Posted on

MPL 4: The FINAL Aizawl FC vs Chanmari FC

MPL 4: The FINAL Aizawl FC vs Chanmari FC

Zanin dar 7:30 hian Lammualah Mizoram Premier League Season 4 hmawr bawkna neih a ni dawn a, Aizawl FC leh Chanmari FC te an inhmachhawn ang.

MPL3 final rematch-ah entu an tam dawn tih a chiang a, entu mipui tan kal hma a finthlak ang. Aizawl FC ṭantute Zomuanthanga Stand leh Zohminga Zote Stand-ah an ṭhu dawn a, Chanmari FC ṭantute K. Kawla Stand leh S. Malsawmtluanga Stand-ah an inkulh thung ang. Neutral supporter tan tlang lam bakah main gate bul ṭhutna zuah a ni bawk.

Thawnthu hlui
MPL1 Qualifier-ah Aizawl FC-in Chanmari FC an hneh a, I Day Football 2012 semifinal-ah Aizawl FC-in Chanmari FC an hneh lehnghal bawk.

MPL1-a an intawn hmasak ber ṭumin Aizawl FC senior team an zin chhuah avangin Chanmari FC-in an hneh mai a, intawn vawi hnihnaah erawh Aizawl FC an kim tawh a, Chanmari bawk an chak lo – Aizawl FC an indah sang larh.

H. Vanlalthlanga hnuaiah Chanmari FC an vul a, MPL2-ah Aizawl FC an hneh ve ve a, Chanmari FC an sang zawk. MPL3-ah erawh Aizawl FC-in K. Malsawmkima an nei a, club pahnih an inkhing tawk hle. League Round-ah Aizawl FC vawi khat an chak a, vawi khat dang erawh an inhnehtawk. Final-ah Aizawl FC an vannei a, penalty shootout hmangin an chak.

I League Second Division-ah lah vawi khat ve ve an chak. I League-ah Aizawl FC inpet tling a, Chanmari FC erawh an ngui. MPL4-ah Aizawl FC an chungnung chho a, vawi hnih an inhmachhawnah an chak ve ve.

Valpuia tel loin
Aizawl FC-in MPL4-a goal 13 khung thei F. Lalrinpuia an chhawr thei lo a, amaherawhchu Valpuia awm lo hi record aṭang chuan I League club hian an tuar lo. Republic Veng tlangval tel loin Aizawl FC-in match nga an khel a, an chak vek.

I League club tan Alfred Kemah Jaryan chu Valpuia awm loh hlana mamawh chhanna a ni a, Liberian forward hian MPL4-ah goal 7 a khung tawh. Midfield-ah captain David Lalrinmuana inhliam mah se Chanmari FC-in MPL3 chanve chho a an chhuahtir R. Malsawmtluanga chu Aizawl FC-in la lutin midfield kaihruaitu a ni.

MPL2 best player Msa, H. Lalbiakthanga leh Yuta Kinowaki te pathum inkawp hi an hmuhnawm a, innghahna tham an ni. Tlarhnungah Lalramchullova, Ronald Zothanzama, Lalruatthara leh Immanuel HS Lalṭhazuala te an rintlak bawk.

Aizawl FC coach Manuel Retamero chuan, “League Round-ah Dinthar FC leh BVT kan hneh lo a, Chanmari FC erawh vawi hnih kan hneh. Team ṭha an ni a, chutihrualin kan record en hian team ṭha zawk chu kan ni. Final a ni tawh a, ka player chhawr theih aṭangin a ṭha ber ka luhtir ang,” tiin Vanglaini palai a hrilh.

Aizawl FC-in pressure an ngah
Nimin khan finalist ten Aizawl Press Club-ah press conference an nei a, Chanmari FC captain Rochhingpuia chuan, “Aizawl FC hi I League club an ni a, pressure an ngah zawk dawn. Keini chuan rilru hahdam takin kan hmachhawn thei ang,” tiin an dinhmun ṭhatna lai a pholang.

Chanmari FC hian record an nei chhe zawk a, an khingpui tur angin foreigner an nei lo a, MPL club paruk coach ten an chak an ring lo bawk. Amaherawhchu captain Chhinga sawi ang hian pressure an nei tlem zawk a, Aizawl FC aiin ṭantu an ngah zawk a, coach a inringtawk bawk.

Chanmari FC boss HC Zarzoliana chuan, “BVT kan tum ṭumin an player ṭha ber MS Dawngliana a inhliam a, Aizawl FC-in an player ṭha ber Valpuia an chhawr thei lo bawk. Chak turin game plan kan siam a, kan vannei tel bawk. MPL club dang coach-te hian an ring sual ang,” tiin chak ngei a tum thu a sawi.

Chanmari hian defender rinawm Lalrinchhana an nei a, midfield-ah tawnhriat nei ṭha Reuben Zosangpuia an nei a, nomawi nena inzui tlat emaw tih tur R. Laldanmawia bakah Malsawmfela te unau an neih avangin Aizawl FC hneh thei tur squad an nei tih a chiang.

Extra time a awm dawn
Final-ah hian minute 90 chhunga an inhnehtawk chuan extra time (15+15mins) pek belh an ni ang a, an la inhnehtawk zel chuan penalty shootout hman tur a ni.

– See more at: http://www.vanglaini.org/infiamna/47593#sthash.skXZEirv.dpuf

Facebook Comments
Leave a Reply