Posted on

Synod-in pastor atan mi 18 a nemnghet

Synod-in pastor atan mi 18 a nemnghet

Mizoram Presbyterian Kohhran Synod Inkhawmpui vawi 92-na chu nizan khan a tiak. Nimina inkhawmah probationary pastor ni lai mi 18 chu pastor atan nemngheh a ni a, probationary pastor atan mi 24 dah ngheh an ni bawk. www.vanglaini.org

Synod Inkhawmpui rorel inkhawm, Inrinnia chhunzawmah Synod Executive Committee (SEC) aṭanga thu lut, Mizoram Baptist Kohhran nena inkhawmpuia inpalai tawn tura hmalak an rél a, inpalai tawn dan tur leh thil ṭul dangte chu SEC bawhzui turin an dah. www.vanglaini.org

The Mizo Marriage, Divorce and Inheritance of Property Act, 2014 hman a ni tawh avanga SEC-in Nupa Chungchang Dan a ennawnna chu pawm a ni a; SEC aṭanga thu lut angin Synod Hospital-ah nursing college din an remti. Zûk leh hmuam chungchanga chak zawka hmalak an rel a, SEC bawhzui turin an dah bawk.

Rorel inkhawm hi chhun lamah an zawh hman loh avangin Inrinni zan inkhawm bànah rorel inkhawm chhunzawm a ni a; finance officer Rev. Lalramliana Pachuau-in kum 2016-17 Synod budget Rs. 2,37,42,97,000 a pharh a, pawm a ni. Budget hi Pastoral-ah Rs. 1,47,87,84,000 leh Mission-ah Rs. 89,55,13,000 ruahman a ni. www.vanglaini.org

Nimin khan chawhma inkhawmah moderator Rev. H Lalrinmawia’n pastor atan pro. pastor 18 a nemnghet a, pro.pastor atana lâk thar mi 24 a dah nghet bawk. Pro. pastor dah ngheh tharte hi Mizoram ram chhunga awm tur mi 15, Synod Mission Board hnuaia thawk tur mi paruk leh Manipur area-a awm tur mi pathum an ni.

Chawhnu inkhawmah nikuma inkhawmpui leh kumina inkhawmpui inkara minister thi pali – Rev. ZT Sangkhuma, Rev. K Lalhmingliana, Rev. R Vanbèla leh Rev. Thianzalal te an sùn hun hman a ni a; Lalpa Zanriah Sakramen kîlho a ni bawk. www.vanglaini.org

Report-a a lan danin, Mizoram Synod hnuaiah hian presbytery 51, pastor bial 289, tualchhung kohhran 1,266, pastor 516, pro.pastor 61, kohhran upa 5,456, kohhran member 5,98,778, dan zawh kim 4,10,175, chhungkua 1,27,371 an awm a; kum kal ta chhungin nau piang 9,714 leh mitthi 3,623 an awm a ni.

– See more at: http://www.vanglaini.org/tualchhung/47528#sthash.8Nr3jNnW.dpuf

Facebook Comments
Leave a Reply