Mizoram Premier League Season 4 champion Aizawl FC chuan nimin zing khan Lammualah I League atan inpuahchahna an ṭan a, Mizoram Police aṭanga an hawh F. Lalrinpuia leh Lalbiakhlua te an tel lo. Aizawl FC hian January 9 hian an match hmasa berah champion lai Mohun Bagan chu Salt Lake Stadium-ah an hmachhawn ang a, January 16 hian 2013-14 season champion Bengaluru FC chu RG Stadium, Mualpuiah an mikhual ang.

MPL4-a mimal lawmman pathum best player, best forward leh top scorer chawimawina dawngtu Valpuia leh MPL3 top scorer Biaktea te hian BN Mullick Memorial All India Police Meet-a tel turin Mizoram Police team an zawm leh tawh a, I League match hmasa lam an inlan theih a rinawm loh.

Aizawl FC coach Manuel Retamero chuan, “I League-a che ṭha tur chuan tun aia ṭhain inbuatsaihna kan kalpui hi a ṭul a ni. Rajiv Gandhi Stadium-ah I League kan khel dawn a, kan khingpui aia kan khelmual hrechiang turin I League kan khelhna turah hian kan practice theih a ṭul. Aizawl FC hi Mizoram aiawh tur kan ni a, Mizo club zinga I League khel hmasa ber tur kan ni. Tunah chuan MPL-a kan champion kha kan theihngilh a ṭul tawh a, I League atan kan ngaihtuahna zawng zawng kan sen a ṭul tawh a ni,” tiin India ram club dang elpha tura ṭan a ṭul a thu a sawi.

Hero I League 2015/16 season-a an ball pet tur hi ‘nike ordem’ a ni a, pakhat man ringawt pawh hi Rs 8,995 a ni. Aizawl FC-in I League atana an inpuahchahna hmasa berah hian nike ordem hi an hmang nghal.

Aizawl FC I League Fixtures

– See more at: http://www.vanglaini.org/infiamna/47779#sthash.G88POFL7.dpuf