Posted on

AMC sorkar thar lak luh a ni Aizawl Mayor – PC Lalhmingthanga

AMC sorkar thar lak luh a ni Aizawl Mayor – PC Lalhmingthanga

Aizawl Municipal Corporation sorkar thar chu nimin khan AMC hall-ah lak luh a ni a; mayor atan PC Lalhmingthanga leh deputy mayor atan Lalringliana te lak luh an ni. www.vanglaini.org

AMC sorkar lak luhna inkhawmah hian councillor tharte an kal kim a, Aizawl district magistrate Dr Franklin Laltinkhuma’n ward hmasak dan indawtin couicillor-te chu rinawmna thu tiamtirin a la lut a ni.

Councillor-te lak luh an nih hnuah Mayor leh Deputy Mayor thlanna neih a ni. Mayor tur hian ward-III councillor R Romawia’n ward-VIII councillor PC Lalhmingthanga, MNF a vawrh chhuak a, chuhtu an awm loh avangin Magistrate-in AMC Mayor a nih thu a puan hnuah rinawmna thu tiamtira lak luh a ni.

Deputy Mayor tur thlannaah ward XII councillor-in ward-II councillor Lalringliana a vawrh chhuak a, chuhtu dang an awm loh avangin Magistrate-in AMC Deputy Mayor a nih thu a puang a, rinawmna thu tiamtira lak luh a ni.

AMC sorkar lak luhna inkhawmah hian Aizawl khawpui chhunga MLA 11 zinga pali – Lt.Col. ZS Zuala, K Sangṭhuama, Lalruatkima leh Lalthanliana te an tel a; AMC councillor hluite an tel bawk. www.vanglaini.org

Aizawl mayor PC Lalhmingthanga chuan, Aizawl Mayor atana thlan a ni chu lawmawm a tih thu sawiin, “Mipui sorkar, mipui huapzo kan kalpui dawn. Pathian hruaina hnuaiah councillor-te leh mipuite nena thawhhona ṭha tak nen Aizawl khawpui hmasawnna hi nasa takin kan thawh ka ring tlat a ni,” a ti. www.vanglaini.org

PC Lalhmingthanga chuan, mipuite’n ring tawka an thlan chhuahte an nih angin mipuite tan hna an thawk dawn tih sawiin, “In mi rin tawkna hi kan tihlawhchham lo ang. Mipuite mamawh leh nunkhaw nawmna tur ngaihtuahsak hi kan ngaih pawimawh hmasak ber tur a ni,” a ti a; an manifesto-a inziakte tihhlawhtling turin theihtawp an chhuah tur thu a sawi. www.vanglaini.org

Aizawl Mayor chuan, AMC sorkar hmasa berah Aizawlin hmasawnna duhawm tak a nei tih sawiin, “AMC hmalak tawhna mipuite tana ṭha leh ṭangkai reng reng chu AMC sorkar thar hian ṭha takin a chhunzawm dawn,” a ti. Mizoram sorkarin AMC-ah subject pariat a pe tawh tih sawiin, Building Regulation kalpui mek chu mipui ṭhatna tur a ni avangin zâwm turin mipuite a sáwm a ni. www.vanglaini.org

PC Lalhmingthanga chuan, lei laih vang leh in sakna tur laih vanga chhiatna thleng ṭhin pumpelh nan Geology & Mineral Resources department nen ṭangrualin hmalak chhoh tum a nih thu te, mumal taka bawlhhlawh paih zel tum a nih thu te a sawi a; “Chhiah kan lak mek Property Tax-a kan sum hmuhte hi mipui tana luang chhuak leh tgur a ni,” tiin, mipuite chu ṭha taka chhiah pe turin a ngen. www.vanglaini.org

Aizawl DC Dr Franklin Laltinkhuma chuan AMC chu lawmpuina leh duhsakna hlânin, fimkhur taka kal turin a chah a; sumte mipui tan dik taka hmang tura fuihin, “AMC sumte hi NGO leh kohhran sumte nen a danglam lo a, thianghlim taka hman ni se. Aizawl tan theihtawp chhuah turin ka duhsak che u a ni,” a ti.

– See more at: http://www.vanglaini.org/tualchhung/47420#sthash.Mx9bwVwy.dpuf

Facebook Comments
Leave a Reply