Mizoramin drugs policy thar a nei

Mizoramin drugs policy thar a nei

Ruihhlo dona tur atana duan Drafting Committee on Comprehesive Drugs Policy for Mizoram-in ruahmanna a siam chu nimin khan pawm a ni. www.vanglaini.org

Social Welfare department bultumin ruihhlo dona dan duang turin Drafting Committee on Comprehesive Drugs Policy for Mizoram din a ni a, anni hian drugs policy an duang a ni. Drugs policy hi chief minister Lal Thanhawla kaihhruai High Level Monitoring Committee nimina Cabinet room-a ṭhukhawm chuan an sawiho hnuah an pawm. www.vanglaini.org

Chief Minister chuan, drugs policy chu a hlawhtlinna atan department hrang hrang thawhho a ngaih dawn thu a sawi a, “Department hrang hrangte’n thawhhona ṭha an neih a pawimawh dawn hle a ni,” a ti.

Meeting-ah hian Mizoram chu ruihhlo atana hman chi damdawi (drug) tawlhrûkna kalkawngah hman a nih ṭhin bakah, Mizoramah ruihhlo ti ṭhin tam tak an awm tih an sawi. Ruihhlo zingah methamphetamine (meth tia hriat bawk) hlauhawm bikzia leh Mizoramah nasa taka tawlhrûk a nih thu tarlan niin, “Mizoramah drugs ti ṭhinte dinhmun hre chiang turin survey neih a ṭul hle,” an ti. www.vanglaini.org

Meeting-a tarlan danin, drugs policy hi India ramah Punjab state chauh tih loh chu a hranga policy nei state dang an awm lo. Drugs hrim hrim chungchanga Mizoramin a hranpain dan a la neih lo a, NDPS Policy 2012 chu duhkhawp a ni loh avangin policy duan a ni. www.vanglaini.org

Mizoram Drugs Policy-ah hian policy duan chhan, a thil tum, a hmanrua leh kalpui dan tur, a vil zuina lam leh department hrang hrang 11 intêlkhawma hmalakhona tur a ni a; policy tum bulpui ber chu – ruihhlo ngaite rilru, taksa leh thlaraua ruihhloa an fihlim theihna tura hna thawh a ni. www.vanglaini.org

Mizoram Drugs Policy hnuaiah hian sorkar department hrang hrang – Social Welfare, Health & Family Welfare, School Education, Higher & Technical Education, Labour, Employment & Industrial Training, Sports & Youth Services, Home, Excise & Narcotics, IPR leh MSACS-te an ṭangho dawn a ni.

– See more at: http://www.vanglaini.org/tualchhung/47227#sthash.tu3ie9if.dpuf

Facebook Comments

Add a Comment