khawpui chhung hmun pawimawh hrang hrang 10(sawm) tuam a ni a, heng hmunte hi SP(Aizawl) Office Control Room atang hian engtik lai pawhin thli thlai reng tur a ni.

Aizawl City Surveillance CCTV te hi Khatla Assam Rifle Junction atangin location 10; Khatla Assam Rifle Junction , Tennis Court junction, Raj Bhavan South Gate, Treasury Square, New Secretariat Complex, AOC, Aizawl Temple, Zodin Square, Canteen kual leh Bazar Bungkawn-ah camera hrang hrang 56 dah a ni a, heng camera thlalakte hi thla khat daih dahkhawlna tur (server)bun fel nghal a ni bawk. A thawh khatna hi Kumin May 25 khan hawn a lo ni tawh a, A thawh hnihnaah hian hmun pawimawh 10-ah camera 35 bun belhleh a ni ta a ni.

Aizawl City Surveillance Project kalpui tu KSJ Dynamic Security project manager Billy Lalmuanpuia chuan, CCTV atan hian camera tha chi, IP camera, DV Tel company siam an hmang tih a sawi a. An camera vuahte chu zan thimah pawh colour vekin thla a la thei ani. CCTV enkawl tur hian police force hrang hrang – MRP, CID, MPRO, Traffic leh Security atangin training pek an ni tawh a ni.

Facebook Comments

Add a Comment