Posted on

Indian Super League Chennaiyin semifinal luh nan Jeje-a goal

Indian Super League Chennaiyin semifinal luh nan Jeje-a goal

Mizo tlangval Jeje Lalpekhlua’n goal khung a ṭhulh thei lo. Inrinni zan khan Chennaiyin FC tan Indian Super League-ah chakna goal a khung a, a game hnuhnung pathuma goal li a khungna a ni ta.

Chhatrapati Sports Complex-ah beisei tur nei tawh lo Pune City-in Chennaiyin an mikhual a, Chennai tan semifinal lut turin draw result tal hlawhchhuah a ngai thung.

First half-ah inkhel thununtu Chennaiyin-in goal khung thei lo mah se second half-ah erawh inkhel thlak danglam turin Jeje-a a inlar. Minute 64-naa India international goal shot hi Pune keeper Steven Simonsen chuan ṭha takin dang mah se a per lehlam chu Jeje-a ke bulah bawk a tla leh a, Hnahthial tlangval hian Stoke City keeper hlui goal venah a hlah nawn tawh lo.

Inkhel tawp thlengin goal dang a lut tawh lo. Pune City tana Lunglei rawlthar Lalrempuia Fanai inkhel bul ṭan zanah Jeje-a khelhna Chennaiyin FC-in 1-0 in hnehna an chang a, semifinal an lut.

Emerging Player of the Match-a thlan Jeje chuan, “Kan match hmasa bera goal ka khung hnu khan World Cup qualifier-te kan khelh leh avangin duh angin ISL lamah rilru ka pe tawk thei lo a, match hnih lai kha chu winger anga hman ka ni bawk. Mahse, tun hnaiah ka position dik takah min chhawr leh tawh a, hei hi ka khelh ṭhat phah niin ka hria,” tiin tun hnaia a chet ṭhat chhan Vanglaini palai a hrilh.

Jeje-a chuan sawi chhunzawmin, “Match li chiah khelh tur kan hmabak tawh tihah khan semifinal lut tur chuan kan chak vek a ngai a ni tih kan hria a, kan theihtawp chhuahin kan bei a, kan hlawhtlin phah a ni. Tun hnaia kan result avangin team boruak pawh a ṭha a, ISL nomawi chawi turin kan inring tawk a ni,” tiin champion ngei an tum thu a sawi.

Zirtawpni zan khan inkhel awmze nei tawh loah Mumbai City FC chuan 3-2 in Atletico de Kolkata an hneh bawk.

Match Awards
Swift Moment of the Match   Steven Simonsen, Pune City
Fittest Player of the Match     Stiven Mendoza, Chennaiyin FC
Emerging Player of the Match   Jeje Lalpekhlua, Chennaiyin FC
Hero of the Match   Apoula Edel, Chennaiyin FC

– See more at: http://www.vanglaini.org/infiamna/47126#sthash.0c8yi5jg.dpuf

Facebook Comments
Leave a Reply